বিগত ৪৮ ঘণ্টাত ৰাজধানী দিল্লীত অত্যন্ত গৰমৰ বাবে ৩১০ জন ৰোগীক চিকিৎসালয়ত ভৰ্তি কৰা হৈছে। ইয়াৰে ১৪ জনৰ মৃত্যু হোৱা বুলি জানিব পৰা গৈছে। ফলত বিগত তিনিদিনত দিল্লীত গৰমৰ ফলত মৃত্যু হোৱা লোকৰ সংখ্যা ৩৪লৈ বৃদ্ধি পালে!
ৰাজধানীত ধাৰাবাহিকভাৱে গ্ৰীষ্ম প্ৰবাহ অব্যাহত আছে। যোৱা কিছুদিন ধৰি ধাৰাবাহিকভাৱে তাপমাত্ৰা ৪৫ ডিগ্ৰীৰ ওপৰত আছে। বৰষুণৰ কোনো সম্ভাৱনাই নাই। এই পৰিস্থিতিত মঙলবাৰে লাভ কৰা তথ্য মতে দিল্লীত দুদিনত ৫জন লোকৰ মৃত্যু হয়। আজি বৃহস্পতিবাৰে সেই সংখ্যা ৩৪ লৈ বৃদ্ধি পাইছে।
ইপিনে, বৰ্তমান চলি থকা হিটষ্ট্ৰোকৰ বাবে বহু লোক চিকিৎসালয়ত ভৰ্তি হৈ আছে। আটাইকেইজনেই লাইফ চাপৰ্টত আছে বুলি চিকিৎসালয় কৰ্তৃপক্ষই জানিবলৈ দিছে।
লগতে পঢ়কঃ পেটত পৰা লগে লগে জ্বলা-পোৰা, বিষ, বমি : তামিলনাডুত মদ খাই মৃত্যু কমেও ২৯ জনৰ
সূত্ৰ অনুসৰি যোৱা দুদিনত হিটষ্ট্ৰ’কৰ বাবে চিকিৎসালয়ত ভৰ্তি হোৱা ৩১০ জন ৰোগীৰ ভিতৰত ১৪ জন ৰোগীৰ মৃত্যুৰ হোৱাৰ পিছত মৃতকৰ সংখ্যা ৩৪ লৈ বৃদ্ধি পাইছে। এই ৩৪ জন লোকৰ ভিতৰত ২৭ জন লোকক মৃত অৱস্থাত অনা হৈছিল। অৰ্থাৎ বাটতেই তেওঁলোকৰ মৃত্যু হয়।
মৃত্যু হোৱাসকলৰ বেছিভাগেই গৃহহীন আৱাসী। পথচাৰীয়ে দেখা পাই চিকিৎসালয়লৈ অনা লোক। সকলোবোৰ মৃত্যুৰ পিছত মৰণোত্তৰ পৰীক্ষা কৰি মৃত্যুৰ কাৰণ নিৰ্ণয় কৰা হৈছে।
ইতিমধ্যে কেন্দ্ৰীয় স্বাস্থ্যমন্ত্ৰী জে পি নাড্ডাই চৰকাৰী চিকিৎসালয়সমূহক এই পৰিস্থিতিত ব্যৱস্থা গ্ৰহণ কৰিবলৈ নিৰ্দেশ দিছে। হিটষ্ট্ৰোক ৰোগীৰ সঠিক চিকিৎসাৰ বাবে পৃথক পৃথক ‘হিটৱেভ ইউনিট’ৰ নিৰ্দেশ দিয়া হৈছে। চিকিৎসক মহলৰ মতে, অত্যধিক গৰম আৰু অত্যধিক তাপ প্ৰবাহৰ ফলত হিট ষ্ট্ৰোক হোৱাৰ সম্ভাৱনা আগৰ তুলনাত ৬০-৭০ শতাংশ বৃদ্ধি পাইছে! ৰোগীৰ বহু অংগ বিকল হোৱাৰ প্ৰৱনতাও বৃদ্ধি পাইছে।
লগতে পঢ়কঃ আমেৰিকাৰ বিৰুদ্ধে কষ্টকৰ জয়েৰে টী-২০ বিশ্বকাপৰ ছুপাৰ এইট অভিযান আৰম্ভ দক্ষিণ আফ্ৰিকাৰ
দুৰ্যোগ ব্যৱস্থাপনা কৰ্তৃপক্ষই ইতিমধ্যে সাধাৰণ লোকৰ বাবে এই গ্ৰীষ্ম প্ৰবাহৰ পৰিস্থিতিত নিজকে কেনেকৈ সুস্থ কৰি ৰাখিব পাৰি তাৰ নিৰ্দেশনা জাৰি কৰিছে। দুপৰীয়া ১২ বজাৰ পৰা বিয়লি ৩ বজালৈ ৰ’দত ওলাই নাযাবলৈ কৈছে। অধিক পানী খোৱাৰ পৰামৰ্শও দিয়া হয়।
বতৰ বিজ্ঞানীসকলৰ মতে, ৰাজধানী চহৰ দিল্লীত বিগত ১২ বছৰত এনে গ্ৰীষ্ম প্ৰবাহ দেখা পোৱা নাই। এই চৰম পৰিস্থিতিৰ মাজতে পুনৰ জল সংকটৰ সৃষ্টি হৈছে। সকলো মিলি সাধাৰণ মানুহৰ জীৱন দুৰ্বিসহ হৈ পৰিছে।
