এমাহতকৈও অধিক সময়ৰ নিৰ্বাচনী প্ৰক্ৰিয়াৰ অন্তত অৱশেষত অসমকে ধৰি পাঁচখন ৰাজ্য আৰু কেন্দ্ৰীয় শাসিত অঞ্চলৰ পৰা আদৰ্শ আচৰণ বিধি বা মডেল কোড অফ কন্ডাক্ট (এমচিচি) প্ৰত্যাহাৰ কৰা হৈছে।
নিৰ্বাচন আয়োগে ২০২৬ চনৰ বিধানসভা নিৰ্বাচনৰ ফলাফল আৰু বিভিন্ন ৰাজ্যৰ উপ-নিৰ্বাচনৰ ফলাফল ঘোষণা কৰাৰ পিছত আজি অৰ্থাৎ ৭ মে’ৰ পৰা এই বাধা-নিষেধসমূহ উঠাই লোৱাৰ কথা উল্লেখ কৰিছে।
দিল্লী নিৰ্বাচন আয়োগৰ অধীনস্থ সচিব প্ৰফুল্ল অৱস্থিৰৰ স্বাক্ষৰিত পত্ৰখনত ভোটদানৰ সময়সূচী ঘোষণা কৰাৰ দিনাৰ পৰা প্ৰৱৰ্তন কৰা নিয়মৰ ম্যাদ আজিৰে পৰা শেষ হোৱা বুলি উল্লেখ কৰা হৈছে।
কিন্তু আয়োগৰ পত্ৰত লগতে কোৱা যে পশ্চিম বংগৰ পৰা আচৰণ বিধি উঠাই লোৱা হৈছে যদিও দক্ষিণ ২৪ পৰগনাৰ ১৪৪ নং ফল্টা বিধানসভা সমষ্টিত বৰ্তমান নিয়ম শিথিল কৰা হোৱা নাই। আয়োগে তাত নতুনকৈ ভোটদানৰ নিৰ্দেশ দিছে, গতিকে সেই নিৰ্দিষ্ট অঞ্চলত নিয়ম বলবৎ থাকিব।
অসমৰ বাহিৰেও যিবোৰ ৰাজ্য আৰু কেন্দ্ৰীয় শাসিত অঞ্চলৰ পৰা এই নিয়ম উঠাই লোৱা হৈছে সেইবোৰ হ’ল পশ্চিমবংগ, কেৰালা, তামিলনাডু, পুডুচেৰী। উপ-নিৰ্বাচন অনুষ্ঠিত হোৱা গুজৰাট, কৰ্ণাটক, মহাৰাষ্ট্ৰ, নাগালেণ্ড আৰু ত্ৰিপুৰাৰ সমষ্টিকেইটাতো এতিয়া আচৰণ বিধি বলবৎ নাই বুলিও স্পষ্ট কৰা হৈছে।
নিৰ্বাচনী আচৰণ বিধি উঠাই দিয়াৰ অৰ্থ হ’ল চৰকাৰে এতিয়া যিকোনো নতুন জনকল্যাণমূলক প্ৰকল্প বা উন্নয়নমূলক কামৰ কথা ঘোষণা কৰিবলৈ সক্ষম হ’ব। প্ৰশাসনিক সালসলনি বা বদলিৰ লগত জড়িত বাধাসমূহো দূৰ হৈছে। সাধাৰণ মানুহৰ বাবে ইয়াৰ অৰ্থ হ’ল প্ৰশাসনিক কামত উদ্ভৱ হোৱা স্থবিৰতা এতিয়া দূৰ হ’ব।
আয়োগৰ এই পত্ৰ ইতিমধ্যে কেবিনেট সচিব আৰু সংশ্লিষ্ট সকলো ৰাজ্যৰ মুখ্য সচিব তথা মুখ্য নিৰ্বাচনী বিষয়ালৈ প্ৰেৰণ কৰা হৈছে। আজিৰে পৰা ৰাজ্যত পুনৰ স্বাভাৱিক প্ৰশাসনিক কাম-কাজ আৰম্ভ কৰা হৈছে।
