প্ৰৱৰ্তন সঞ্চালকালয় চমুকৈ ইডিয়ে শেহতীয়াকৈ কালানী ইম্পেক্স লিমিটেড আৰু ইয়াৰ সঞ্চালক ধৰ্মেশ সাঙানী, তেওঁৰ পত্নী ৰঞ্জীতা সাঙানী আৰু নৰেন্দ্ৰ সাঙানীৰ বিভিন্ন ঠিকনাত এক তালাচী অভিযান চলায়। এই অভিযান বৈদেশিক মুদ্ৰা ব্যৱস্থাপনা আইন অৰ্থাৎ ফেমা উলংঘাৰ এটা গোচৰৰ সৈতে জড়িত আছিল। অভিযানৰ সময়ত এক চাঞ্চল্যকৰ ঘটনা সংঘটিত হয়, য’ত ধৰ্মেশ সাঙানীয়ে নিজৰ মোবাইল ফোনটো এটা অট্টালিকাৰ ১৩ মহলাৰ পৰা তললৈ দলিয়াই দিয়ে বুলি গুৰুতৰ অভিযোগ উঠিছে। ইডিয়ে দাবী কৰিছে যে নিজৰ বিৰুদ্ধে থকা তথ্য-প্ৰমাণ নষ্ট কৰাৰ উদ্দেশ্যৰেই সাঙানীয়ে এই কাম কৰিছিল। অৱশ্যে পিছত সেই ফোনটো উদ্ধাৰ কৰা হয় আৰু ইডিয়ে এই সন্দৰ্ভত মুম্বাই আৰক্ষীৰ ওচৰত এটা গোচৰো ৰুজু কৰিছে।
উল্লেখ্য যে ধৰ্মেশ সাঙানী হৈছে এজন চলচ্চিত্ৰ প্ৰযোজক আৰু তেওঁ জনপ্ৰিয় অভিনেতা শেখৰ সুমনৰ ফিল্ম একাডেমীৰ সহ-প্ৰতিষ্ঠাপক। শেহতীয়াকৈ শেখৰ সুমনে তেওঁৰ এটা ইউটিউব অনুষ্ঠানত চৰকাৰ আৰু চৰকাৰী নীতিৰ বিৰুদ্ধে ব্যংগাত্মক মন্তব্য কৰাৰ সময়তে এই অভিযান হোৱা বাবে বিষয়টোৱে চৰ্চা লাভ কৰিছে। অৱশ্যে বিভিন্ন সংবাদ প্ৰতিবেদনত প্ৰকাশ পাইছে যে বৰ্তমানৰ এই তদন্ত কেৱল সাঙানী পৰিয়াল আৰু তেওঁলোকৰ কোম্পানীটোৰ মাজতে সীমাবদ্ধ আছে। ইয়াৰ সৈতে অভিনেতা শেখৰ সুমনৰ কোনো সম্পৰ্ক নাই আৰু তেওঁ এই তদন্তৰ আওতাত পৰা নাই।
ইডিয়ে জনোৱা অনুসায়ী কালানী ইম্পেক্স লিমিটেড নামৰ কোম্পানীটোৰ বিৰুদ্ধে বিদেশৰ পৰা আহিবলগীয়া ধন সঠিক সময়ত ভাৰতলৈ আনি নোপোৱোৱাৰ অভিযোগ আছিল। নিয়ম অনুসায়ী বিদেশৰ ক্ৰেতালৈ সামগ্ৰী ৰপ্তানি কৰাৰ পিছত সেই ধন নিৰ্দিষ্ট সময়ৰ ভিতৰত ভাৰতীয় বেংকত জমা হ‘ব লাগে, কিন্তু এই কোম্পানীটোৱে তাৰ কোনো ব্যৱস্থা কৰা নাছিল। তদন্তত আৰু দেখা গৈছে যে ৰপ্তানিৰ কাগজত নাম থকা ক্ৰেতাৰ পৰিৱৰ্তে অন্য কোনো তৃতীয় পক্ষৰ পৰাহে ধন লেনদেন কৰা হৈছিল। ইয়াৰ উপৰিও অভিযানৰ সময়ত তেওঁলোকৰ বহুতো অঘোষিত বিদেশী সম্পত্তি আৰু বিদেশী বেংক একাউণ্টৰো সন্ধান লাভ কৰা হৈছে বুলি ইডিয়ে প্ৰকাশ কৰিছে।
