দেশৰ কেন্দ্ৰীয় তদন্তকাৰী সংস্থা বলবৎকাৰী সঞ্চালকালয় চমুকৈ ইডিৰ সক্ৰিয়তাক লৈ শেহতীয়াকৈ সংসদত এক গুৰুত্বপূৰ্ণ তথ্য প্ৰকাশ কৰিছে কেন্দ্ৰীয় বিত্ত মন্ত্ৰালয়ে। বিৰোধী দলসমূহে প্ৰায়ে ইডিৰ কাৰ্যকলাপক ৰাজনৈতিক উদ্দেশ্যপ্ৰণোদিত বুলি অভিযোগ উত্থাপন কৰি আহিছে যদিও চৰকাৰী তথ্যই সংস্থাটোৰ সফলতাৰ এক বিপৰীত ছবিহে দাঙি ধৰিছে। বিত্ত মন্ত্ৰালয়ৰ তথ্য অনুসৰি বিগত ছবছৰত ইডিয়ে আৰ্থিক খেলিমেলি আৰু দুৰ্নীতিৰ অভিযোগত ৫ হাজাৰৰো অধিক গোচৰ ৰুজু কৰিছে। আটাইতকৈ তাৎপৰ্যপূৰ্ণ বিষয়টো হ’ল যে যিবোৰ গোচৰৰ বিচাৰ প্ৰক্ৰিয়া সম্পূৰ্ণ হৈছে, সেইসমূহৰ ভিতৰত দোষী সাব্যস্ত হোৱাৰ হাৰ প্ৰায় ৯৫ শতাংশৰ ওচৰা-উচৰি।
মঙলবাৰে ৰাজ্যসভাত এক লিখিত প্ৰশ্নৰ উত্তৰ দি কেন্দ্ৰীয় বিত্ত ৰাজ্য মন্ত্ৰী পংকজ চৌধুৰীয়ে কয় যে ২০২০ চনৰ পৰা বৰ্তমানলৈকে ইডিয়ে আৰ্থিক অপব্যৱহাৰৰ মুঠ ৫,১৫৮টা গোচৰ ৰুজু কৰিছে। মন্ত্ৰীগৰাকীয়ে প্ৰদান কৰা বছৰেকীয়া হিচাপ অনুসৰি ২০২০-২১ বিত্তীয় বৰ্ষত ৯৯৬টা গোচৰ ৰুজু হোৱাৰ বিপৰীতে ২০২১-২২ বৰ্ষত ইয়াৰ সংখ্যা আছিল ১,১১৬টা। একেদৰে ২০২২-২৩ বৰ্ষত ৯৫৩টা, ২০২৩-২৪ বৰ্ষত ৬৯৮টা, ২০২৪-২৫ বৰ্ষত ৭৭৫টা আৰু চলিত ২০২৫-২৬ বিত্তীয় বৰ্ষত এতিয়ালৈকে ৬২০টা গোচৰ ৰুজু কৰা হৈছে। এই পৰিসংখ্যাই প্ৰমাণ কৰে যে বিগত কেইবছৰমানত আৰ্থিক অপৰাধৰ বিৰুদ্ধে কেন্দ্ৰীয় সংস্থাটোৱে নিৰন্তৰ অভিযান চলাই আহিছে।
ইডিয়ে কেৱল গোচৰ ৰুজু কৰাই নহয়, আদালতত দোষী সাব্যস্ত কৰাৰ ক্ষেত্ৰতো অভূতপূৰ্ব সাফল্য লাভ কৰিছে বুলি মন্ত্ৰালয়ে দাবী কৰিছে। পংকজ চৌধুৰীয়ে জনোৱা মতে ২০২০-২১ বৰ্ষৰ পৰা এতিয়ালৈকে ইডিয়ে ৪৩টা গোচৰত সফলতা লাভ কৰিছে য’ত পিএমএলএ আইনৰ অধীনত ১০৪জন অভিযুক্তক আদালতে দোষী সাব্যস্ত কৰিছে। বিশেষকৈ ২০২৩-২৪ বৰ্ষত দোষী সাব্যস্ত হোৱাৰ সংখ্যা আছিল আটাইতকৈ বেছি। চৰকাৰী তথ্য অনুসৰি বিশেষ আদালতে এতিয়ালৈকে মুঠ ৫৮টা বিত্তীয় জালিয়াতিৰ গোচৰৰ চূড়ান্ত ৰায়দান কৰিছে। ইয়াৰে ৫৫টা গোচৰৰ ১৫৫জন অভিযুক্তক ইতিমধ্যে দোষী সাব্যস্ত কৰা হৈছে।
এই সমগ্ৰ তথ্য বিশ্লেষণ কৰি বিত্ত মন্ত্ৰালয়ে জনায় যে বৰ্তমানলৈকে নিষ্পত্তি হোৱা গোচৰসমূহৰ ভিতৰত দোষী সাব্যস্ত হোৱাৰ হাৰ হৈছে ৯৪.৮২ শতাংশ। বিৰোধীৰ ৰাজনৈতিক আক্ৰমণৰ মাজতে চৰকাৰে এই উচ্চ হাৰৰ সফলতাৰ তথ্য দাঙি ধৰি সংস্থাটোৰ নিৰপেক্ষতা আৰু কাৰ্যক্ষমতাৰ সপক্ষে যুক্তি প্ৰদৰ্শন কৰিছে। মন্ত্ৰালয়ৰ মতে সংস্থাটোৰ এই সক্ৰিয়তাই দেশৰ আৰ্থিক ব্যৱস্থাত স্বচ্ছতা অনাৰ লগতে দুৰ্নীতিগ্ৰস্তসকলৰ মনত ভয়ৰ সৃষ্টি কৰিবলৈ সক্ষম হৈছে।
