হাফলঙৰ আৱৰ্ত ভবনত আজি ‘ইন লাভ উইথ জাতিঙ্গা’ শীৰ্ষক এখন কাব্যগ্ৰন্থ উন্মোচন কৰা হয়। উত্তৰ কাছাৰ পাৰ্বত্য স্বায়ত্ত শাসিত পৰিষদৰ পৰ্যটন বিভাগৰ ই এম কুলেন্দ্ৰ দাউলাগুপুয়ে উন্মোচন কৰা গ্ৰন্থখনৰ লেখক হৈছে ড০ তপতী বৰুৱা কাশ্যপ।
কাব্যগ্ৰন্থখনৰ সম্পৰ্কে বক্তব্য আগবঢ়াই ড০ তপতী বৰুৱা কাশ্যপে ২০০৯ চনত প্ৰথমবাৰৰ বাবে জাতিঙ্গাত উপস্থিত হৈ ঠাইখিনিৰ প্ৰেমত পৰা বুলি উল্লেখ কৰি কয় যে তেতিয়াৰ পৰা কবিতা লিখা আৰম্ভ কৰি ৯ বছৰৰ অন্তত কিতাপখন সম্পূৰ্ণ কৰা হয়। ইয়াৰ মাজতে তেওঁ কেইবাবাৰো হাফলঙৰ লগতে জাতিঙ্গালৈ আহিছে বুলি জনায়।
আনহাতে মূখ্য অতিথিৰ আসনৰ পৰা ভাষণ প্ৰদান কৰি ই এম কুলেন্দ্ৰ দাউলাগুপুয়ে উক্ত কাব্যগ্ৰন্থখন জিলাৰ প্ৰতিখন বিদ্যালয়ত ৰখাৰ কাৰণে পৰামৰ্শ দিয়ে। ইয়াৰ উপৰি অনুষ্ঠানত অংশগ্ৰহণ কৰি বিশিষ্ট সাংবাদিক সমুদ্ৰ গুপ্ত কাশ্যপে ডিমা হাচাওৰ বিভিন্ন হেৰিটেজ ভবনসমূহৰ সংৰক্ষণৰ বাবে কৰ্ত্তৃপক্ষক আহ্বান জনায়।
আজিৰ অনুষ্ঠানত ডিমা হাচাওৰ জিলা আৰক্ষী অধীক্ষকক প্ৰশান্ত শইকিয়া, অতিৰিক্ত আৰক্ষী অধীক্ষকক পুষ্প ৰাজ সিং, হাফলঙৰ জনসংযোগ বিষয়া পূৰবী ফংলো, ডিমাচা সাহিত্য সভাৰ সাধাৰণ সম্পাদক সূৰ্য্য থাউচেন, বিশিষ্ট শিক্ষাবিদ এলভেনটিছ চাজেম, হাফলং প্ৰেছ ক্লাবৰ সভাপতি অনুপ কুমাৰ বিশ্বাস আদি উপস্থিত থাকে।
