ব্ৰাউন চুগাৰকে ধৰি বিভিন্ন নিচাজাতীয় দ্ৰব্যৰ সৰবৰাহ অবাধে চলি থকাৰ সময়তে চাপৰ আৰক্ষীয়ে চাপৰ চহৰৰ মাজমজিয়াত এক অভিযান চলাই বৃহৎ পৰিমাণৰ ব্ৰাউন চুগাৰ সহ এজন ড্ৰাগছ বেপাৰীক আটক কৰিবলৈ সক্ষম হয়।
উল্লেখ্য যে চাপৰৰ মৌৱাটাৰীৰ হুছেইন আলীৰ পুত্ৰ ৰাজা আলী(১৮)নামৰ ড্ৰাগছ সৰবৰাহকাৰী জনে গুৱাহাটীৰ পৰা ড্ৰাগছ চাপৰলৈ লৈ অহাৰ এক খবৰ চাপৰ আৰক্ষী থানাৰ ভাৰপ্ৰাপ্ত বিষয়া ৰঞ্জিত কাকতিয়ে গোপন সূত্ৰৰ পমখেদি লাভ কৰে।
তাৰ পাছতে চাপৰ থানাৰ উপ- পৰিদৰ্শক দ্বিজেন্দ্ৰ মেধিৰ নেতৃত্বত আৰক্ষীৰ দলে অভিযান চলাই চাপৰ চহৰৰ নাগপট্টিৰ পথৰ পৰা ৰাজা আলীক ড্ৰাগছ সহ হাতে লোটে ধৰে।
ড্ৰাগছ সৰবৰাহকাৰী জনৰ পৰা ১০ গ্ৰাম ব্ৰাউন চুগাৰ আৰু প্ৰায় ৩৭৫ গ্ৰাম আন নিচাজাতীয় সামগ্ৰী আৰক্ষীয়ে জব্দ কৰে ।
এই সন্দৰ্ভত চাপৰ আৰক্ষীয়ে এক গোচৰ ৰুজু কৰি তদন্ত আৰম্ভ কৰিছে ।
