ইউৰো ২০২১ৰ সেই কৰুণ দৃশ্য এতিয়াও ফুটবল অনুৰাগীৰ স্মৃতিত সতেজ হৈ আছে। পাঁচ বছৰৰ পাছত সেই পুৰণি আতংক ঘূৰি আহিল। পুনৰ চেতনা হেৰুৱাই খেলপথাৰত ঢলি পৰে ক্রিষ্টিয়ান এৰিক্সন। দেওবাৰে ইউক্ৰেইনৰ বিৰুদ্ধে আন্তঃৰাষ্ট্ৰীয় প্ৰীতি মেচত ডেনিছ মিডফিল্ডাৰগৰাকী হঠাতে বুকুত হাত থৈ মাটিত পৰি যায়। লগে লগে ৰেফাৰীয়ে খেল বন্ধ কৰাৰ সিদ্ধান্ত লয়। পিছত খেলখন পৰিত্যাগ কৰা হয়।
খেলৰ ৭৯ মিনিটত সংঘটিত হয় এই ঘটনা। সেই সময়ত ডেনমাৰ্কে ২-১ গ’লত আগবাঢ়ি আছিল। তেনে সময়তে এৰিক্সনে হঠাতে বুকুত হাত থৈ মাটিত ঢলি পৰে। পৰিস্থিতিৰ গুৰুত্ব উপলব্ধি কৰি সতীৰ্থ, প্ৰতিদ্বন্দ্বী আৰু মেচৰ বিষয়াসকলে ততাতয়াকৈ চিকিৎসকক মাতি পঠালে। কেইছেকেণ্ডমানৰ ভিতৰতে খেলপথাৰত উপস্থিত হ’ল চিকিৎসা দলটো। পিছত এৰিক্সনক চিকিৎসালয়লৈ লৈ যোৱা হয়।
এই কাণ্ডৰ লগে লগে ডেনিছ ফুটবল এছ’চিয়েশ্যনে ছ’চিয়েল মিডিয়াত পোষ্ট কৰি কয় যে, “ক্ৰিষ্টিয়ান এৰিক্সন সচেতন অৱস্থাত আছে আৰু সুস্থ হৈ আছে।” পিছত গম পোৱা গ’ল যে এৰিক্সনে কিছু সময়ৰ বাবে চেতনা হেৰুৱাইছিল যদিও সোনকালে চেতনা ঘূৰাই পাইছিল। চিকিৎসাৰ অন্তত তেওঁ নিজেই খেলপথাৰৰ পৰা ওলাই আহিল। বিতং পৰীক্ষাৰ বাবে তেওঁক চিকিৎসালয়লৈ লৈ যোৱা হয়।
ডেনমাৰ্কৰ অধিনায়ক পিয়েৰ-এমিল হ’বজাৰ্গে ডেনিছ সম্প্ৰচাৰক টিভি২ক কয় যে, “এটা থ্ৰ’-ইন হৈছিল। মই চাৰিওফালে চালোঁ আৰু দেখিলোঁ যে খ্ৰীষ্টিয়ান মাটিত পৰি গৈছে। সকলোৱে অতি দ্ৰুত আৰু দায়িত্বশীল আচৰণ দেখুৱালে। খেলপথাৰত তেওঁক চোৱা-চিতা কৰাসকলৰ সাহসক প্ৰশংসা কৰিবই লাগিব। আটাইতকৈ গুৰুত্বপূৰ্ণ কথাটো হ’ল খ্ৰীষ্টিয়ান ভালেই আছে।”
