উজনি অসমৰ শেহতীয়া ভয়ংকৰ বানপানীক মানৱ-সৃষ্ট দুৰ্যোগ বুলি অভিযোগ উত্থাপন কৰি গুৱাহাটী উচ্চ ন্যায়ালয়ত জনস্বাৰ্থজড়িত আবেদন দাখিল কৰিছে প্ৰাক্তন বিধায়ক তথা অসম প্ৰদেশ কংগ্ৰেছ কমিটীৰ জ্যেষ্ঠ নেতা দেৱব্ৰত শইকীয়াই। আবেদনখন শুনানিৰ বাবে গ্ৰহণ কৰি গুৱাহাটী উচ্চ ন্যায়ালয়ে অহা ৩ ছেপ্টেম্বৰৰ ভিতৰত ৰাজ্য চৰকাৰক উত্তৰ দাখিল কৰিবলৈ নিৰ্দেশ দিছে।
আবেদনখনত শইকীয়াই অভিযোগ কৰে যে শিৱসাগৰ, চৰাইদেউ আৰু যোৰহাট জিলাত শেহতীয়াকৈ সৃষ্টি হোৱা অভূতপূৰ্ব বানপানী কেৱল প্ৰাকৃতিক দুৰ্যোগ নহয়। তেওঁৰ দাবী অনুসৰি, দিখৌ নদী আৰু ইয়াৰ উপনৈসমূহত চলি থকা অবাধ অবৈধ খনন আৰু চৰকাৰী গাফিলতিয়ে এই বিপৰ্যয় অধিক ভয়ংকৰ কৰি তুলিছে।
দীৰ্ঘদিন ধৰি অবৈধ খননৰ বিৰুদ্ধে সকীয়াই অহাৰ পাছতো চৰকাৰে কোনো ফলপ্ৰসূ ব্যৱস্থা গ্ৰহণ নকৰাৰ অভিযোগ উত্থাপন কৰি শইকীয়াই কয় যে খনন মাফিয়াক সুৰক্ষা দিয়াৰ ফলত সাধাৰণ ৰাইজে ভয়ংকৰ পৰিণতি ভোগ কৰিবলগীয়া হৈছে।
আবেদনখনত দিখৌ আৰু ইয়াৰ উপনৈসমূহত সকলো ধৰণৰ অবৈধ খনন তাৎক্ষণিকভাৱে আৰু স্থায়ীভাৱে বন্ধ কৰাৰ দাবী জনোৱা হৈছে। লগতে উচ্চ ন্যায়ালয়ৰ পূৰ্বৰ নিৰ্দেশ অনুসৰি শীঘ্ৰে এক ‘মাইনিং টাস্ক ফ’ৰ্চ বেটেলিয়ন’ গঠনৰ দাবীও উত্থাপন কৰা হৈছে।
ইয়াৰ উপৰিও বান পৰিস্থিতিৰ সামগ্ৰিক কাৰণ আৰু দায়বদ্ধতা নিৰ্ধাৰণৰ বাবে এগৰাকী অৱসৰপ্ৰাপ্ত ন্যায়াধীশৰ নেতৃত্বত উচ্চ ক্ষমতাসম্পন্ন তদন্ত সমিতি গঠন, বান্ধৰ পানী এৰা সন্দৰ্ভত স্পষ্ট বৈজ্ঞানিক নীতি বা প্ৰট’কল প্ৰস্তুত আৰু ঘটনাটোৰ বাবে দায়ী চৰকাৰী বিষয়া তথা আন ব্যক্তিৰ বিৰুদ্ধে ফৌজদাৰী গোচৰ ৰুজুৰ দাবী কৰা হৈছে।
বানাক্ৰান্ত লোকসকলৰ ক্ষতিপূৰণৰ বিষয়টোও আবেদনখনত গুৰুত্বসহকাৰে উত্থাপন কৰা হৈছে। নামমাত্ৰ সাহায্যৰ পৰিৱৰ্তে হিমাচল প্ৰদেশৰ আৰ্হিত সৰ্বস্বান্ত হোৱা প্ৰতিটো পৰিয়ালক ন্যূনতম ১০ লাখ টকাকৈ ক্ষতিপূৰণ দিয়াৰ দাবী জনাইছে শইকীয়াই।
আবেদনখন আদালতে শুনানিৰ বাবে গ্ৰহণ কৰাৰ পাছত শইকীয়াই কয় যে ৰাইজৰ জীৱন-সম্পত্তি সুৰক্ষা আৰু অসমৰ ভৱিষ্যৎ সুৰক্ষিত কৰাৰ স্বাৰ্থত এই ন্যায়ৰ যুঁজ অব্যাহত থাকিব।
