আই পি এলত এতিয়া চলি আছে ‘ৰেচ টু প্লে অফ’ উইক। দেওবাৰে ৰাজস্থান ৰয়েলছ আৰু দিল্লী কেপিটেলছ এখন খেলত মুখামুখি হয়। ৰাজধানীত অনুষ্ঠিত এই খেলখনত অক্ষৰ পেটেল বাহিনীয়ে ৪টা বল বাকী থকা অৱস্থাত ৫ উইকেটত জয়লাভ কৰে।
ৰাজস্থানে এতিয়া প্লে অফলৈ যাবলৈ আগন্তুক মেচসমূহৰ ফলাফললৈ চাব লাগিব। ইয়াৰ লগে লগে দিল্লীয়ে ১৩খন খেলৰ পৰা ১২ পইণ্ট লাভ কৰি সপ্তম স্থানলৈ উন্নীত হৈছে।
দেওবাৰে টছত জয়ী হৈ দিল্লীৰ অধিনায়ক অক্ষৰ পেটেলে প্ৰথমে বলিং কৰাৰ সিদ্ধান্ত লয়। প্ৰথমে বেটিং কৰি ৰাজস্থানে ৮টা উইকেট হেৰুৱাই ১৯৩ ৰান সংগ্ৰহ কৰে। ইয়াত সৰ্বাধিক অৱদান আগবঢ়ায় ধ্ৰুৱ জোৰেলে (৫৩)। ইয়াৰ উপৰিও অধিনায়ক ৰিয়ান পৰাগ (২৬ বলত ৫১) আৰু বৈভৱ সূৰ্যবংশী (২১ বলত ৪৬) দলৰ হৈ প্ৰশংসনীয় ইনিংছ খেলে।
কিন্তু বাকীসকলৰ ইনিংছ সন্মানজনক নাছিল। যশস্বীয়ে ১২ ৰান কৰি ড্ৰেছিং ৰুমলৈ উভতি যায়। দৰাচলতে ৰাজস্থানৰ বেটিঙৰ পৰা আৰু অধিক ৰোমাঞ্চকৰ ইনিংছ আশা কৰিছিল দৰ্শকে।
আনহাতে, দুই অ’পেনাৰ অভিষেক পোৰেল আৰু কে এল ৰাহুলে প্ৰথমে পাৰ্টনাৰশ্বিপ গঢ়ি তুলিছিল আৰু দলটোক লক্ষ্যৰ বহু ওচৰলৈ লৈ গৈছিল। ৪২ বলত ৫৬ ৰান সংগ্ৰহ কৰা লোকেশ ৰাহুলৰ ইনিংছ আছিল সৰ্বোচ্চ স্ক’ৰ। অভিষেকেও দ্বিতীয় সৰ্বাধিক স্ক’ৰ – ৩১টা বলত ৫১ ৰান সংগ্ৰহ কৰে।
ইয়াৰ উপৰিও অধিনায়ক অক্ষৰে ১৮টা বলত ৩৬ ৰানৰ গুৰুত্বপূৰ্ণ ইনিংছ খেলে। আশুতোষ শৰ্মা (১৮), ডেভিড মিলাৰ (৯), চাহিল পৰাখ (৯) আৰু ট্ৰিষ্টান ষ্টাবছে ৪ ৰান সংগ্ৰহ কৰে।
বলিংত শক্তিশালী ৰাজস্থানক নিষ্প্ৰভ কৰি তোলে দিল্লীয়ে। দিল্লীৰ বলাৰসকলে বিপক্ষৰ মুঠ ৮টা উইকেট দখল কৰে। মিচেল ষ্টাৰ্কে অকলে ৪টা গুৰুত্বপূৰ্ণ উইকেট দখল কৰে। লুংগী ঙিদি আৰু মুকেশ কুমাৰেও ২টাকৈ উইকেট দখল কৰে।
আনহাতে, ৰাজস্থানৰ বলাৰসকলে দিল্লীতকৈ কম উইকেট দখল কৰে৷ বৃজেশ শৰ্মা আৰু জোফ্ৰা আৰ্চাৰে ২টাকৈ উইকেট দখল কৰে। তদুপৰি দাসুন শানাকাই মাত্ৰ ১টা উইকেটহে দখল কৰে। বাকীবোৰ বিফল হয়।
