মুম্বাই ইণ্ডিয়ানছে ইণ্ডিয়ান প্ৰিমিয়াৰ লীগ অৰ্থাৎ আই পি এল ২০২৬ ৰ প্লে অফৰ পৰা বাহিৰ হোৱাৰ পিছতেই দলৰ অধিনায়ক হাৰ্দিক পাণ্ডিয়াৰ ভৱিষ্যতক লৈ তীব্ৰ চৰ্চা আৰম্ভ হৈছে। অনুৰাগীসকলে লক্ষ্য কৰা অনুসৰি অলৰাউণ্ডাৰগৰাকীয়ে ইনষ্টাগ্ৰামত ফ্ৰেঞ্চাইজিক আনফলো কৰিছিল। এই খবৰটো ছচিয়েল মিডিয়াত মুহূৰ্তৰ ভিতৰতে বিয়পি পৰে আৰু বহুতেই ইয়াক মুম্বাইৰ এইবাৰৰ হতাশাজনক প্ৰদৰ্শন আৰু দলৰ সৈতে হাৰ্দিকৰ সম্পৰ্কৰ অৱনতিৰ লগত সাঙুৰিছে।
যোৱা ১০ মে’ তাৰিখে ৰায়পুৰত ৰয়েল চেলেঞ্জাৰ্ছ বেংগালুৰুৰ হাতত পৰাস্ত হোৱাৰ লগে লগে মুম্বাই ইণ্ডিয়ানছ আনুষ্ঠানিকভাৱে প্লে অফৰ দৌৰৰ পৰা বাহিৰ হয়। এই খেলখনৰ পিছতে ইনষ্টাগ্ৰামত হাৰ্দিকৰ প্ৰফাইলত মাত্ৰ ১৫০ টা একাউণ্ট ফ’ল’ কৰা দেখুওৱা হৈছিল, য’ত মুম্বাই ইণ্ডিয়ানছৰ নাম নাছিল। কিন্তু মাত্ৰ কেইমিনিটমানৰ পিছতে অনুৰাগীসকলে পুনৰ লক্ষ্য কৰে যে সেই সংখ্যা ১৫১ লৈ সলনি হৈছে আৰু ফ’ল’ কৰা একাউণ্টৰ তালিকাত মুম্বাই ইণ্ডিয়ানছৰ নাম পুনৰ ওলাইছে।
সামাজিক মাধ্যমত হোৱা এই সৰু পৰিৱৰ্তনেই গুজৱ বিয়পাবলৈ যথেষ্ট আছিল। ২০২৪ চনৰ আই পি এলৰ পূৰ্বে হাৰ্দিকক পুনৰ মুম্বাই ইণ্ডিয়ানছলৈ ঘূৰাই অনা আৰু অধিনায়ক হিচাপে নিযুক্তি দিয়া কাৰ্যই মুম্বাইৰ অনুৰাগীসকলক দুভাগত বিভক্ত কৰিছিল। সেয়েহে দলটোৰ যিকোনো বেয়া সময় বা অধিনায়কজনক লৈ এতিয়া তীব্ৰ চৰ্চা হয়। অৱশ্যে প্ৰকৃততে হাৰ্দিকে ভুলতে আনফলো কৰিছিল, নে কোনো কাৰিকৰী বিজুতি আছিল, নে পৰাজয়ৰ হতাশাত তেনে কৰিছিল, সেয়া এতিয়াও ৰহস্য হৈয়ে আছে। এই সন্দৰ্ভত হাৰ্দিক পাণ্ডিয়া বা মুম্বাই ইণ্ডিয়ানছে কোনো আনুষ্ঠানিক মন্তব্য প্ৰকাশ কৰা নাই।
এইবাৰৰ আই পি এল হাৰ্দিক আৰু মুম্বাই ইণ্ডিয়ানছ দুয়ো পক্ষৰ বাবেই অতি কঠিন আছিল। হাৰ্দিকে এই ছিজনৰ আঠখন মেচত মাত্ৰ ১৪৬ ৰান সংগ্ৰহ কৰাৰ লগতে চাৰিটা উইকেটহে দখল কৰিবলৈ সক্ষম হয়। ইয়াৰ উপৰিও পিঠিৰ বিষৰ বাবে তেওঁ মুঠ তিনিখন মেচ খেলিবলৈ সক্ষম নহ’ল। লখনৌ ছুপাৰ জায়ান্টছ আৰু বেংগালুৰুৰ বিৰুদ্ধে মেচত হাৰ্দিকৰ অনুপস্থিতিত সূৰ্যকুমাৰ যাদৱে দলৰ অধিনায়কৰ দায়িত্ব পালন কৰে।
ইমান হতাশাজনক প্ৰদৰ্শনৰ পিছতো শেহতীয়া খবৰ অনুসৰি মুম্বাই ইণ্ডিয়ানছৰ মেনেজমেন্টে এতিয়াও হাৰ্দিকক অধিনায়ক হিচাপে সমৰ্থন কৰিছে। ফ্ৰেঞ্চাইজিয়ে টি-২০ ক্ৰিকেটৰ সলনি হোৱা শৈলীৰ লগত খাপ খাব নোৱাৰাটোকহে ব্যৰ্থতাৰ মূল কাৰণ হিচাপে ধৰিছে। তথাপিও একেৰাহে আগতীয়াকৈ বিদায় লোৱা আৰু এই শেহতীয়া ইনষ্টাগ্ৰামৰ ঘটনাবোৰে হাৰ্দিকৰ ভৱিষ্যতক লৈ প্ৰশ্নবোধক চিহ্ন আঁকি দিছে।
