উত্তৰ-পূব দিল্লীত হোৱা ভয়ংকৰ সাম্প্ৰদায়িক সংঘৰ্ষৰ সময়ত ইণ্টেলিজেন্স ব্যুৰো চমুকৈ আইবিৰ বিষয়া অংকিত শৰ্মাক হত্যা কৰা হৈছিল। এই ঘটনাৰ প্ৰায় ছয় বছৰৰ পাছত সোমবাৰে দিল্লীৰ এখন আদালতে আম আদমী পাৰ্টীৰ প্ৰাক্তন কাউঞ্চিলৰ তাহিৰ হুছেইন আৰু আন চাৰিজনক এই হত্যাৰ গোচৰত দোষী সাব্যস্ত কৰিছে। আনহাতে, উপযুক্ত প্ৰমাণৰ অভাৱত আন ছয়জন অভিযুক্তক দোষমুক্ত কৰা হৈছে।
অতিৰিক্ত সত্ৰ ন্যায়াধীশ প্ৰবীণ সিঙে এই গোচৰৰ শুনানি গ্ৰহণ কৰিছিল। তেওঁ মুঠ ১১ জন অভিযুক্তৰ ভিতৰত তাহিৰ হুছেইনৰ লগতে নাজিম, কাছিম, জাভেদ আৰু আনাছক দোষী সাব্যস্ত কৰে। হুছেইনক হত্যা, ধৰ্মীয় গোটৰ মাজত শত্ৰুতা বৃদ্ধি কৰা, মৰপিট কৰা আৰু এজন ব্যক্তিক অপদস্থ কৰাৰ অপৰাধত দোষী সাব্যস্ত কৰা হৈছে। অৱশ্যে তেওঁৰ বিৰুদ্ধে থকা অপৰাধমূলক ষড়যন্ত্ৰৰ অভিযোগটো প্ৰত্যাহাৰ কৰা হৈছে। আদালতৰ ভিতৰৰ সূত্ৰৰ পৰা জানিব পৰা গৈছে যে ৰায়দান শুনাৰ পাছতে তাহিৰ হুছেইন কান্দি পেলাইছিল।
এই গোচৰটো অংকিত শৰ্মাৰ পিতৃ ৰবিন্দৰ কুমাৰে দয়ালপুৰ আৰক্ষী থানাত দাখিল কৰা এখন এজাহাৰৰ ভিত্তিত আৰম্ভ হৈছিল। এজাহাৰ অনুসৰি, ২০২০ চনৰ ২৫ ফেব্ৰুৱাৰীত অংকিত শৰ্মা কামৰ পৰা ঘৰলৈ উভতি আহি পুনৰ বাহিৰলৈ গৈছিল আৰু তাৰ পাছৰ পৰাই নিৰুদ্দেশ হৈছিল। পাছত স্থানীয় লোকে পৰিয়ালটোক জনায় যে শৰ্মাক হত্যা কৰি চান্দ বাগ পুলিয়া অঞ্চলৰ এটা মছজিদৰ ওচৰৰ খজুৰী খাছ নলাত পেলাই দিয়া হৈছে। পাছত সেই নলাটোৰ পৰাই তেওঁৰ মৃতদেহ উদ্ধাৰ কৰা হৈছিল। পিতৃ ৰবিন্দৰ কুমাৰে অভিযোগ কৰিছিল যে তাহিৰ হুছেইন আৰু আন একাংশ লোকে মিলি তেওঁৰ পুত্ৰক হত্যা কৰিছিল।
আদালতে হুছেইন, নাজিম, কাছিম, জাভেদ আৰু আনাছক দোষী সাব্যস্ত কৰাৰ বিপৰীতে হাছিন, সমীৰ খান, ফিৰোজ, গুলফাম, শোয়েব আলম আৰু মুন্তাজিমক প্ৰমাণৰ অভাৱত মুকলি কৰি দিয়ে। ২০২৩ চনৰ ২৪ মাৰ্চত আদালতে এই আটাইকেইজনৰ বিৰুদ্ধে হত্যা, মৰপিট আদি বিভিন্ন ধাৰাত অভিযোগ গঠন কৰিছিল।
২০২০ চনৰ ফেব্ৰুৱাৰী মাহত নাগৰিকত্ব সংশোধনী আইনৰ বিৰুদ্ধে হোৱা প্ৰতিবাদৰ সময়ত উত্তৰ-পূব দিল্লীত এই ভয়ংকৰ সাম্প্ৰদায়িক সংঘৰ্ষৰ সৃষ্টি হৈছিল। এই হিংসাত্মক ঘটনাত শিলগুটি নিক্ষেপ, অগ্নিসংযোগ আৰু ভাঙি-চিঙি পেলোৱা আদিৰ দৰে ঘটনা ঘটিছিল, য’ত ৫৩ জন লোকে প্ৰাণ হেৰুৱাইছিল আৰু বহু লোক আহত হৈছিল। দিল্লীৰ সংঘৰ্ষৰ লগত জড়িত এইটো এটা অতি গুৰুত্বপূৰ্ণ ৰায়। দোষী সাব্যস্ত হোৱা লোকসকলৰ শাস্তিৰ পৰিমাণ আদালতৰ দ্বাৰা পাছত সুকীয়াকৈ ঘোষণা কৰা হ’ব।
