বৃহস্পতিবাৰে অৰ্থাৎ ২২ নৱেম্বৰৰ সন্ধিয়া শিৱসাগৰৰ ডিমৌত সংঘটিত আই ই ডি বিস্ফোৰণৰ ঘটনাৰ লগত জড়িতৰ সন্দেহত ডিমৌ আৰক্ষীয়ে আজি ৮ জন লোকক আটক কৰিছে।
উল্লেখযোগ্য যে বৃহস্পতিবাৰে সন্ধিয়া ডিমৌত সংঘটিত বিস্ফোৰণৰ পিছতে মুখ্য মন্ত্ৰী সৰ্বানন্দ সোণোৱালে ডিজিপি কুল শইকীয়াক ঘটনাৰ ক্ষীপ্ৰ তদন্ত কৰাৰ নিৰ্দেশ দিছিল।
ফলত ঘটনা সন্দৰ্ভত ডিমৌ আৰক্ষীয়ে ক্ষীপ্ৰতাৰে তদন্ত কৰি আজি বিস্ফোৰণৰ ঘটনাৰ লগত জড়িতৰ সন্দেহত ৮ জন লোকক আটক কৰে। আটকাধীন লোক কেইজন ক্ৰমে প্ৰভাত সোণোৱাল, জীয়াউল হুছেইন, নিতুল হাজৰিকা, কিশোৰ পেটেল, পংকজ বৰা. বেদান্ত নাথ, ডিমাপুৰৰ টাংভিউ আৰু ইজ্জাল বুলি জানিব পৰা গৈছে।
আটকাধীন আটাইকেইজনকে সম্প্ৰতি ডিমৌ আৰক্ষী থানাত শীৰ্ষ আৰক্ষী বিষয়াই মাৰথান জেৰা অব্যাহত ৰাখিছে বুলি আৰক্ষীৰ সূত্ৰৰ পৰা জানিব পৰা গৈছে।
আনহাতে কালিৰ ঘটনাত নিহত কমল আগৰৱালা আৰু অনুপ গুপ্তাৰ পৰিয়ালৰ নিকটআত্মীয়ক সাক্ষাৎ কৰে শিৱসাগৰ জিলা উপায়ুক্ত পল্লৱ গোপাল ঝাই।
ইফালে নিহতসকলৰ পৰিয়ালক অসম চৰকাৰৰ হৈ থাওৰা বিধানসভা সমষ্টিৰ বিধায়ক কুশল দুৱৰীয়ে ৫ লাখ টকাকৈ এককালীন সাহায্য প্ৰদান কৰে।
কালিৰ বিস্ফোৰণৰ ঘটনাৰ পিছতে বৰ্তমান জিলাখনত নিৰাপত্তা ব্যৱস্থা কটকটীয়া কৰি তোলা হৈছে। জিলা প্ৰশাসনে নিৰাপত্তাৰ দিশটো গভীৰভাৱে পৰ্য্যলোচনা কৰাৰ লগতে আৰক্ষী আৰু অন্যান্য নিৰাপত্তা সংস্থাসমূহৰ লগত ঘটনাৰ তদন্ত তীব্ৰতৰ কৰি তুলিছে।
তাৰোপৰি শিৱসাগৰ জিলাৰ লগত সংলগ্ন অসম অৰুণাচল আৰু অসম নাগালেণ্ড সীমান্তত নিৰাপত্তা কটকটীয়া কৰাৰ লগতে তীব্ৰ অভিযান চলোৱা হৈছে।