দুৰ্নীতিৰ অভিযোগত চাকৰিৰ পৰা বৰ্খাস্ত হোৱা অসম অসামৰিক সেৱাৰ (ACS) বিষয়া সুকন্যা বৰাৰ বিৰুদ্ধে ইডিৰ ধন বিৰোধীকৰণ আইন (PMLA), ২০০২ ৰ অধীনত অসমৰ বিশেষ আদালতত এক অভিযোগনামা দাখিল কৰিছে। ৭.৯৪ কোটি টকাৰ অস্বাভাৱিক সম্পত্তি আহৰণৰ অভিযোগত ইডিৰ গুৱাহাটী মণ্ডল কাৰ্যালয়ে এই গোচৰ ৰুজু কৰিছে।
প্ৰাপ্ত তথ্য অনুসৰি, মুখ্যমন্ত্ৰীৰ বিশেষ তদাৰকী কোষে দুৰ্নীতি নিবাৰণ আইন, ১৯৮৮ৰ অধীনত পূৰ্বে সুকন্যা বৰাৰ বিৰুদ্ধে নিজৰ জ্ঞাত আয়ৰ উৎসতকৈ অধিক সম্পত্তি আহৰণ কৰাৰ অভিযোগত এক প্ৰাথমিক এজাহাৰ ৰুজু কৰিছিল। এই এজাহাৰৰ ভিত্তিতেই ইডিয়ে নিজৰ তদন্ত আৰম্ভ কৰে। কামৰূপ (মহানগৰ) জিলাৰ অতিৰিক্ত উপায়ুক্ত হিচাপে কৰ্মৰত অৱস্থাত গ্ৰেপ্তাৰ হোৱা বৰাৰ বিৰুদ্ধে মুখ্যমন্ত্ৰীৰ তদাৰকী কোষে ইতিমধ্যে অভিযোগনামা দাখিল কৰিছে আৰু বৰ্তমান বিশেষ আদালতত ইয়াৰ বিচাৰ প্ৰক্ৰিয়া চলি আছে।
ইডিৰ সূত্ৰই প্ৰকাশ কৰা অনুসৰি, ২০১৫ চনত মাত্ৰ ৩৮,০০০ টকাৰ দৰমহাত অসম অসামৰিক সেৱাত যোগদান কৰা সুকন্যা বৰাই ২০১৭ চনৰ মাৰ্চৰ পৰা ২০২৩ চনৰ ফেব্ৰুৱাৰী মাহৰ ভিতৰত প্ৰায় ৭.৯৪ কোটি টকাৰ স্থাৱৰ আৰু অস্থাৱৰ সম্পত্তি গোটাবলৈ সক্ষম হৈছিল। তদন্তকাৰী সংস্থাটোৱে দাবী কৰা মতে, এই সম্পত্তি তেওঁৰ জ্ঞাত আয়ৰ তুলনাত ৭৮৬.২৬ শতাংশ অধিক। হাজো ৰাজহ চক্ৰৰ চক্ৰ বিষয়াকে ধৰি বিভিন্ন পদবীত কাৰ্যনিৰ্বাহ কৰাৰ সময়ত বৰাই নামজাৰি, পঞ্জীয়ন আৰু ভূমি ক্ৰয়-বিক্ৰয়ৰ অনুমতিৰ দৰে কামৰ বিনিময়ত সাধাৰণ ৰাইজৰ পৰা অবৈধ ধন সংগ্ৰহ কৰিছিল।
অবৈধভাৱে উপাৰ্জন কৰা এই ধনসমূহ বেনামী লেনদেন, পৰিয়ালৰ সদস্যৰ বেংক একাউণ্টৰ জৰিয়তে সৰবৰাহ আৰু এখন চেলুনৰ ব্যৱসায়ৰ জৰিয়তে বৈধ কৰাৰ চেষ্টা চলাইছিল বুলি তদন্তত পোহৰলৈ আহিছে। ইয়াৰ পূৰ্বে ইডিয়ে ধন ৰবিৰোধীকৰণ আইনৰ অধীনত সুকন্যা বৰাৰ প্ৰায় ৭.৩৩ কোটি টকাৰ সম্পত্তি অস্থায়ীভাৱে বাজেয়াপ্ত কৰিছিল, যিটো পৰৱৰ্তী সময়ত নতুন দিল্লীৰ নিৰ্ণয়কাৰী কৰ্তৃপক্ষই নিশ্চিত কৰিছিল। এই বাজেয়াপ্ত কৰা সম্পত্তিসমূহৰ ভিতৰত মৰিগাঁও, গুৱাহাটীৰ বাঘৰবাৰী আৰু হাতীগাঁৱৰ মাটি, জয়ানগৰৰ এটা ফ্লেট আৰু প্ৰায় ৬৫.৫৪ লাখ টকা জমা থকা এটা বেংক একাউণ্ট অন্তৰ্ভুক্ত আছে। বিষয়াগৰাকীৰ বিত্তীয় অপৰাধ সন্দৰ্ভত ইডিয়ে বৰ্তমান অধিক তদন্ত অব্যাহত ৰাখিছে।
