চুবুৰীয়া ৰাজ্য নগালেণ্ডৰ উজান অংশত সংঘটিত এক ভূমিস্খলনৰ ফলত দিখৌ নদীৰ জলপ্ৰবাহ বাধাগ্ৰস্ত হোৱাৰ খবৰ পোহৰলৈ অহাৰ পাছতেই শিৱসাগৰ জিলা প্ৰশাসনে বুধবাৰে সমগ্ৰ জিলাখনত সতৰ্কতা জাৰি কৰিছে। নগালেণ্ডৰ লংলেঙৰ জিলা আয়ুক্তৰ এক শ্ৰব্য বাৰ্তাৰ ভিত্তিত প্ৰকাশ পোৱা তথ্য অনুসৰি, মককচুঙৰ অন্তৰ্গত ইয়ংইমছেন আৰু লংলেঙৰ অন্তৰ্গত ইয়ংছেইৰ মাজৰ দিখৌ নদীৰ উজানত হোৱা এই ভূমিস্খলনৰ ফলত নদীখনৰ জলপ্ৰবাহৰ প্ৰায় আশী শতাংশ অংশ বন্ধ হৈ পৰিছে। এই স্পৰ্শকাতৰ খবৰ লাভ কৰাৰ পাছতেই শিৱসাগৰ জিলা প্ৰশাসনে জৰুৰীকালীন অৱস্থাৰ বাবে সাজু থকাৰ লগতে নামনি অংশৰ নদীকূলীয় গাঁওসমূহৰ ৰাইজক সতৰ্ক কৰি দিছে।
লংলেং জিলাৰ ইয়ংছেই গাঁৱৰ অধ্যক্ষগৰাকীয়ে দাখিল কৰা প্ৰতিবেদন অনুসৰি, ভূমিস্খলনৰ ফলত নদীখনত বৰ্তমান কেৱল বিশ শতাংশ পানীহে বৈ আছে। অৱশ্যে নামনি অংশৰ গাঁওসমূহত কৰা প্ৰাথমিক সোধ-পোচৰ পৰা জানিব পৰা গৈছে যে বৰ্তমানলৈকে পানীৰ প্ৰবাহ বা পানীৰ স্তৰ হ্ৰাস পোৱাৰ ক্ষেত্ৰত কোনো অস্বাভাৱিকতা পৰিলক্ষিত হোৱা নাই। ইয়াৰ সমান্তৰালভাৱে শিৱসাগৰৰ বিহুবৰত দিখৌ নদীৰ পানীৰ স্তৰ সম্পূৰ্ণ স্থিৰ অৱস্থাত আছে বুলি প্ৰশাসনে জানিবলৈ দিছে। সমগ্ৰ পৰিস্থিতিৰ সঠিক মূল্যায়নৰ বাবে বৃহস্পতিবাৰে পুৱা প্ৰশাসনৰ ফালৰ পৰা এক স্থলভিত্তিক পৰীক্ষণ চলোৱা হ’ব আৰু ইয়াৰ ভিত্তিত পৰৱৰ্তী তথ্য ৰাজহুৱা কৰা হ’ব বুলি জাননীখনত প্ৰকাশ কৰা হৈছে।
শিৱসাগৰ জিলা প্ৰশাসনে বৰ্তমান সমগ্ৰ পৰিস্থিতি তীক্ষ্ণ দৃষ্টিৰে নিৰীক্ষণ কৰি আছে আৰু নাগৰিকসকলৰ সুৰক্ষা নিশ্চিত কৰিবলৈ প্ৰয়োজনীয় সকলো সাৱধানতা অৱলম্বন কৰিছে। এই পৰিস্থিতিত প্ৰশাসনে ৰাইজক আতংকিত নহৈ চৰকাৰী নিৰ্দেশনাসমূহ মানি চলিবলৈ আৰু জৰুৰী প্ৰয়োজনীয় সামগ্ৰীসমূহ সাজু কৰি ৰাখিবলৈ আহ্বান জনাইছে। লগতে পৰিস্থিতিৰ শেহতীয়া খবৰৰ বাবে কেৱল চৰকাৰী মাধ্যমৰ ওপৰত নিৰ্ভৰ কৰিবলৈ আৰু জিলা প্ৰশাসন তথা স্থানীয় কৰ্তৃপক্ষৰ নিৰ্দেশনা পালন কৰিবলৈ অনুৰোধ কৰা হৈছে।
বৰ্তমান জিলা প্ৰশাসনে দিখৌ নদীৰ পানীৰ স্তৰ সঘনাই নিৰীক্ষণ কৰি নিয়মীয়া তথ্য সংগ্ৰহ অব্যাহত ৰাখিছে। নদীপৰীয়া অঞ্চলৰ ৰাইজে যদিহে পানীৰ স্তৰৰ ক্ষেত্ৰত কোনো অনাকাংক্ষিত বা অস্বাভাৱিক পৰিৱৰ্তন প্ৰত্যক্ষ কৰে, তেন্তে তৎকালীনভাৱে শিৱসাগৰ জিলা দুৰ্যোগ ব্যৱস্থাপনা প্ৰাধিকৰণৰ জৰুৰীকালীন পৰিচালনা কেন্দ্ৰক অৱগত কৰিবলৈ কোৱা হৈছে। এই উদ্দেশ্যে প্ৰশাসনে দুটা জৰুৰীকালীন যোগাযোগ নম্বৰ মুকলি কৰিছে, য’ত ৰাইজে ৮৪৭১৮-৬৪৩৫৫ ম’বাইল নম্বৰত বা ০৩৭৭২-১০৭৭ টোল ফ্ৰী নম্বৰত যোগাযোগ কৰি প্ৰশাসনক খবৰ দিব পাৰিব।
