নাগালেণ্ডৰ জুকো ভেলীত ২৯ ডিচেম্বৰত সংঘটিত অগ্নিকাণ্ড বৰ্তমান নিয়ন্ত্ৰণাধীন বুলি নাগালেণ্ডৰ বন বিভাগে উল্লেখ কৰে।
‘‘অধিক জুই যাতে জুকো ভেলীক গ্ৰাস কৰিব নোৱাৰে সেই উদ্দেশ্যে এটা বৃহৎ দলে তৎপৰতাৰে কাম কৰি আছে,’’ কহিমাৰ বন বিভাগৰ বিষয়া ৰাজকুমাৰে এইদৰে কয়।
নাগালেণ্ড আৰক্ষী, বন বিভাগ, এন ডি আৰ এফ আৰু এছ ডি আৰ এফৰ লগতে দক্ষিণ আংগামি যুৱ সংগঠনে জুকো ভেলীৰ অগ্নিকাণ্ড ৰোধৰ বাবে প্ৰয়োজনীয় সকলো ব্যৱস্থা হাতত লৈছে।
কহিমা আৰক্ষীয়ে জুকো ভেলীত ক্ষেত্ৰ ভিত্তিত কাম কৰি থকা দলৰ সৈতে যোগাযোগ ৰক্ষাৰ বাবে জুকো ভেলীৰ প্ৰৱেশ পথত এটা নিয়ন্ত্ৰণ ৰূম স্থাপন কৰিছে।
জুকো ভেলীৰ অগ্নি নিয়ন্ত্ৰণৰ বাবে ভাৰতীয় সেনা বাহিনীৰো সহায় গ্ৰহণ কৰা হৈছে।
ভাৰতীয় সেনা বাহিনী আৰু অসম ৰাইফলছৰ দলে এন ডি আৰ এফৰ অভিযানকাৰী দলক বিভিন্ন ক্ষেত্ৰত সহায় আগবঢ়াইছে।
আনহাতে, ভাৰতীয় বায়ু সেনা বাহিনীয়ো জুকো ভেলীৰ জুই নিয়ন্ত্ৰণৰ বাবে সহায় আগবঢ়াই আছে।
ভাৰতীয় বায়ু সেনা বাহিনীয়ে জুই নিয়ন্ত্ৰণৰ বাবে এম আই-১৭ হেলিকপ্তাৰ ব্যৱহাৰ কৰিছে।
বৰ্তমানো জুকো ভেলীত সংঘটিত হোৱা অগ্নিকাণ্ডৰ প্ৰকৃত কাৰণ জানিব পৰা হোৱা নায়।