মহামাৰী ক’ৰ’না ভাইৰাছৰ আৱিৰ্ভাৱৰ পৰা শুনিবলৈ পাই থকা ‘সামাজিক দূৰত্ব’ শব্দটোক লৈ তীব্ৰ চৰ্চা হৈছে ৰাজ্যসভাৰ মজিয়াত।
বৰ্ষাকালীন অধিৱেশনৰ দ্বিতীয় দিনা আজি ৰাজ্যসভাৰ এগৰাকী তৃণমূল কংগ্ৰেছৰ সাংসদে সামাজিক দূৰত্ব শব্দটোৰ বিপৰীতে ‘শাৰিৰীক দূৰত্ব’ শব্দটোৰ ব্যৱহাৰ কৰাৰ মতপোষণ কৰে।
এই কথা উত্থাপন কৰাৰ পিছতে ৰাজ্যসভাৰ অধ্যক্ষ তথা উপ-ৰাষ্ট্ৰপতি ভেংকায়া নায়ডুৱে এয়া এক গুৰুত্বপূৰ্ণ পৰামৰ্শ বুলি কয়।
তেওঁ লগতে ‘সুৰক্ষিত দূৰত্ব’ বুলি কোৱাটোও উচিত হ’ব বুলি মন্তব্য কৰে।
তৃণমূল কংগ্ৰেছৰ সাংসদ ড০ শান্তনু সেনে এই বিষয়টো উত্থাপন কৰি কয়, ‘সামাজিক দূৰত্ব কোৱাটো একপ্ৰকাৰ সামাজিক কলংকৰ দৰে অনুভৱ হয়। ইয়াৰ আৰু প্ৰতিকূল অৰ্থ আছে যেনে সামাজিক বহিস্কাৰ আদি’।
সেনে লগতে কয়, ‘মহামাৰী ক’ভিড-১৯ কেতিয়ালৈকে থাকে ক’ব পৰা নাযাব। সেয়ে ক’ভিড-১৯ক কেন্দ্ৰ কৰি সামাজিক দূৰত্ব শব্দটোৰ ব্যৱহাৰ কৰা মুঠেও ঠিক নহয়’।
উল্লেখ্য যে ৰাজ্যসভাৰ অধ্যক্ষ নায়ডুৱে সেনৰ এই পৰামৰ্শ গুৰুত্বপূৰ্ণ বুলি মন্তব্য কৰে।