“ভাষা জীয়াই থাকে জাতিটোৰ স্বাভিমানৰ ওপৰত” এই মন্তব্য আগবঢ়াইছে গবেষক, পণ্ডিত তথা সাহিত্যচাৰ্য ড° ৰমেশ পাঠকে ৷ সাংস্কৃতিক মহাসভা, অসমৰ উদ্যোগত বৰপেটাত দেওবাৰে অনুষ্ঠিত “অসমীয়া ভাষাৰ অতীত, বৰ্তমান আৰু ভৱিষ্যৎ” শীৰ্ষক বক্তৃতা প্ৰদানত গৱেষক গৰাকীয়ে লগতে কয় যে, ৰাজ্যৰ অভিজাত শ্ৰেণীৰ লোক সকলে নিজৰ ল’ৰা ছোৱালীক অসমীয়া মাধ্যমত নপঢ়োৱাৰ বাবে অসমীয়া ভাষাটোৰ প্ৰতি প্ৰত্যাহ্বান নামি আহিছে ৷
বৰপেটা সাহিত্য সভা ভৱনত অনুষ্ঠিত এই বক্তৃতা প্ৰদানত তেওঁ কয় যে, অসমীয়া ভাষা ৰক্ষা কৰিবলৈ হ’লে অনা অসমীয়াৰ লগতে অসমীয়াৰ অভিজাত শ্ৰেণীৰ বিৰুদ্ধে যুঁজিব লাগিব ৷
অসমীয়া ভাষা ৰক্ষা কৰিবলৈ হ’লে ইংৰাজী মাধ্যমৰ বিদ্যালয়বোৰত অসমীয়া ভাষা বাধ্যতামূলক কৰাৰ লগতে অসমীয়া মাধ্যমৰ বিদ্যালয়বোৰ উন্নত কৰিব লাগিব বুলিও তেওঁ কয় ৷ কেৱল গুণোৎসৱ অনুষ্ঠিত কৰিলেই অসমীয়া মাধ্যমৰ বিদ্যালয়বোৰ উন্নত নহয় বুলিও তেওঁ উল্লেখ কৰে ৷
অৱসৰ প্ৰাপ্ত অধ্যক্ষ অৰ্জুন চন্দ্ৰ দাসৰ সভাপতিত্বত অনুষ্ঠিত এই সভাতেই সাহিত্যিক, অভিনেতা ডা: সমৰেন্দ্ৰ উজীৰৰ “জীৱন জিজ্ঞাস আৰু অনন্য স্মৃতি” নামৰ গ্ৰন্থখন উন্মোচন কৰে বিশিষ্ট সাহিত্যিক অক্ষয় কুমাৰ মিশ্ৰই ৷ সভাত কেইবা গৰাকী বিশিষ্ট ব্যক্তিৰ লগতে ভালে সংখ্যক ৰাইজ উপস্থিত থাকে ৷
