নীট কেলেংকাৰিৰ প্ৰতিবাদত কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগৰ দাবীত ককৰোচ জনতা পাৰ্টিয়ে সোমবাৰে সংসদ চলো কাৰ্যসূচী আৰম্ভ কৰিছে। প্ৰতিবাদকাৰীক বাধা দিবলৈ দিল্লী আৰক্ষীয়ে ১৬৩ ধাৰা জাৰি কৰি ৰাজধানীখনত নিৰাপত্তা বলয় গঢ়ি তুলিছে। সেয়া উপেক্ষা কৰি চিজেপিয়ে আজি পুৱা সংসদ অভিমুখে শোভাযাত্ৰা আৰম্ভ কৰে। অলপ দূৰ যোৱাৰ পিছতে বেৰিকেড দি তেওঁলোকক ৰখাই দিয়া হয়। পৰিস্থিতি নিয়ন্ত্ৰণৰ বাবে আৰক্ষীয়ে লাঠিচালনাও কৰে।
আজি ‘ককৰোচ জনতা পাৰ্টি’ৰ কাষত থিয় হৈ সংসদ অভিযানত অংশগ্ৰহণ কৰে প্ৰায় ৮ হাজাৰ লোকে। সমাৱেশ আৰম্ভ হোৱাৰ লগে লগে আৰক্ষীয়ে তেওঁলোকক বাধা দিবলৈ আৰম্ভ কৰে। কিন্তু প্ৰতিবাদকাৰীক কোনো ধৰণে নিয়ন্ত্ৰণ কৰিব পৰা নগ’ল। ইয়াৰ পিছত আৰম্ভ হ’ল লাঠিচালনা।
সোমবাৰ সংসদৰ বৰ্ষাকালীন অধিৱেশনৰ প্ৰথম দিন। আজিৰ কাৰ্যসূচীৰ কথা বহু আগতীয়াকৈ ঘোষণা কৰিছিল চিজেপিয়ে। প্ৰায় এমাহ ধৰি চলি থকা নীট কাণ্ডৰ প্ৰতিবাদ দিন যোৱাৰ লগে লগে অধিক তীব্ৰতৰ হৈ পৰিছে।
লাডাখৰ সমাজকৰ্মী সোণম ৱাংচুকে জুন মাহৰ শেষৰ ফালে যন্তৰ মন্তৰত অনশনত বহিছিল। তেওঁৰ শাৰীৰিক অৱস্থাৰো অৱনতি ঘটিছে। অৱশেষত ২১ দিনৰ অন্তত উচ্চ ন্যায়ালয়ৰ নিৰ্দেশ অনুসৰণ কৰি দিল্লী আৰক্ষীয়ে শনিবাৰে সোণমক ছফদৰজং হাস্পতালত ভৰ্তি কৰে। ইয়াকলৈও বিতৰ্ক চলি আছে।
সোণম ৱাংচুকৰ পত্নী গীতাঞ্জলি আংমোৱে স্বামীৰ অনুপস্থিতিত আজিৰ সংসদ চলো শোভাযাত্ৰাত প্ৰতিনিধিত্ব কৰিব বুলি ঘোষণা কৰিছিল।
ইফালে দিল্লী আৰক্ষীয়ে চিজেপিৰ এই অভিযানক ‘অবৈধ’ বুলি অভিহিত কৰি শোভাযাত্ৰাৰ অনুমতি নিদিলে। যন্তৰ মন্তৰ এলেকাত জাৰি কৰা হৈছে ১৬৩ ধাৰা। বেৰিকেডেৰে ঘেৰি ৰখা হৈছে পথটো।
সূত্ৰ অনুসৰি সোমবাৰে পুৱা ৪ বজাৰ পৰা দিল্লীত নিৰাপত্তা কটকটীয়া কৰা হৈছে। প্ৰতিবাদকাৰীয়ে যাতে কোনো ধৰণে আইন-শৃংখলা পৰিস্থিতিত ব্যাঘাত জন্মাব নোৱাৰে তাৰ বাবে সমগ্ৰ নতুন দিল্লী অঞ্চলটোক ১৫টা নিৰাপত্তা মণ্ডলত বিভক্ত কৰা হৈছে। প্ৰতিটো জ’নৰ নেতৃত্বত আছে এজন বিশেষ আয়ুক্ত আৰু এজন উপাযুক্ত পদ মৰ্যাদাৰ বিষয়া।
দিল্লী আৰক্ষীৰ উপৰিও মহিলা জোৱানকে ধৰি কেন্দ্ৰীয় সশস্ত্ৰ আৰক্ষী বাহিনীৰ ২৫টাতকৈও অধিক বেটেলিয়ন কৌশলগত স্থানসমূহত মোতায়েন কৰা হৈছে। যিকোনো পৰিস্থিতিৰ সৈতে মোকাবিলা কৰিবলৈ জলকামান আৰু সংঘৰ্ষ বিৰোধী ‘বজ্ৰ’ বাহনকো সাজু কৰি ৰখা হৈছে।
দিল্লী আৰক্ষীয়ে স্পষ্ট কৰি দিছে যে এই সংসদ অভিযানৰ বাবে কোনো অনুমতি লোৱা হোৱা নাই বা দিয়া হোৱা নাই। ইতিমধ্যে সমগ্ৰ দিল্লীত ১৬৩ ধাৰা (পূৰ্বতে ১৪৪ নামেৰে জনাজাত) বলবৎ হৈছে। ফলত যন্তৰ মন্তৰৰ বাহিৰে ক’তো ৫ জন বা তাতকৈ অধিক লোকৰ সমাগম বা শোভাযাত্ৰা সম্পূৰ্ণ নিষিদ্ধ।
বিজয় চক, পাৰ্লিয়ামেণ্ট ষ্ট্ৰীট, প্ৰধানমন্ত্ৰীৰ বাসগৃহ, সেৱা তীৰ্থ, ইণ্ডিয়া গেট, ৰাষ্ট্ৰপতি ভৱনৰ দৰে উচ্চ নিৰাপত্তাসম্পন্ন অঞ্চলত যিকোনো ধৰণৰ প্ৰতিবাদত কঠোৰ নিষেধাজ্ঞা আৰোপ কৰা হৈছে। নিয়ম ভংগ হ’লে কঠোৰ আইনী ব্যৱস্থা গ্ৰহণ কৰিব বুলি সকীয়াই দিছে আৰক্ষীয়ে। কিন্তু ইমান বছৰৰ পাছত সমগ্ৰ দেশে দিল্লীৰ ৰাজপথত এই ৰাজনৈতিক সংঘাতে কি ৰূপ লয় তালৈ চকু ৰাখিছে।
