ডিগবৈৰ পোৱাই অঞ্চলত সংঘটিত হৈছে এক অতি জঘন্য হত্যাকাণ্ড। এই হত্যাকাণ্ডই সমগ্ৰ ৰাজ্যজুৰি তীব্ৰ চাঞ্চল্যৰ সৃষ্টি কৰিছে।
জানিব পৰা মতে পোৱাই চেন্টাৰৰ বাসিন্দা আকাশ তিৱাৰী আৰু আকাশ সিঙৰ মাজত সামান্য কথাতে এক তৰ্কযুদ্ধৰ সৃষ্টি হৈছিল। এই সাধাৰণ কাজিয়াখনেই পিছলৈ এক বিভীষিকাময় ৰূপ ধাৰণ কৰে।
প্ৰত্যক্ষদৰ্শীৰ ভাষ্য অনুসৰি খঙৰ ভমকত আকাশ সিঙে ঘটনাস্থলী ত্যাগ কৰি কিছু সময়ৰ পিছতে এখন ট্ৰাক লৈ উভতি আহে আৰু আকাশ তিৱাৰীক লক্ষ্য কৰি খুন্দা মাৰে।
অভিযুক্ত আকাশ সিঙে ট্ৰাকখনেৰে আকাশ তিৱাৰীক এবাৰ নহয় বৰঞ্চ কেইবাবাৰো গাড়ীখন পিছুৱাই আনি খুন্দিওৱাৰ অভিযোগ উত্থাপন হৈছে। ট্ৰাকৰ চকাৰ তলত পিষ্ট হৈ আকাশ তিৱাৰীৰ থিতাতে মৃত্যু হয়।
এই পাশৱিক কাণ্ডৰ পিছতে সমগ্ৰ অঞ্চলটোত এক আতংকময় পৰিৱেশৰ সৃষ্টি হয়। ইফালে ঘটনা সংঘটিত কৰাৰ পিছত অভিযুক্ত যুৱকজনে মাৰ্ঘেৰিটা আৰক্ষী থানাত গৈ আত্মসমৰ্পণ কৰে। পাছত ডিগবৈ আৰক্ষীয়ে তেওঁক নিজৰ জিম্মাত লৈ সমগ্ৰ ঘটনাৰ তদন্ত আৰম্ভ কৰিছে। এয়া পূৰ্বপৰিকল্পিত নে মুহূৰ্তৰ খঙৰ পৰিণতি সেই বিষয়ে আৰক্ষীয়ে অনুসন্ধান চলাই আছে।
এই নিৰ্মম হত্যাকাণ্ডৰ খবৰ বিয়পি পৰাৰ লগে লগে অঞ্চলটোত এক উত্তপ্ত পৰিস্থিতিৰ সৃষ্টি হয়। তিনিচুকীয়াত মৰণোত্তৰ পৰীক্ষা সম্পন্ন কৰাৰ পিছত উত্তেজিত স্থানীয় ৰাইজে ৰাষ্ট্ৰীয় ঘাইপথ অৱৰোধ কৰি তীব্ৰ প্ৰতিবাদ সাব্যস্ত কৰে। হত্যাকাৰীক কঠোৰ শাস্তি দিয়াৰ দাবীত প্ৰতিবাদকাৰীসকলে অভিযুক্তৰ বাসগৃহ ঘেৰাও কৰে।
ইয়াৰ মাজতে উত্তেজিত লোকে অভিযুক্তৰ ঘৰৰ সমীপত থকা এখন অটো-ৰিক্সা আৰু এখন ৰঙা মাৰুতি ছুইফট গাড়ীত অগ্নিসংযোগ কৰে। বৰ্তমান অঞ্চলটোত পৰিস্থিতি নিয়ন্ত্ৰণ কৰিবলৈ বৃহৎ সংখ্যক আৰক্ষী মোতায়েন কৰা হৈছে আৰু ঘটনাটোৰ ওপৰত আৰক্ষীয়ে তীক্ষ্ণ নজৰ ৰাখিছে।
