শেহতীয়াকৈ দিল্লীত ছাত্ৰ প্ৰতিবাদকাৰী আৰু আৰক্ষীৰ মাজত সংঘটিত হোৱা হিংসাত্মক ঘটনাৰ তদন্তৰ বাবে উচ্চতম ন্যায়ালয়ে গঠন কৰা উচ্চস্তৰীয় সমিতিখন পুনৰ গঠনৰ দাবী উত্থাপন হৈছে। মঙলবাৰে উচ্চতম ন্যায়ালয়ত এই সন্দৰ্ভত এখন আৱেদন দাখিল কৰা হয়। প্ৰাক্তন ন্যায়াধীশ আৰ সুভাষ ৰেড্ডীৰ নেতৃত্বত গঠন কৰা এই পাঁচজনীয়া তদন্ত সমিতিখনক লৈ প্ৰশ্ন উত্থাপন কৰিছে আৱেদনকাৰীসকলে।
মঙলবাৰে মুখ্য ন্যায়াধীশ সূৰ্য কান্ত, ন্যায়াধীশ জয়মাল্য বাগচী আৰু ন্যায়াধীশ ভি মোহনাৰ বিচাৰপীঠৰ সন্মুখত জ্যেষ্ঠ অধিবক্তা গোপাল শংকৰনাৰায়ণনে একাংশ আৱেদনকাৰীৰ হৈ এই বিষয়টো উত্থাপন কৰে। আনহাতে, চলিচিটৰ জেনেৰেল তুষাৰ মেহতাই এই আৱেদনৰ তীব্ৰ বিৰোধিতা কৰি ইয়াক “দুষ্টামিৰে ভৰা” বুলি আখ্যা দিয়ে। তেওঁ কয় যে কিছুমান মানুহৰ সকলো কথাতেই সমস্যা থাকে আৰু ন্যায়ালয় কোনো ৰাজনৈতিক মঞ্চ নহয় য’ত তেওঁলোকে তদন্তৰ বাবে নিজৰ পছন্দৰ ন্যায়াধীশৰ নাম প্ৰস্তাৱ কৰিব পাৰে।
এই কথাত মুখ্য ন্যায়াধীশগৰাকীয়েও অসন্তুষ্টি প্ৰকাশ কৰি কয় যে আৱেদনত ন্যায়াধীশৰ নাম উল্লেখ কৰাটো তেওঁলোকে সমৰ্থন নকৰে। তেতিয়া অধিবক্তা শংকৰনাৰায়ণন আৰু প্ৰশান্ত ভূষণে স্পষ্ট কৰি দিয়ে যে তেওঁলোকে কোনো নাম উল্লেখ কৰা নাই আৰু কেৱল আৱেদনখন তালিকাভুক্ত কৰিবলৈহে অনুৰোধ জনাইছে। তেতিয়া মুখ্য ন্যায়াধীশে স্পষ্ট কৰি দিয়ে যে সমিতিৰ সদস্যসকলে উচ্চতম ন্যায়ালয়ৰ নিৰীক্ষণতেই কাম কৰিব। ন্যায়ালয়ে এতিয়াও গোচৰটো সামৰণি মৰা নাই, গতিকে সকলোৱে সমিতিক সহায় কৰা উচিত আৰু তেওঁলোকক নিজৰ কাম কৰিবলৈ দিয়া উচিত বুলি মুখ্য ন্যায়াধীশে মন্তব্য কৰে।
