তদন্ত নে ঘমঘণ্ট? জুবিন গাৰ্গৰ মৃত্যু-ৰহস্য আৰু মুখ্যমন্ত্ৰীৰ ভূমিকাক লৈ কিছু প্ৰশ্ন ড০ হীৰেন গোহাঁইৰ

জুবিন গাৰ্গৰ মৃত্যূ-ৰহস্য লৈ পানী ঘোলা কৰাৰ ইচ্ছা নাছিল। কিন্তু কিছু দিনৰ পৰা কেতবোৰ সন্দেহ ঘনীভূত হৈ মোক বৰ উদ্বিগ্ন কৰি আছে। ৰাইজক জনালে তাৰ সুবিচাৰ হ’ব বুলি আশা কৰিছোঁ।

জুবীনৰ মৃত্যুক লৈ অসমৰ সৰহ সংখ্যক ৰাইজে অতি অশান্তি তথা উদ্বেগত দিন কটাইছে। হত্যাৰ সন্দেহ ব্যাপক হৈ পৰাত মুখ্যমন্ত্ৰীয়ে তুৰন্তে তদন্তৰ‌ বাবে SIT গঠন কৰাটো উচিত পদক্ষেপেই আছিল, কিন্তু তাৰ পিছত পুতলা নাচৰ সূত্ৰধাৰৰ দৰে তেওঁ নিৰৱিচ্ছিন্নভাবে তাৰ অগ্ৰগতি সম্পৰ্কে যি ধৰণৰ ধাৰাবিৱৰণী দি আছে তাৰ পৰা ধাৰণা হয় যে তেওঁ তদন্তৰ গতিপথো নিৰ্ধাৰণ কৰি আছে।

বহু বিজ্ঞ জনে কৈছে যে SITৰ তদন্তৰ অগ্ৰগতি সম্পৰ্কে ৰাইজক জনাবলৈ আৰক্ষী মহলে এজন মুখপাত্ৰ(spokesman) নিয়োগ কৰিলে ভাল আছিল। কিন্তু প্ৰশাসনৰ মুৰব্বী জনেই থপি‌য়াই সেই দায়িত্ব লৈ ল’লে কাৰ সাধ্য প্ৰতিবাদ কৰে?

ফলত নানা খবৰৰ লগে লগে মুখ্যমন্ত্ৰীৰ নানা ভাষ্য আৰু জল্পনা-কল্পনাও ৰাইজে শুনিব লগা হৈছে, যিটো কোনো দায়িত্বশীল আৰক্ষী বিষ‌য়াই নকৰিলেহেঁতেন। ফলত তথ্যবোৰৰ গাম্ভীৰ্য হ্ৰাস পাইছে।

তদুপৰি নিজৰ অজ্ঞাতে আৰু অস্বস্তিকৰভাবে তেওঁ নিজেও সন্দেহৰ পাত্ৰ হৈ পৰিছে। শ্যামকানু মহন্তৰ লগত তেওঁৰ কোনো সম্পৰ্ক নাই বুলি উপযাচি ঘোষণা কৰাৰ পাছতে একডজন মান ফটো, ভিডিঅ’ ওলাইছে মহন্তৰ লগত তেওঁৰ ঘনিষ্ঠতা প্ৰমাণ কৰি। এনে পৰিস্থিতি হ’ল যে কোনো কোনোৱে তেওঁকো তদন্তৰ আউটিলৈ আনিব লাগে বুলি দাবী কৰিব পৰা হ’ল।

 শ্যামকানু গুৱাহাটী আহি পোৱাৰ আগতেই জুবিন হত্যাত মহন্ত জড়িত আছিল বুলি ঢক ফুটি গ’ল। আৰু আৰক্ষী তথা SITয়ে তেওঁৰ ঘৰৰ তলা ভাঙি তেওঁৰ বিৰুদ্ধে বিত্তীয় দুষ্কৃতিৰ বিস্তৰ প্ৰমাণ পোৱাৰ বাতৰি ওলাল। নিয়ম-বহিৰ্ভূত ভাবে SIT য়ে এই বৃহৎ পৰিমাণৰ সাক্ষ্যপ্ৰমাণ মুখ্যমন্ত্ৰীক গতালে বুলিও কাকতে-পত্ৰই বাতৰি প্ৰকাশ পালে।

মুখ্যমন্ত্ৰী SITৰ শীৰ্ষ বিষয়া হ’ল কেতিয়া? আৰু দেশত আইন-কানুন বুলি কথা এটা নাই জানো? অভিযুক্ত নোহোৱালৈকে শ্যামকানু দেশৰ নাগৰিক, যাৰ সম্পত্তিত কোনেও আইনমতে হাত দিব নোৱাৰে। তেন্তে তেওঁৰ ঘৰৰ তলা ভাঙি আৰক্ষীয়ে কেনেকৈ তেওঁৰ আলমাৰিৰ লকাৰ ভাঙিলে?কোন আদালতে তাৰ অনুমতি দিলে?

তদন্ত হৈ আছিল জুবিনৰ মৃত্যু তথা হত্যাক লৈ। শ্যামকানুৰ বৈধ বা অবৈধ সম্পত্তিৰ লগত তাৰ কোনো সম্পৰ্ক এতিয়াই ওলোৱাৰ সম্ভাৱনা কম। তেন্তে আগতে জপিয়াই এই কাম SITয়ে কৰিছে কিয়?

সকলোতকৈ ডাঙৰ আৰু গধূৰ কথাটো হৈছে আজি লক্ষ্মী তামুলীয়ে আন এঠাইত ব্যক্ত কৰা কথা এটা। তদন্তৰ মূল বিষয়া ৰ’জি কলিতা, যি ছমাহমান ধৰি গৌৰৱ গগৈৰ পাকিস্তানী যোগাযোগৰ ৰোমহৰ্ষক বিস্তৰ তথ্য আবিষ্কাৰ কৰি আটাইকে ৰোমাঞ্চিত কৰিছিল। ধাৰণা হয় যে তেনে ধৰণী জোকৰা ভয়ঙ্কৰ তথ্য উলিওৱাত তেওঁৰ বিশেষ ব্যুৎপত্তি আছে। ইয়াতো সেই দক্ষতাৰ প্ৰয়োগ হ’ব নেকি? কিমধিকমিতি।