বৰ্তমান সময়ত ট্ৰেণ্ড বা ফেশ্বনৰ সৈতে খোজ মিলাবলৈ গৈ বহলোকেই স্কিনি জিন্স বা অতি টান কাপোৰ পিন্ধিবলৈ পছন্দ কৰে। কিন্তু আপুনি জানেনে যে এই অতিৰিক্ত টান কাপোৰবোৰে আপোনাৰ শৰীৰৰ স্বাভাৱিক কাৰ্যকলাপত বাধাৰ সৃষ্টি কৰিব পাৰে? বিশেষকৈ কঁকাল, উৰু আৰু তলপেটত দীৰ্ঘদিন ধৰি চাপ পৰিলে ৰক্ত সঞ্চালন প্ৰক্ৰিয়া ব্যাহত হয়। বিভিন্ন চিকিৎসা বিজ্ঞানৰ অধ্যয়নত দেখা গৈছে যে দীৰ্ঘসময় ধৰি এনে কাপোৰ পিন্ধিলে ভৰিৰ টিংটিংনি, অজ্ঞানতা আৰু আনকি স্নায়ুজনিত সমস্যাই দেখা দিব পাৰে।
কেৱল স্বাস্থ্যই নহয়, অতি টান কাপোৰ ছালৰ বাবেও এক ডাঙৰ শত্ৰু হিচাপে পৰিগণিত হৈছে। চৰ্ম বিশেষজ্ঞসকলৰ মতে, ছালৰ সৈতে কাপোৰৰ ঘৰ্ষণ বেছি হ’লে ফোহা, ব্ৰণ আৰু খজুৱতিৰ দৰে সমস্যাই দেখা দিয়ে। বিশেষকৈ আমাৰ দৰে গৰম আৰু আৰ্দ্ৰ বতৰৰ ঠাইত শৰীৰৰ ঘাম ওলাই যাব নোৱাৰিলে ভেঁকুৰ বা ফাঙ্গাল ইনফেকচনৰ সম্ভাৱনা বহুগুণে বৃদ্ধি পায়। গৱেষণাৰ পৰা দেখা গৈছে যে যিসকল লোকে নিয়মিতভাৱে টান কৃত্ৰিম কাপোৰ পিন্ধে, তেওঁলোক ছালৰ সংক্ৰমণত সহজে আক্ৰান্ত হয়।
মহিলাসকলৰ ক্ষেত্ৰত টাইট কাপোৰ পিন্ধাটো অধিক বিপদজনক হ’ব পাৰে। স্ত্ৰীৰোগ বিশেষজ্ঞসকলৰ মতে, অত্যধিক টান জিন্স বা অন্তৰ্বাস পিন্ধিলে প্ৰস্ৰাৱ নলীৰ সংক্ৰমণ অৰ্থাৎ ইউ টি আই আৰু ঈষ্ট ইনফেকচনৰ আশংকা বাঢ়ি যায়। ইয়াৰ মূল কাৰণ হ’ল বায়ু চলাচলত হোৱা বাধা। ইয়াৰ উপৰিও গেষ্ট্ৰ’এণ্টেৰ’লজিষ্টসকলে সকীয়াই দিছে যে পেটত অত্যধিক চাপ পৰাৰ ফলত এচিড ৰিফ্লাক্স, গেছ আৰু বদহজমৰ দৰে সমস্যাই দেখা দিয়ে। বিশেষকৈ আহাৰ গ্ৰহণৰ পিছত টান কাপোৰ পিন্ধিলে এই সমস্যা অধিক জটিল হৈ পৰে।
কেৱল মহিলা বুলিয়েই নহয়, পুৰুষসকলো এই ক্ষেত্ৰত সাৱধান হোৱা প্ৰয়োজন। কিছুমান গৱেষণাৰ তথ্য অনুসৰি, দীৰ্ঘদিন ধৰি অতি টান জিন্স বা অন্তৰ্বাস ব্যৱহাৰ কৰিলে পুৰুষৰ প্ৰজনন ক্ষমতাৰ ওপৰত বিৰূপ প্ৰভাৱ পৰিব পাৰে। যদিও এই সন্দৰ্ভত অধিক গৱেষণাৰ প্ৰয়োজন আছে, তথাপিও চিকিৎসকে সতৰ্কতা অৱলম্বন কৰিবলৈ পৰামৰ্শ দিয়ে। গতিকে আধুনিক ফেশ্বনৰ নামত নিজৰ অমূল্য স্বাস্থ্যক সংকটত পেলোৱাৰ আগতে এবাৰ নিশ্চয়কৈ ভাবি চাব।
সুস্থ হৈ থাকিবলৈ চিকিৎসকে দিনটোৰ অধিকাংশ সময় ঢিলা আৰু আৰামদায়ক কাপোৰ পিন্ধিবলৈ পৰামৰ্শ দিয়ে। বিশেষকৈ কপাহী বা পাতল ৰঙৰ কাপোৰ গৰমৰ দিনত অধিক উপযোগী। যদি আপুনি দীৰ্ঘসময় বহি কাম কৰিবলগীয়া হয়, তেন্তে টাইট কাপোৰ পৰিহাৰ কৰাই মংগল। মনত ৰাখিব, সুস্থ শৰীৰ থাকিলেহে আপোনাক সকলো সাজপাৰতে ধুনীয়া দেখাব।
