বংগ তথা দিল্লী কেপিটেলছৰ ক্ৰিকেটাৰ অভিষেক পোৰেলৰ বিৰুদ্ধে এক গুৰুতৰ অভিযোগ উত্থাপন হৈছে। এগৰাকী মহিলাই এই উইকেটৰক্ষক-বেটৰগৰাকীৰ বিৰুদ্ধে বিয়াৰ মিছা প্ৰতিশ্ৰুতি দি শাৰীৰিক সম্পৰ্ক স্থাপন কৰা, মাৰপিট কৰা আৰু ভাবুকি প্ৰদান কৰাৰ অভিযোগত আৰক্ষীৰ ওচৰত এজাহাৰ দাখিল কৰিছে। অৱশ্যে ২৩ বছৰীয়া ক্ৰিকেটাৰগৰাকীয়ে তেওঁৰ বিৰুদ্ধে অনা এই সকলোবোৰ অভিযোগ সম্পূৰ্ণৰূপে মিছা বুলি কৈছে।
পশ্চিমবংগৰ হুগলী জিলাৰ মগৰা আৰক্ষী থানাত মহিলাগৰাকী আৰু তেওঁৰ মাতৃয়ে এই এজাহাৰ দাখিল কৰিছে। ইয়াৰ পিছতে আৰক্ষীয়ে সমগ্ৰ ঘটনাটোৰ তদন্ত আৰম্ভ কৰিছে। অভিযোগ অনুসৰি, মহিলাগৰাকী আৰু অভিষেক পোৰেল যোৱা তিনি বছৰ ধৰি প্ৰেমৰ সম্পৰ্কত আছিল। কিন্তু যোৱা বছৰৰ পৰা তেওঁলোকৰ মাজত বিবাদৰ সৃষ্টি হয় আৰু তাৰ পিছৰে পৰা ক্ৰিকেটাৰগৰাকীয়ে মহিলাগৰাকীৰ পৰা আঁতৰি থাকিবলৈ আৰম্ভ কৰে। মহিলাগৰাকীৰ দাবী যে পোৰেলে তেওঁক বিয়া কৰোৱাৰ প্ৰতিশ্ৰুতি দিছিল কিন্তু এতিয়া তেওঁ বিয়া পাতিবলৈ অমান্তি হৈছে।
বৰ্তমান বেংগালুৰুত থকা ক্ৰিকেটাৰ অভিষেক পোৰেলে এই অভিযোগসমূহ অস্বীকাৰ কৰিছে। তেওঁ জনোৱা মতে, আৰক্ষীয়ে এতিয়ালৈকে তেওঁৰ সৈতে এই সন্দৰ্ভত কোনো যোগাযোগ কৰা নাই। পোৰেলে সংবাদ মাধ্যমৰ আগত কয় যে তেওঁ এতিয়া খেলত ভাল প্ৰদৰ্শন কৰি আছে, সেয়েহে তেওঁৰ নামত এনেকুৱা বিভিন্ন কথা ওলাইছে। আৰক্ষীৰ প্ৰাথমিক তদন্ত শেষ হোৱাৰ পিছত তেওঁ এই বিষয়ে বিতংভাৱে নিজৰ পক্ষ ৰাখিব বুলি জনায়।
অভিষেক পোৰেল এজন বাঁওহতীয়া ওপেনিং বেটৰ আৰু ২০২৩ চনৰে পৰা তেওঁ আই পি এলত দিল্লী কেপিটেলছ দলৰ হৈ খেলি আহিছে। যোৱা ছিজনত তেওঁ দিল্লী কেপিটেলছৰ হৈ চাৰিখন ইনীংছত ১০৮ ৰান সংগ্ৰহ কৰিছিল। ইয়াৰ উপৰিও তেওঁ পূৰ্বে ইণ্ডিয়া এ দলৰ হৈ ব্ৰিটেইন আৰু অষ্ট্ৰেলিয়া ভ্ৰমণ কৰিছে। ২০২১-২২ বৰ্ষত বংগ দলৰ হৈ প্ৰথম শ্ৰেণীৰ ক্ৰিকেটত আত্মপ্ৰকাশ কৰা পোৰেলে এতিয়ালৈকে ৩২খন প্ৰথম শ্ৰেণীৰ মেচ আৰু ২৩খন লিষ্ট এ মেচ খেলিছে।