এই ঘটনা পোহৰলৈ অহাৰ লগে লগে পুনৰ ঘুৰি আহিল ইউৰো ২০২১ৰ স্মৃতি। কোপেনহেগেনত ফিনলেণ্ডৰ বিৰুদ্ধে খেলৰ সময়ত হাৰ্ট এটেকত আক্ৰান্ত হৈ খেলপথাৰত ঢলি পৰিছিল এৰিক্সন। খেলপথাৰতে দিয়া হৈছিল চিপিআৰ। অটোমেটিক ডিফিব্ৰিলেটৰ ব্যৱহাৰৰ ফলত তেওঁৰ হৃদস্পন্দন পুনৰ ঘূৰি আহিছিল। পিছত খবৰ পোৱা যায় যে চিকিৎসকৰ ক্ষীপ্ৰ পদক্ষেপেই এৰিক্সনৰ জীৱন ৰক্ষা কৰে।
এই ঘটনাৰ পিছতে ডেনিছ তাৰকাগৰাকীৰ শৰীৰত এটা বিশেষ ধৰণৰ ইমপ্লাণ্টেবল কাৰ্ডওভৰ্টাৰ-ডিফিব্ৰিলেটৰ স্থাপন কৰা হয়। বহুতে ভাবিছিল যে তেওঁৰ ফুটবল কেৰিয়াৰ শেষ হৈ গৈছে। কিন্তু এৰিক্সনে নিজৰ ধাৰণা ভুল প্ৰমাণ কৰি ২০২২ চনত ব্ৰেণ্টফোৰ্ডলৈ উভতি আহে। পিছলৈ তেওঁ মানচেষ্টাৰ ইউনাইটেডত যোগদান কৰে। বৰ্তমান তেওঁ জাৰ্মান ক্লাব উলফছবাৰ্গৰ অন্যতম খেলুৱৈ।
২০২৬ চনৰ বিশ্বকাপত ডেনমাৰ্ক বা ইউক্ৰেইনৰ কোনোৱেই স্থান লাভ কৰা নাছিল। সেইবাবেই ভৱিষ্যতৰ আন্তঃৰাষ্ট্ৰীয় সূচীৰ প্ৰস্তুতিৰ বাবে এই মেচখন গুৰুত্বপূৰ্ণ আছিল। কিন্তু শেষত ফলাফলতকৈ ফুটবলাৰ এজনৰ শাৰীৰিক অৱস্থা অধিক গুৰুত্বপূৰ্ণ হৈ পৰিল।
ডেনমাৰ্কৰ দলটোৰ চিকিৎসক মৰ্টেন ব’চেনে কয়, ‘পেচমেকাৰে সঠিকভাৱে কাম কৰি আছে। কিছুসময়ৰ বাবে চেতনা নোহোৱা হৈছিল যদিও অতি সোনকালে তেওঁৰ চেতনা ঘূৰি আহিল। এতিয়া চিকিৎসালয়ত তেওঁক পৰীক্ষা কৰি চোৱা যাব এই ঘটনাৰ সঠিক কাৰণ। তেওঁৰ লগতে চিকিৎসকৰ সৈতে আমি নিয়মীয়াকৈ যোগাযোগত আছো। খ্ৰীষ্টিয়ানে মোক তেওঁ ভালেই আছে বুলি গোটেই দলটোক জনাবলৈ কৈছিল।’
খেলখন বাতিল হোৱাৰ পাছত দুয়োটা দলৰ খেলুৱৈ আৰু প্ৰশিক্ষক কৰ্মচাৰীয়ে খেলপথাৰৰ মাজত সমবেত হয়। ডেনমাৰ্কৰ প্ৰশিক্ষক ব্রায়ান ৰিমাৰে মন্তব্য কৰে যে, ‘আটাইতকৈ গুৰুত্বপূৰ্ণ কথাটো হ’ল খ্ৰীষ্টিয়ান ভালেই আছে। তেওঁ খেলপথাৰ এৰি গোটেই দলটোক শুভেচ্ছা জনাইছে। এতিয়া একেলগে থকাৰ সময়। যাতে সকলোৱে প্ৰয়োজন হ’লে কাৰোবাৰ কান্ধত মূৰ থব পাৰে।’
