আমেৰিকাৰ নৱনিৰ্বাচিত ৰাষ্ট্ৰপতি ৰিপাব্লিকান পাৰ্টিৰ ড’নাল্ড ট্ৰাম্পে ছুচি ৱাইলছক হোয়াইট হাউছৰ মুখ্য কৰ্মচাৰী হিচাপে নিৰ্বাচিত কৰিছে। ৬৭ বছৰীয়া ছুজি হ’ব হোৱাইট হাউছৰ প্ৰথমগৰাকী মহিলা চীফ অফ ষ্টাফ।
বৃহস্পতিবাৰে এই গুৰুত্বপূৰ্ণ পদটোৰ বাবে ট্ৰাম্পে ছুচিৰ নাম ঘোষণা কৰে। ট্ৰাম্পৰ দুই নিৰ্বাচনী কাৰ্যসূচী পৰিচালকৰ ভিতৰত অন্যতম হৈছে ছুচি।
যোৱা ৫ নৱেম্বৰত আমেৰিকাত ৰাষ্ট্ৰপতি নিৰ্বাচন অনুষ্ঠিত হৈ যায়। নিৰ্বাচনত ৰিপাব্লিকান প্ৰাৰ্থী ট্ৰাম্পে জয়লাভ কৰে। ২০ জানুৱাৰীত তেওঁ আমেৰিকাৰ ৰাষ্ট্ৰপতি হিচাপে শপত গ্ৰহণ কৰিব।
শপত গ্ৰহণ কৰাৰ পূৰ্বে ট্ৰাম্পে নিজৰ প্ৰশাসনক সংগঠিত কৰাৰ কাম সম্পূৰ্ণ কৰিব। ইয়াৰ বাবে তেওঁ বিভিন্ন গুৰুত্বপূৰ্ণ পদৰ বাবে নিজৰ পছন্দৰ লোকসকলক নিৰ্বাচন কৰিব। তেওঁলোকৰ নাম ঘোষণা কৰিব। সেই পৰ্যায়ত প্ৰথমে তেওঁ ছুচিৰ নাম ঘোষণা কৰিলে।
লগতে পঢ়কঃ বেয়া সময় শেষ হোৱা নাই কিলিয়ান এমবাপেৰ; এইবাৰ ফ্ৰান্সৰ ৰাষ্ট্ৰীয় দলৰ পৰাও পৰিল বাদ
হোৱাইট হাউছৰ চীফ অফ ষ্টাফে আমেৰিকাৰ ৰাষ্ট্ৰপতিৰ সমন্বয়ক হিচাপে কাম কৰে। সাধাৰণতে তেওঁৰ বহু প্ৰভাৱ থাকে। তেওঁ হোৱাইট হাউছৰ কৰ্মচাৰীসকলক পৰিচালনা কৰে। ৰাষ্ট্ৰপতিৰ বিভিন্ন কামৰ সময়সূচী নিৰ্ধাৰণ কৰে। অন্য চৰকাৰী বিভাগ আৰু সংসদসকলৰ সৈতে যোগাযোগ কৰে।
ছুচিক হোৱাইট হাউছৰ চীফ অফ ষ্টাফ হিচাপে নিৰ্বাচিত কৰা সন্দৰ্ভত ট্ৰাম্পে এক বিবৃতি প্ৰকাশ কৰে। বিবৃতিটোত তেওঁ কয় যে ছুচি এগৰাকী শক্তিশালী, স্মাৰ্ট, উদ্ভাৱনীমূলক ব্যক্তি। তেওঁ সাৰ্বজনীনভাৱে প্ৰশংসিত আৰু সন্মানীয়। তেওঁ যে আমেৰিকাক গৌৰৱান্বিত কৰিব তাত কোনো সন্দেহ নাই।
যোৱা মঙলবাৰে অনুষ্ঠিত আমেৰিকাৰ ৰাষ্ট্ৰপতি নিৰ্বাচনত ট্ৰাম্পে ডেম’ক্ৰেটিক পাৰ্টিৰ প্ৰাৰ্থী কমলা হেৰিছক পৰাস্ত কৰে। ইয়াৰ পিছতে ট্ৰাম্পে ফ্ল’ৰিডাৰ পাম বিচত থকা নিজৰ মালিকানাধীন মাৰ-এ-লাগো ক্লাবত সময় কটায়।
সূত্ৰসমূহৰ মতে, ট্ৰাম্পে এতিয়া নিজৰ প্ৰশাসনৰ শীৰ্ষ পদত কাক নিযুক্তি দিব সেই বিষয়ে চিন্তা কৰিছে। নিযুক্তিৰ বাবে বিবেচনা কৰা বহুতেই পূৰ্বৰ ট্ৰাম্প প্ৰশাসনত কাৰ্যনিৰ্বাহ কৰিছিল।
লগতে পঢ়কঃ ৩৬ বছৰ পিছত ছলমান ৰুছদিৰ ‘দ্য ছ্যেটেনিক ভাৰ্ছেছ’ গ্ৰন্থৰ আমদানিৰ ওপৰত নিষেধাজ্ঞা প্ৰত্যাহাৰ!
ছুচি ফ্ল’ৰিডাৰ এগৰাকী ৰাজনৈতিক কৌশলবিদ। তেওঁ ক্ৰীছ লাচিভিটাৰ সৈতে এইবাৰৰ আমেৰিকাৰ ৰাষ্ট্ৰপতি নিৰ্বাচনৰ বাবে ট্ৰাম্পৰ প্ৰচাৰ পৰিচালক হিচাপে কাম কৰিছিল। এইবাৰ ক্ৰীছ আৰু ছুচি দুয়োজনে ট্ৰাম্পৰ হৈ প্ৰচাৰ চলাই প্ৰশংসিত হৈছে। কোৱাৰ প্ৰয়োজন নাই যে এই প্ৰচাৰ ট্ৰাম্পৰ পূৰ্বৰ প্ৰচাৰতকৈ বহু বেছি অনুশাসিত আছিল। ট্ৰাম্পে নিজেই বিজয় ভাষণত দুয়োজন পৰিচালকক ধন্যবাদ জনায়।
