শিৱসাগৰত ব্যক্তিগত খণ্ডৰ চিকিৎসক তথা ফাৰ্মাচিষ্টসকলক ক’ভিড-১৯ পৰীক্ষাৰ ৰিপ’ৰ্ট নোহোৱাকৈ ক’ভিড-১৯-ৰ দৰৱ প্ৰদান বা বিক্ৰী নকৰিবলৈ আহ্বান জনাইছে উপায়ুক্তই।
শিৱসাগৰ জিলাৰ উপায়ুক্ত লক্ষীনন্দন গগৈৰ অধ্যক্ষতাত যোৱা ১০ অক্টোবৰ তাৰিখে উপায়ুক্ত কাৰ্যালয়ৰ চুকাফা সভাকক্ষত ব্যক্তিগত খণ্ডৰ চিকিৎসক তথা ফাৰ্মাচিষ্টসকলৰ সৈতে এখন সভা অনুষ্ঠিত হয়।
সভাত উপায়ুক্ত গৰাকীয়ে জিলাখনৰ ব্যক্তিগত খণ্ডৰ চিকিৎসক তথা ফাৰ্মাচিষ্টসকলক ক’ভিড-১৯ পৰীক্ষাৰ ৰিপৰ্ট নোহোৱাকৈ ক’ভিড-১৯ৰ দৰৱ প্ৰদান বা বিক্ৰী নকৰিবলৈ আহ্বান জনায়।
তেওঁ পৰীক্ষা নকৰাকৈ ক’ভিড-১৯ ৰোগৰ দৰৱ সেৱনৰ ভয়াৱহতা সম্পৰ্কে সংশ্লিষ্ট সকলোকে গ্ৰাহকসকলৰ মাজত সজাগতা বৃদ্ধি কৰিবলৈ আগবাঢ়ি আহিবলৈ কয়।
উপায়ুক্ত গৰাকীয়ে আগন্তুক দুৰ্গা পূজা উদযাপনৰ আগেয়ে পূজা সমিতিসমূহৰ লগত জড়িত সকলোকে স্বাস্থ্য বিভাগৰ সহযোগত ক’ভিড-১৯ ৰ পৰীক্ষা কৰিবলৈ কয়। তেওঁ পূজা মণ্ডপৰ পাৰ্শ্বৱৰ্তী গ্ৰামীণ, নগৰ আৰু চাহ বাগিচা অঞ্চলৰ লোকসকলকো ক’ভিড-১৯ৰ পৰীক্ষা কৰিবলৈ স্বেচ্ছাই আগবাঢ়ি আহিবলৈ আহ্বান জনায়। তেওঁ কয় যে ক’ভিড-১৯ৰ বহুল পৰীক্ষণে এই ৰোগ প্ৰতিহত কৰাত সহায়ক হ’ব।
জিলা স্বাস্থ্য বিভাগৰ যুটীয়া সঞ্চালক ডাঃ স্যমন্ত মাধৱ শৰ্মাই সভাৰ উদ্দেশ্য ব্যাখ্যা কৰে। তেওঁ সভাত ক’ভিড-১৯ ৰোগৰ পৰীক্ষণৰ এক ব্যাপক কাৰ্যসূচী গ্ৰহণ কৰাৰ কথা উল্লেখ কৰে।
অহা ১২ৰ পৰা ১৪ অক্টোবৰ তাৰিখলৈ অনুষ্ঠিত হ’ব লগীয়া এই পৰীক্ষণ প্ৰক্ৰিয়াত পূজা সমিতি সমূহৰ বিষয়-ববীয়াসকলৰ লগতে, দোকানসমূহৰ মালিক তথা কৰ্মচাৰী, ব্যৱসায়িক বাহনৰ কৰ্মচাৰী, চাহ বাগিচাৰ শ্ৰমিক আৰু কন্টেইনমেণ্ট জ’নৰ আৱাসী সকলক স্বেচ্ছাই আগবাঢ়ি আহি ক’ভিড-১৯ পৰীক্ষা কৰিবলৈ আহ্বান জনায়।
তেওঁ লগতে পূজা মণ্ডপসমূহত সকলোকে সামাজিক দূৰত্ব বজাই ৰাখিবলৈ, মাস্ক পৰিধান কৰিবলৈ, চাবোনেৰে হাত ধুবলৈ আৰু হেণ্ড চেনিটাইজাৰ ব্যৱহাৰ কৰিবলৈ সোঁৱৰাই দিয়ে।
সভাত জিলা যক্ষ্মা ৰোগ বিষয়া ডাঃ উদয়াদিত্য ৰাজকোঁৱৰে পূজা সমিতিসমূহক পূজা মণ্ডপৰ ওচৰত ক’ভিড-১৯ ৰোগৰ বিৰুদ্ধে ল’বলগীয়া সাৱধানতাসমূহৰ লগত ধঁপাত সেৱন বিৰুদ্ধে হোৰ্ডিং বা বেনাৰ আৰি ৰাইজৰ মাজত সজাগতা বৃদ্ধি কৰিবলৈ আহ্বান জনায়।
সভাত অতিৰিক্ত উপায়ুক্ত বিদিত দাসৰ লগতে জিলাখনৰ চৰকাৰী আৰু ব্যক্তিগত খণ্ডৰ ভালেসংখ্যক চিকিৎসক আৰু ফাৰ্মাচিষ্ট উপস্থিত থাকে।
