যোৰহাটত জিলাখনক যদিও ৰেড জ’ন ঘোষণা কৰা হৈছিল তৎসত্তেও দৈনিক বৃদ্ধি পাবলৈ লৈছে ক’ভিড আক্ৰান্তৰ সংখ্যা।
যোৱা কেইবাদিনো ধৰি গড়ে দুই শতাধিক লোক সংক্ৰমিত হোৱাৰ পৰিপ্ৰেক্ষিতত এতিয়া অধিক কঠোৰ হৈ পৰিছে যোৰহাট জিলা প্ৰশাসন।
উল্লেখযোগ্য সোমবাৰৰ পৰা দুদিনকৈ সম্পুৰ্ণ লকডাউন ঘোষণা কৰাৰ লগতে জিলাখনৰ হট স্পট ৰূপে পৰিগণিত হোৱা গ্রাম্যাঞ্চলসমূহত আৰক্ষী, চি আৰ পি এফ, এন ডি আৰ এফ বাহিনীৰ সহযোগত তহল দি সকলোকে ক’ভিড বিধি অৱলম্বন কৰিবলৈ আহ্বান জনোৱা হৈছে।
সেইদৰে, যোৰহাট-শিৱসাগৰ সীমাৱৰ্তী অঞ্চল জাঁজীত ৩৭ নং ৰাষ্ট্ৰীয় ঘাই পথৰ ওপৰত বিভিন্ন যান-বাহন ৰখাই সোধা পোচা অব্যাহত ৰাখিছে প্ৰশাসনৰ দলে।
উল্লেখ্য যে এটা সপ্তাহৰ বাবে অসমৰ সাতখনকৈ জিলা ৰেড জ’ন ঘোষণা কৰিছিল অসম চৰকাৰে য’ত যোৰহাট জিলাও অৰ্ন্তভূক্ত আছিল। বিগত পাঁচটা দিনে সংক্ৰমণৰ হাৰ কিছু কমিছে যদিও সাধাৰণ ৰাইজক বিশেষ সতৰ্কতা অৱলম্বন কৰাবলৈ এনে ব্যৱস্থা গ্ৰহণ কৰা হৈছে বুলি প্ৰশাসনে জানিবলৈ দিছে।