ডিমা হাছাও স্বায়ত্তশাসিত পৰিষদৰ স্বাস্থ্য আৰু পৰিয়াল কল্যাণ বিভাগৰ কাৰ্যবাহী সদস্য (ই এম) ছেমুৱেল চাংছনৰ বুধবাৰে সন্ধিয়া গুৱাহাটীত দেহাৱসান ঘটে। জানিব পৰা মতে, ১ এপ্ৰিলৰ সন্ধিয়া প্ৰায় ৭.৪৫ বজাত গুৱাহাটীৰ এখন ব্যক্তিগত খণ্ডৰ চিকিৎসালয়ত চিকিৎসাধীন অৱস্থাত তেওঁ শেষ নিশ্বাস ত্যাগ কৰে। এগৰাকী সুদক্ষ ৰাজনীতিবিদ তথা পৰিষদৰ সক্ৰিয় সদস্যৰ এই অকাল বিয়োগত সমগ্ৰ পাহাৰীয়া জিলাখনতে গভীৰ শোকৰ ছাঁ পৰিছে।
বিগত কিছুদিন ধৰি অসুস্থ হৈ থকা জননেতাগৰাকী উন্নত চিকিৎসাৰ বাবে গুৱাহাটীত চিকিৎসাধীন হৈ আছিল। ডিমা হাছাও স্বায়ত্তশাসিত পৰিষদৰ এজন গুৰুত্বপূৰ্ণ সদস্য হিচাপে তেওঁ জিলাখনৰ স্বাস্থ্য আৰু পৰিয়াল কল্যাণ বিভাগৰ দায়িত্ব অতি নিষ্ঠাৰে পালন কৰিছিল। পৰিষদৰ শাসন ব্যৱস্থা আৰু জনস্বাস্থ্য প্ৰশাসনত তেওঁৰ বলিষ্ঠ নেতৃত্বৰ জৰিয়তে অঞ্চলটোৰ উন্নয়নলৈ যি অৱদান আগবঢ়াইছিল, সেয়া জিলাবাসীয়ে সদায় স্মৰণ কৰিব। তেওঁৰ অবিহনে জিলাখনত চলি থকা জনস্বাস্থ্য সম্পৰ্কীয় বিভিন্ন প্ৰকল্প আৰু উন্নয়নমূলক কাম-কাজত এক বৃহৎ শূন্যতাৰ সৃষ্টি হ‘ব বুলি সচেতন মহলে মত প্ৰকাশ কৰিছে।
প্ৰয়াত চাংছনৰ বিয়োগত বিভিন্ন ৰাজনৈতিক নেতা আৰু সতীৰ্থই গভীৰ শোক প্ৰকাশ কৰিছে। ডিমা হাছাও স্বায়ত্তশাসিত পৰিষদৰ মুখ্য কাৰ্যবাহী সদস্য (চি ই এম) দেবোলাল গাৰ্লোচাই তেওঁৰ মৃত্যুত শোক প্ৰকাশ কৰি পাহাৰীয়া জিলাখনৰ ৰাজহুৱা সেৱা আৰু পৰিষদলৈ আগবঢ়োৱা অৱদানৰ কথা শ্ৰদ্ধাৰে সুঁৱৰে। প্ৰাক্তন মন্ত্ৰী নন্দিতা গাৰ্লোচায়ো তেওঁৰ মৃত্যুক সমগ্ৰ অঞ্চলটোৰ বাবে এক অপূৰণীয় ক্ষতি বুলি অভিহিত কৰি শোকবাৰ্তা প্ৰেৰণ কৰে। ইয়াৰ উপৰি জিলা বিজেপিৰ সভাপতি ধৃতি থাউচেন, প্ৰাক্তন বিধায়ক সমৰজিৎ হাফলংবাৰ আৰু বিজেপিৰ প্ৰাৰ্থী ৰূপালী লাংথাচাকে ধৰি বহু গণ্য-মান্য ব্যক্তিয়ে তেওঁৰ বিয়োগত শোক প্ৰকাশ কৰাৰ লগতে শোকসন্তপ্ত পৰিয়ালবৰ্গলৈ গভীৰ সমবেদনা জ্ঞাপন কৰে।
