ভাৰতৰ উত্তৰ-পূবাঞ্চল আৰু চীন সীমান্তৰ কৌশলগত গুৰুত্বৰ প্ৰতি লক্ষ্য ৰাখি অধিক সতৰ্কতা বজাই ৰাখিব লাগিব বুলি মন্তব্য কৰিছে ইষ্টাৰ্ণ কমাণ্ডৰ প্ৰাক্তন মুৰব্বী লেফটেনেণ্ট জেনেৰেল আৰ পি কলিতাই। অৱসৰপ্ৰাপ্ত সেনা বিষয়াগৰাকীয়ে বাংলাদেশত মৌলবাদী সংগঠনৰ বৰ্ধিত কাৰ্যকলাপৰ প্ৰতি উদ্বেগ প্ৰকাশ কৰি ভাৰতে আগতীয়াকৈ সুৰক্ষা ব্যৱস্থা শক্তিশালী কৰাৰ পোষকতা কৰিছে।
সংবাদ সংস্থা এএনআইৰ সৈতে এক বিশেষ সাক্ষাত্কাৰত লেফটেনেণ্ট জেনেৰেল কলিতাই কয় যে শেহতীয়াকৈ বাংলাদেশত মৌলবাদী উপাদানৰ প্ৰভাৱ বৃদ্ধি পাইছে। শ্বেখ হাছিনা চৰকাৰৰ পতনৰ পাছত মৌলবাদী গোটসমূহ পুনৰ সক্ৰিয় হৈ পৰিছে আৰু ইয়াৰ প্ৰভাৱ ভাৰতৰ সীমান্তৱৰ্তী অঞ্চলসমূহত অনুভূত হোৱাৰ সম্ভাৱনা আছে।
তেওঁ সকীয়াই কয় যে, এই মৌলবাদী সংগঠনসমূহে ভাৰতৰ কৌশলগত স্বাৰ্থ আৰু বিশেষকৈ উত্তৰ-পূবৰ সীমান্তৰ স্থিতিশীলতাৰ ওপৰত গুৰুতৰ প্ৰভাৱ পেলাব পাৰে। সেইবাবে ভাৰতক নিৰন্তৰ নিৰীক্ষণ আৰু সতৰ্কতা বজাই ৰাখিবলৈ তেওঁ আহ্বান জনাইছে।
চীন সীমান্তৰ প্ৰসংগত লেফটেনেণ্ট জেনেৰেল কলিতাই কয় যে, “ভাৰত আৰু চীন দুয়োখন দেশে সীমান্তত সামৰিক আৰু লজিষ্টিক আন্তঃগাঁথনি দ্ৰুতগতিত বিকশিত কৰি আহিছে।”
তেওঁ লগতে উল্লেখ কৰে, ভাৰত চৰকাৰে অৰুণাচল প্ৰদেশ, ছিকিম আৰু উত্তৰাখণ্ডৰ সীমান্ত অঞ্চলসমূহত আন্তঃগাঁথনি উন্নয়ন, সংযোগ বৃদ্ধি, ডাটা আৰু মোবাইল নেটৱৰ্ক শক্তিশালীকৰণ আদি ক্ষেত্ৰত উল্লেখযোগ্য অগ্ৰগতি সাধন কৰিছে।
অৱসৰপ্ৰাপ্ত সেনা বিষয়াগৰাকীয়ে দৃঢ়ভাৱে কয় যে, “ভাৰতৰ সীমান্ত সুৰক্ষাৰ প্ৰস্তুতি আগৰ তুলনাত বহুগুণে উন্নত হৈছে, তথাপিও উত্তৰ-পূবৰ শান্তি, স্থিতিশীলতা আৰু দেশৰ সাৰ্বভৌমত্ব ৰক্ষাৰ বাবে সদায় সতৰ্কতা আৰু নিৰন্তৰ প্ৰস্তুতি বজাই ৰাখাটো অত্যন্ত প্ৰয়োজনীয়।”
