অসমৰ মুখ্যমন্ত্ৰী ড° হিমন্ত বিশ্ব শৰ্মাই দেওবাৰে তিনিচুকীয়া জিলাৰ ডুমডুমা নদীৰ দক্ষিণ পাৰত ৮৪ লাখ টকা ব্যয় সাপেক্ষে নিৰ্মিত এক বিশাল আদৰণি তোৰণ উদ্বোধন কৰে। কিন্তু লক্ষণীয় বিষয়টো হ’ল যে যিখন নদীৰ পাৰত এই ব্যয়বহুল তোৰণখন নিৰ্মাণ কৰা হৈছে, সেই ডুমডুমা নদীখন বৰ্তমান তীব্ৰ প্ৰদূষণ, বেদখল আৰু অনিয়ন্ত্ৰিত বালি খননৰ ফলত অস্তিত্বৰ সংকটত পৰিছে।
ডুমডুমা পৌৰ সভাৰ দ্বাৰা ১৫ সংখ্যক বিত্তীয় আয়োগৰ পুঁজিৰে নিৰ্মিত এই ‘আদৰণি তোৰণ’খন চহৰখনৰ দক্ষিণ প্ৰৱেশদ্বাৰত ডুমডুমা দলঙৰ ওচৰত অৱস্থিত। এই উদ্বোধনীত স্থানীয় বিধায়ক তথা কেবিনেট মন্ত্ৰী ৰূপেশ গোৱালা, ডুমডুমা পৌৰ সভাৰ পৌৰপতি কান্তা ভট্টাচাৰ্য আৰু শদিয়াৰ বিধায়ক বলিন চেতিয়া উপস্থিত থাকে।
যি সময়ত তোৰণখন উদ্বোধন কৰা হৈছে, সেই সময়তে নদীখনৰ অৱস্থা দেখিলে চকু কপালত উঠিবলগীয়া। নদীখনৰ বিভিন্ন অংশত প্লাষ্টিকৰ আৱৰ্জনা আৰু ঘৰুৱা জাৱৰ-জোঁথৰৰ দ’ম জমা হৈ আছে। একাংশই নদীৰ বুকু বেদখল কৰাৰ ফলত নদীখন অতিশয় সংকীৰ্ণ হৈ পৰিছে। স্থানীয় ৰাইজৰ অভিযোগ অনুসৰি, নদীখনৰ কেইবাটাও স্থানত অবৈধ বালি খনন কাৰ্যও অব্যাহত আছে।
নদীৰ পাৰৰ বাসিন্দাৰ মতে, যোৱা কেইবা বছৰ ধৰি নদীখনৰ অৱস্থা ক্ৰমান্বয়ে শোচনীয় হৈ পৰিছে। জাৱৰ পেলোৱা, বেদখল আৰু বালি খননৰ বিৰুদ্ধে পৌৰ সভা তথা জিলা প্ৰশাসনক বাৰে বাৰে অভিযোগ দিয়াৰ পাছতো কোনো স্থায়ী ব্যৱস্থা গ্ৰহণ কৰা হোৱা নাই। নাম প্ৰকাশ কৰিবলৈ অনিচ্ছুক এগৰাকী স্থানীয় লোকে কয় যে, “এতিয়া বাৰিষা আহিলে নদীৰ পানী অতি সোনকালে ওফন্দি উঠে, কাৰণ নদীখনৰ প্ৰস্থ ক্ৰমান্বয়ে ঠেক হৈ আহিছে।”
পৰিৱেশ বিশেষজ্ঞসকলৰ মতে, নদী বেদখল আৰু অনিয়ন্ত্ৰিত বালি খননে নদী এখনৰ পানী কঢ়িওৱা ক্ষমতা হ্ৰাস কৰে আৰু পাৰসমূহ দুৰ্বল কৰি তোলে। ইয়াৰ ফলত গৰাখহনীয়া আৰু বানপানীৰ সম্ভাৱনা বৃদ্ধি পায়। অসমৰ খনন আৰু পৰিৱেশ নীতি অনুসৰি নদীৰ বুকুৰ পৰা বালি উলিওৱা আৰু আৱৰ্জনা পেলোৱাটো সম্পূৰ্ণ নিষিদ্ধ। কিন্তু সৰু চহৰসমূহত এনে আইনৰ সঠিক ৰূপায়ণৰ অভাৱত নিৰ্বিচাৰে এনে আইন উলংঘন চলি আহিছে।
মন কৰিবলগীয়া যে এই নতুনকৈ নিৰ্মিত আদৰণি তোৰণখন নদীখনৰ ঠিক কাষতে হোৱাৰ পাছতো উদ্বোধনৰ দিনা নদীখনৰ পুনৰুদ্ধাৰৰ বাবে কোনো পদক্ষেপ লোৱা দেখা নগ’ল। স্থানীয় বিভিন্ন সংগঠনে দাবী জনাইছে যে চহৰৰ উন্নয়নমূলক আঁচনিসমূহৰ লগতে নদী সুৰক্ষাৰ ব্যৱস্থাও সমান্তৰালভাৱে গ্ৰহণ কৰিব লাগে।
