চৰকাৰী সূত্ৰই জনোৱা মতে, বেটিং এপৰ সৈতে জড়িত ধন সৰবৰাহৰ গোচৰৰ তদন্তত টেক জায়ান্ট গুগল আৰু মেটালৈ জাননী প্ৰেৰণ কৰিছে বলবৎকাৰী সঞ্চালকালয়ে (ইডি)। তদন্তৰ অংশ হিচাপে সংস্থা দুটাৰ প্ৰতিনিধিক ২১ জুলাইত দিল্লীৰ মুখ্য কাৰ্যালয়ত হাজিৰ হ’বলৈ কোৱা হৈছে।
সূত্ৰ অনুসৰি, “গুগল আৰু মেটাই প্লেটফৰ্ম বিজ্ঞাপনৰ জৰিয়তে বেটিং এপৰ প্ৰচাৰ কৰিছে আৰু ব্যৱহাৰকাৰীৰ ওচৰলৈ যোৱাত সহায় কৰিছে।”
ধন সৰবৰাহ প্ৰতিৰোধ আইন (পিএমএলএ) উলংঘা কৰাৰ অভিযোগত তদন্ত চলি থকা অবৈধ এপসমূহৰ প্ৰচাৰৰ ক্ষেত্ৰত ডিজিটেল প্লেটফৰ্মৰ ভূমিকা পৰীক্ষা কৰি আছে সংস্থাটোৱে।
মুম্বাইৰ চাৰিটা স্থানত তালাচী চলাই নগদ ৩.৩ কোটি টকা, বিলাসী ঘড়ী, গহনা, বিদেশী মুদ্ৰা আৰু বিলাসী গাড়ী জব্দ কৰাৰ কিছুদিন পিছতে এই পদক্ষেপ গ্ৰহণ কৰা হৈছে। তালাচীৰ সময়ত এটা নগদ টকা গণনাৰ মেচিনো উদ্ধাৰ কৰা হৈছে।
বলবৎকাৰী সঞ্চালকালয়ে ভিমনি, ভিএম ট্ৰেডিং, ষ্টেণ্ডাৰ্ড ট্ৰেডছ লিমিটেড, আইবুল কেপিটেল লিমিটেড, লোটাছবুক, ১১ষ্টাৰছ, আৰু গেমবেটলীগ নামৰ অবৈধ ট্ৰেডিং আৰু বেটিং প্লেটফৰ্মৰ সৈতে জড়িত ‘ডাব্বা ট্ৰেডিং এপ’ৰ বিত্তীয় আৰু কাৰ্য্যকৰী কাৰ্যকলাপৰ তদন্ত কৰি আছে।
বিষয়াসকলৰ মতে, “অনলাইন বেটিং প্লেটফৰ্মসমূহ হোৱাইট লেবেল এপ আৰু লাভ ভাগবতৰাৰ ভিত্তিত এডিমিন ৰাইটছ শ্বেয়াৰিঙৰ জৰিয়তে পৰিচালিত হয়।” এই গোচৰৰ সৈতে জড়িত বিষয়াসকলে জনোৱা মতে, হাৱালা অপাৰেটৰ আৰু ফাণ্ড হেণ্ডলাৰ চিনাক্ত কৰা হৈছে, ডিজিটেল আৰু বিত্তীয় ৰেকৰ্ড পৰীক্ষা কৰা হৈছে।
ইডিৰ মতে, চলিত বৰ্ষৰ ৯ জানুৱাৰীত মধ্যপ্ৰদেশৰ ইন্দোৰৰ লাছুদিয়া থানাত দাখিল কৰা প্ৰথম তথ্য প্ৰতিবেদনৰ ভিত্তিত ভাৰতীয় দণ্ডবিধিৰ ৩১৯(২) আৰু ৩১৮(৪) ধাৰা (পূৰ্বৰ আইপিচিৰ ৪১৯ আৰু ৪২০ ধাৰা)ৰ অধীনত তদন্ত আৰম্ভ কৰা হৈছে।
ইডিৰ তদন্তত দেখা গৈছে যে, “ভি-মানি আৰু ১১ষ্টাৰছৰ লাভৱান মালিক বিশাল অগ্নিহোত্ৰীয়ে ৫ শতাংশ লাভ ভাগ-বতৰা চুক্তিত লোটাছবুক বেটিং প্লেটফৰ্মৰ এডিমিন স্বত্ব লাভ কৰিছিল।পিছত তেওঁ এই স্বত্বসমূহ ধবল দেৱৰাজ জৈনক হস্তান্তৰ কৰি ০.১২৫ শতাংশ লাভ ধৰি ৰাখিছিল, আনহাতে জৈনে ৪.৮৭৫ শতাংশ লাভ ৰাখিছিল।”
বিষয়াসকলৰ মতে, “ধবল জৈনে তেওঁৰ সহযোগী জন ষ্টেটছ ওৰফে পাণ্ডেৰ সৈতে মিলি এটা হোৱাইট লেবেলৰ বেটিং প্লেটফৰ্ম তৈয়াৰ কৰি বিশাল অগ্নিহোত্ৰীক 11Starss.in চলাবলৈ সৰবৰাহ কৰিছিল।”
ইয়াৰ পূৰ্বে বিষয়াসকলে লগতে কয় যে, “হাৱালাৰ অপাৰেটৰ ময়ুৰ পডিয়া ওৰফে পডিয়া বেটিং অপাৰেচনৰ বাবে নগদ ধন ভিত্তিক ফাণ্ড ট্ৰেন্সফাৰ আৰু পেমেণ্ট চম্ভালিছিল।
