এইবাৰ দীপাৱলীৰ পূৰ্বেই ধোঁৱাৰ আচ্ছাদনে ঢাকি ধৰিল দেশৰ ৰাজধানী দিল্লী চহৰ। শনিবাৰে পুৱা প্ৰদূষণৰ ধোঁৱাই ছানি ধৰিল দেশৰ ৰাজধানী নতুন দিল্লী। ধোঁৱা-ধূলিৰ আচ্ছাদনে নেদেখা কৰি তুলিলে ইণ্ডিয়া গেট আৰু ৰাষ্ট্ৰপতি ভৱন। সাক্ষী হৈ ৰ’ল বহুকেইজন চাইকেল আৰোহী।
উল্লেখ্য যে পূৰ্বতে দিল্লী আৰু উত্তৰ প্ৰদেশত দীপাৱলীত ফুটোৱা আতচবাজীৰ ফলত দীপাৱলীৰ পিছদিনাৰ পৰা অত্যধিক ভয়াৱহ প্ৰদূষণৰ সৃষ্টি হয় দিল্লী চহৰত। প্ৰদূষণ মাত্ৰাধিক হোৱাৰ ফলত দিল্লীৰ নাগৰিকে উশাহ-নিশাহ লোৱা আৰু বাহিৰলৈ ওলোৱাটোৱেই দুঃসাধ্য হৈ পৰে। এনে বায়ু প্ৰদূষণৰ বাবে দীপাৱলীৰ পিছত স্কুল-কলেজ, কাৰ্যালয় আদি বন্ধ কৰিবলগীয়া তথা ৰাজধানীৰ জন-জীৱন ব্যাহত হৈ পৰাৰো নজিৰো আছে।
কিন্তু আশ্চৰ্যজনক ভাবে এই বছৰ দীপাৱলীৰ আগেয়েই দিল্লীৰ ৰাজপথ হৈ পৰিছে ধূলিময়। জানিব পৰা মতে, শণিবাৰে পুৱা দিল্লীৰ বায়ুৰ গুণাগুণ, যাক ‘এয়াৰ কুৱালিটি ইণ্ডেক্স’ বুলি কোৱা হয়, তাৰ মাত্ৰা হৈছে ২৬২ । বিশেষজ্ঞ সকলে প্ৰদূষণৰ এই মাত্ৰাক অতি ভয়াৱহ বুলি সদৰী কৰিছে ।
শণিবাৰে পুৱাৰ দিল্লীৰ বায়ু প্ৰদূষণৰ সাক্ষী হোৱা নিখিল নামৰ এজন নিয়মীয়া চাইকেল চালকে সাংবাদিকৰ আগত কয় যে – “ এইবেলি কি হৈছে নাজানো; দীপাৱলীৰ পূৰ্বেই এনেধৰণৰ বায়ু প্ৰদূষণ হৈছে। আনকালে দীপাৱলীৰ পিছতহে এনে দৃশ্য দেখা যায়। ”
ইয়াৰ লগতে নিখিলে ৰাইজক ৰাজহুৱা যাতায়ত ব্যৱহাৰ কৰাৰ লগতে চাইকেল চলাবলৈ আহ্বান জনায়। শেষত নিখিলে দেশবাসীক উদ্দেশ্যি আতচবাজী তথা প্ৰদূষণমুক্ত দীপাৱলী উদযাপন কৰিবলৈ কয়।
শেহতীয়াকৈ দিল্লীৰ মুখ্যমন্ত্ৰী অৰবিন্দ কেজৰিৱালেও দিল্লীত আতচবাজীবিহীন দীপাৱলী উদযাপনৰ বাবে কঠোৰ নিৰ্দেশ জাৰী কৰিছে। কেজৰিৱালৰ এই নিষেধাজ্ঞা কিমান ফলপ্ৰসু হয় সেয়া হ’ব লক্ষ্যণীয়।