নতুন দিল্লীৰ স্বৰূপ নগৰ এলেকাত অৱস্থিত এটা গুদামত দেওবাৰে এক ভয়াবহ অগ্নিকাণ্ড সংঘটিত হয়। দ্ৰুতগতিকৈ বিয়পি পৰা এই জুইৰ ফলত গুদামটোত কমেও দুজন লোকৰ মৃত্যু হোৱা বুলি জানিব পৰা গৈছে। জুই লগাৰ কাৰণ বৰ্তমানলৈকে জানিব পৰা হোৱা নাই যদিও পৰিস্থিতি নিয়ন্ত্ৰণৰ বাবে অগ্নিনিৰ্বাপক বাহিনীৰ ১৫খন বাহনে অহৰহ প্ৰচেষ্টা অব্যাহত ৰাখিছে।
প্ৰাপ্ত তথ্য অনুসৰি, ৰবিবাৰে দিনৰ ভাগত গুদামটোৰ পৰা জুইৰ সূত্ৰপাত হোৱা প্ৰত্যক্ষ কৰি স্থানীয় লোকসকলে প্ৰথম অৱস্থাত নিজাববীয়াকৈ জুই নিৰ্বাপনৰ বাবে চেষ্টা চলায়। পৰৱৰ্তী সময়ত অগ্নিনিৰ্বাপক বাহিনীক খবৰ দিয়াৰ লগে লগে কেইবাখনো বাহন ঘটনাস্থলীত উপস্থিত হয়। সময় বাগৰাৰ লগে লগে জুইৰ প্ৰকোপ বৃদ্ধি পোৱাত অগ্নিনিৰ্বাপক বাহিনীৰ বাহনৰ সংখ্যাও বৃদ্ধি কৰা হয়। সামাজিক মাধ্যমত বিয়পি পৰা কেইবাটাও ভিডিঅ’ত সমগ্ৰ অঞ্চলটো ক’লা ধোঁৱাৰে আৱৰি ধৰা দেখা গৈছে। অঞ্চলটো যথেষ্ট ঘন বসতিপূৰ্ণ হোৱাৰ বাবে জুই কাষৰীয়া বাসগৃহলৈ দ্ৰুতগতিকৈ সম্প্ৰসাৰিত হোৱাৰ তীব্ৰ আশংকা কৰা হৈছে।
উল্লেখ্য যে, কেইদিনমান পূৰ্বে দিল্লীৰ সত্য নিকেতন এলেকাত এটা আৱাসিক ভৱন খহি পৰাৰ ফলত সাতজন লোকৰ মৃত্যু হৈছিল। উক্ত ভৱনটোত শিক্ষাৰ্থীসকলে পেয়িং গেষ্ট হিচাপে বসবাস কৰিছিল। এই শোকাৱহ ঘটনাৰ পাছৰে পৰা দিল্লী পৌৰ নিগমে সমগ্ৰ দিল্লীজুৰি অবৈধ নিৰ্মাণ কাৰ্য ভঙাৰ ক্ষেত্ৰত কঠোৰ পদক্ষেপ গ্ৰহণ কৰিছে। এই সন্দৰ্ভত মুখ্যমন্ত্ৰী ৰেখা গুপ্তায়ো কঠোৰ নিৰ্দেশনা প্ৰদান কৰিছিল। সত্য নিকেতনৰ ঘটনাৰ শোক মাৰ নৌযাওঁতেই ৰাজধানী চহৰখনত পুনৰ গুদামৰ অগ্নিকাণ্ডত প্ৰাণহানি হোৱা ঘটনাই চাঞ্চল্যৰ সৃষ্টি কৰিছে।
বৰ্তমান ঘটনাস্থলীত অগ্নিনিৰ্বাপক বাহিনীয়ে জুই সম্পূৰ্ণৰূপে নিয়ন্ত্ৰণলৈ অনাৰ বাবে অভিযান অব্যাহত ৰাখিছে। পৰিস্থিতি নিয়ন্ত্ৰণলৈ অহাৰ পাছত প্ৰশাসন আৰু আৰক্ষীয়ে অগ্নিকাণ্ডৰ প্ৰকৃত কাৰণ তথা ক্ষয়-ক্ষতিৰ পৰিমাণ নিৰ্ধাৰণ কৰিবলৈ পৰৱৰ্তী অনুসন্ধান প্ৰক্ৰিয়া আৰম্ভ কৰাৰ সম্ভাৱনা আছে।
