হাইস্কুলৰ ৬,২৯৩ টা স্নাতক শিক্ষক পদৰ নিযুক্তিৰ বাবে বুধবাৰে প্ৰকাশ কৰা মেধা তালিকাখনত গুৰুতৰ বিসংগতিৰে ভৰা বুলি অভিযোগ উঠিছে৷ এই বিসংগতি শীঘ্ৰে আঁতৰ কৰি প্ৰকৃত মেধাৰ ভিত্তিত নতুন তালিকা প্ৰকাশ কৰিবলৈ ভাৰতৰ গণতান্ত্ৰিক যুৱ ফেডাৰেছন (ডি ৱাই এফ আই)ৰ অসম ৰাজ্যিক কমিটিয়ে দাবী জনাইছে৷
আৱেদনকাৰী ক্ষুব্ধ প্ৰাৰ্থীয়ে ডি ৱাই এফ আইৰ আগত প্ৰকাশ কৰা তথ্য অনুসৰি বিজ্ঞাপনৰ সময়ত মাধ্যমিক শিক্ষা সঞ্চালকালয়ে যিবোৰ চৰ্ত উল্লেখ কৰিছিল সেইবোৰ দেখদেখ কৈ উলংঘা হৈছে৷
কিছুদিন পূৰ্বে বি টি এ ডি হাইস্কুল শিক্ষক নিযুক্তিত গুৰুতৰ অনিয়ম পোহৰলৈ অহাৰ পাছতো কোনো শিক্ষা নল’লে অসম চৰকাৰ কিম্বা শিক্ষা বিভাগে; যাৰ পৰিণতি স্বৰূপেই পুনৰ বৃহৎ অনিয়ম সংঘটিত হ’বলৈ পালে৷
লগতে পঢ়ক: দেশত শিক্ষানুষ্ঠান পুনৰ মুকলিৰ বাবে নিৰ্দেশনা জাৰি শিক্ষা মন্ত্ৰালয়ৰ
উল্লেখ্য যে স্বচ্ছ আৰু নিকা প্ৰশাসনৰ শ্লোগান দিয়া চৰকাৰৰ সুৰতেই অসম মাধ্যমিক শিক্ষা বিভাগেও স্বচ্ছতাৰ শ্লোগান দি উক্ত পদৰ বাবে আবেদন কৰা প্ৰতিজন প্ৰাৰ্থীৰ জিলাভিত্তিক ভেৰিফিকেশ্বন কৰিছিল৷
আজিৰ ডিজিটেল যুগতো কোভিডৰ প্ৰতিকূলতাকো নেওচি অসমৰ ইমূৰৰ পৰা সিমূৰলৈ গৈ অশেষ কষ্ট আৰু টকা-পইচা খৰচ কৰি শিক্ষা বিভাগৰ লগত তেওঁলোকে সহযোগিতা কৰিছিল৷
প্ৰায় ২০/২৫ দিনৰ মূৰত ভেৰিফিকেশ্বন প্ৰক্ৰিয়া সমাপ্ত হৈছিল৷ আনকি বহু প্ৰাৰ্থীয়ে কোলাত কেচুৱা লৈও জিলাই জিলাই ঘূৰিবলগীয়া হৈছিল৷ কিন্তু ইমানৰ পাছতো শিক্ষা বিভাগে সমগ্ৰ প্ৰক্ৰিয়াটোত স্বচ্ছতা আনিব নোৱাৰিলে৷ এই অকৰ্মণ্যতাৰ বাবেই অভিজ্ঞতাৰ নম্বৰ দিয়াৰ ক্ষেত্ৰত যথেষ্ট ত্ৰুটি ৰৈ গ’ল৷
লগতে পঢ়ক:নিৰ্বাচনী হিংসা! উত্তৰ প্ৰদেশত আছাদুদ্দিন ওৱেছিৰ গাড়ীলৈ লক্ষ্য কৰি চলিল গুলী
একেদৰে পূৰ্বে নিযুক্তি পোৱা বা পূৰ্বৰ বাচনি তালিকাত নাম অহা বহু প্ৰাৰ্থীৰ নাম এইবাৰৰ তালিকাতো আহিল৷ বিজ্ঞাপনৰ সময়ত প্ৰকাশ কৰা নিয়ম অনুসৰি পূৰ্বে নিযুক্তি পোৱা বা বাচনি তালিকাত নাম অহা প্ৰাৰ্থীয়ে একেই পদত তিনি বছৰলৈ আবেদন কৰিব নোৱাৰিব৷
আশ্চৰ্যকৰ কথা হৈছে অভিজ্ঞতাৰ নম্বৰ লাভ কৰা বহু প্ৰাৰ্থীয়ে নিজৰ অভিজ্ঞতাৰ নম্বৰ কৰ্তন কৰিবলৈ আহ্বান জনাইছে৷ আনহাতে, বি এডৰ প্ৰমাণ পত্ৰ, জাতিগত প্ৰমাণ পত্ৰ, আৰ্থিকভাৱে পিচপৰা শ্ৰেণীৰ (ই ডব্লিউ এছ) প্ৰমাণ পত্ৰৰ নামতো বিসংগতি হোৱাৰ অভিযোগ উঠিছে৷
ডি ৱাই এফ আইৰ অসম ৰাজ্যিক কমিটিয়ে গভীৰ উদ্বেগ প্ৰকাশ কৰি কয় যে বি টি এ ডিৰ হাইস্কুল শিক্ষক নিযুক্তি, এল পি- ইউ পি টে’ট পৰীক্ষাৰ ফলাফলৰ বিসংগতিৰ পাছত পুনৰ হাইস্কুল শিক্ষক নিযুক্তিৰ ক্ষেত্ৰতো গুৰুতৰ অনিয়ম হৈছে৷ এয়া শিক্ষা বিভাগ আৰু স্বচ্ছতাৰ প্ৰতিশ্ৰুতি দিয়া অসম চৰকাৰৰ বাবে লজ্জাৰ বিষয়৷
লগতে পঢ়ক:আগষ্টত চন্দ্ৰযান-৩ উৎক্ষেপন কৰিব ভাৰতীয় মহাকাশ আৰু গৱেষণা সংস্থাই
চৰকাৰ আৰু বিভাগৰ এই দায়িত্বহীন কাম-কাজে স্বাভাৱিকতে চাকৰী প্ৰাৰ্থী, শিক্ষিত যুৱক-যুৱতী সকলোকে আশাহত কৰা বুলি উল্লেখ কৰি ডি ৱাই এফ আয়ে এই অনিয়ম শীঘ্ৰে আঁতৰ কৰাৰ দাবী জনাইছে৷
