দেওবাৰে দুপৰীয়া দক্ষিণ-পশ্চিম দিল্লীৰ সত্য নিকেতন এলেকাত এক ভয়ংকৰ অঘটন সংঘটিত হয়। এটা ৬ মহলীয়া আৱাসিক ভৱন খহি পৰাৰ ফলত ধ্বংসস্তূপৰ মাজত আৱদ্ধ হৈ পৰিছে বহু লোক। দিল্লী বিশ্ববিদ্যালয়ৰ সমীপৰ এই ভৱনটো মূলতঃ এটা পেয়িং গেষ্ট হোৱাৰ বাবে আৱদ্ধ লোকসকলৰ বেছিভাগেই শিক্ষাৰ্থী বুলি সন্দেহ কৰা হৈছে।
দিনৰ প্ৰায় ১:৩০ বজাত সংঘটিত এই অঘটনৰ পাছতে যুদ্ধকালীন তৎপৰতাৰে উদ্ধাৰ অভিযান আৰম্ভ কৰা হৈছে। চৰকাৰী প্ৰতিনিধিৰ মতে, বৰ্তমানলৈকে ধ্বংসস্তূপৰ মাজৰ পৰা ৬ জনক জীৱন্তে উদ্ধাৰ কৰা হৈছে আৰু ইয়াৰে তিনিজনক চিকিৎসালয়লৈ প্ৰেৰণ কৰা হৈছে। অৱশ্যে, দিল্লী আৰক্ষীয়ে প্ৰাথমিকভাৱে দুজন লোকক উদ্ধাৰ কৰা বুলি নিশ্চিত কৰিছে। ঘটনাস্থলীত ১২ খনকৈ অগ্নিনিৰ্বাপক গাড়ী, আৰক্ষী, এম্বুলেঞ্চ আৰু দুৰ্যোগ ব্যৱস্থাপনা দল মোতায়েন কৰা হৈছে।
প্ৰত্যক্ষদৰ্শীৰ মতে, দেওবাৰৰ বন্ধৰ দিন হোৱাৰ বাবে বেছিভাগ ছাত্ৰই হোষ্টেলত আছিল আৰু প্ৰায় ৫০ গৰাকী শিক্ষাৰ্থী আৱদ্ধ হৈ থকাৰ আশংকা কৰা হৈছে। এগৰাকী ছাত্ৰই সংবাদ সংস্থাক জনোৱা মতে, ভগ্নাৱশেষৰ তলৰ পৰা আৱদ্ধ ছাত্ৰসকলে সহায়ৰ বাবে চিঞৰি থকা শুনা গৈছে। স্থানীয় বিজেপি বিধায়ক অনিল শৰ্মাই জানিবলৈ দিয়া মতে, আৱদ্ধ হৈ থকা একাংশ ছাত্ৰই ভিতৰৰ পৰা ফোন যোগেও যোগাযোগ কৰিছে।
দিল্লীৰ মুখ্যমন্ত্ৰী ৰেখা গুপ্তাই ঘটনাত গভীৰ উদ্বেগ প্ৰকাশ কৰি কাষৰীয়া ভৱনসমূহ সাৱধানতামূলক ব্যৱস্থা হিচাপে খালী কৰোৱা হৈছে বুলি জনায়। উপ-ৰাজ্যপাল তৰণজিৎ সিং সান্ধুৱেও সকলো সংস্থাক একত্ৰিত হৈ উদ্ধাৰ অভিযান ক্ষিপ্ৰতৰ কৰিবলৈ নিৰ্দেশ দিছে।
আনহাতে, আম আদমী পাৰ্টীৰ নেতা সৌৰভ ভৰদ্বাজে এই ঘটনাৰ বাবে দুৰ্নীতিক জগৰীয়া কৰিছে। তেওঁ অভিযোগ কৰে যে দিল্লী পৌৰ নিগমত অভিযন্তা বদলিৰ নামত ১.২৫ কোটি টকাৰ বৃহৎ উৎকোচৰ লেনদেন হয়, যাৰ ফলত নিৰ্মাণ কাৰ্যত এনে দুৰ্নীতি সংঘটিত হয়। তেওঁ লগতে কয় যে ভৱনটোত ৩০-৪০ জন ছাত্ৰ আৱদ্ধ হৈ থকাৰ আশংকা আছে আৰু দুৰ্নীতি বন্ধ নোহোৱালৈকে এনে ঘটনাৰ পুনৰাবৃত্তি ঘটিয়েই থাকিব।
ইতিমধ্যে ভৱনটোৰ গুৰুগ্ৰাম নিবাসী স্বত্বাধিকাৰীৰ বিৰুদ্ধে আৰক্ষীয়ে প্ৰাথমিক তদন্ত আৰম্ভ কৰিছে। উদ্ধাৰকাৰী দলে ক্ষিপ্ৰতাৰে আৱদ্ধ লোকসকলক সুৰক্ষিতভাৱে বাহিৰলৈ উলিয়াই অনাৰ চেষ্টা অব্যাহত ৰাখিছে।
