সাংবাদিক বনজিৎ ঠাকুৰীয়াক আৰক্ষীয়ে কৰা নিৰ্যাতনক তীব্ৰ গৰিহণা ডি ৱাই এফ আইৰ

মাজ নিশা বাতৰি সংগ্ৰহ কৰিবলৈ যোৱা সাংবাদিক বনজিৎ ঠাকুৰীয়াক আৰক্ষীয়ে পক্ষপাতিত্বমূলক আচৰণেৰে কৰা নিৰ্যাতনক ভাৰতৰ গণতান্ত্ৰিক যুৱ ফেডাৰেছন (ডি ৱাই এফ আই)ৰ অসম ৰাজ্যিক কমিটিয়ে তীব্ৰ গৰিহণা জনাইছে আৰু সাংবাদিকক হাৰাশাস্তি কৰা আৰক্ষী বিষয়াৰ বিৰুদ্ধে ব্যৱস্থা ল’বলৈ দাবী জনাইছে।

এক বিবৃতিত সংগঠনটোৱে কয় যে আৰক্ষীৰ এই আচৰণত সাংবাদিক সকলৰ নিৰাপত্তাৰ দিশটোতে প্ৰশ্ন উত্থাপিত হৈছে। আৰক্ষীৰ বিৰুদ্ধে ৰাজ্যৰ বিভিন্ন স্থানত পক্ষপাতিত্বমূলক আচৰণৰৰ অভিযোগ প্ৰায়ে শুনিবলৈ পোৱা যায়, কিন্তু এইবাৰ গুৱাহাটী মহানগৰীতে খোদ সাংবাদিকৰ ক্ষেত্ৰতে এনে অভিযোগ উত্থাপিত হৈছে। এয়া গণতন্ত্ৰ আৰু আইনৰ শাসনৰ প্ৰতিয়ে ভাবুকি স্বৰূপ। শেহতীয়াকৈ ৰাজ্যৰ কেইবাটাও ঘটনাত আৰক্ষীয়ে নিজেই আদালত ভুমিকা লোৱা প্ৰত্যক্ষ কৰা গৈছে।

লগতে পঢ়ক: “কাক প্ৰতাৰণা কৰিছে?”: হিমন্ত বিশ্ব শৰ্মাৰ পুৰণি টুইটেৰে প্ৰধানমন্ত্ৰী মোদীক সাৱধানবাণী কংগ্ৰেছ নেতাৰ

সাংবাদিকক আৰক্ষীৰ নিৰ্যাতনৰ ঘটনাত উদ্বেগ প্ৰকাশ কৰি ডি ৱাই এফ আইয়ে কয়, ‘’যি সময়ত আৰক্ষীয়ে জনসাধাৰণৰ প্ৰতি বন্ধুসুলভ আচৰণ কৰিব বুলি আৰক্ষী সঞ্চালক প্ৰধান গৰাকীয়ে প্ৰতিশ্ৰুতি দিছে সেই সময়তে আৰক্ষীৰ বিৰুদ্ধে এটাৰ পাছ আনটোকৈ অভিযোগ উত্থাপিত হৈছে। আচৰিত কথাটো হৈছে ৰাজধানী মহানগৰিত হোৱা এনে গুৰুতৰ ঘটনা হৈ যোৱাৰ পাছত অসম চৰকাৰৰ অথবা মুখ্যমন্ত্ৰী ডঃ হিমন্ত বিশ্ব শৰ্মাই নিঃচুপ হৈ আছে। এয়া খুবেই চিন্তনীয় আৰু উদ্বেগৰ বিষয়।‘’

ডি ৱাই এফ আইয়ে দাবী কৰিছে সাংবাদিক বনজিৎ ঠাকুৰীয়াক পুলিচে আইনৰ অপব্যৱহাৰ কৰাৰ যি অভিযোগ উঠিছে সেই ক্ষেত্ৰত উচিত ব্যৱস্থা গ্ৰহণ কৰক।