মৰাণৰ ২৬ বছৰীয়া মুষ্টিযোদ্ধা গীতিমণি গগৈয়ে আগন্তুক ২০২৬ চনৰ বিশ্ব বক্সিং কাপৰ (দ্বিতীয় পৰ্যায়) বাবে ভাৰতীয় দলত স্থান লাভ কৰিছে। অহা ১৫ জুনৰ পৰা ২১ জুনলৈ চীনৰ গুইয়াং চহৰত অনুষ্ঠিত হ’বলগীয়া এই প্ৰতিযোগিতাখনেই হ’ব খেলুৱৈগৰাকীৰ জীৱনৰ প্ৰথমখন আন্তঃৰাষ্ট্ৰীয় প্ৰতিযোগিতা। দীৰ্ঘদিনীয়া কঠোৰ অনুশীলন, ত্যাগ আৰু একাগ্ৰতাৰ অন্তত ৭০ কিলোগ্ৰাম শাখাত অংশগ্ৰহণ কৰিবলগীয়া গীতিমণিয়ে আন্তঃৰাষ্ট্ৰীয় পৰ্যায়ত নিজৰ প্ৰতিভা প্ৰদৰ্শনৰ এক সোণালী সুযোগ লাভ কৰিছে।
বৰ্তমান পঞ্জাবৰ পাটিয়ালাৰ ৰাষ্ট্ৰীয় প্ৰশিক্ষণ শিবিৰত অনুশীলন চলাই থকা গীতিমণিয়ে মাত্ৰ ১৭ বছৰ বয়সতে নিজৰ গৃহচহৰ মৰাণত বক্সিঙৰ আৰম্ভণি কৰিছিল। পৰৱৰ্তী সময়ত তেওঁ গোলাঘাট আৰু পিছলৈ গুৱাহাটীস্থিত ভাৰতীয় ক্ৰীড়া প্ৰাধিকৰণ (ছাই) কেন্দ্ৰত যোগদান কৰি এই ক্ৰীড়াবিধক পেছাদাৰীভাৱে আঁকোৱালি লয়।
বৰ্তমান মহিলা দলৰ মুখ্য প্ৰশিক্ষক ছাণ্টিয়াগো নিভাৰ তত্ত্বাৱধানত গীতিমণিয়ে প্ৰশিক্ষণ গ্ৰহণ কৰি আছে। ৰাষ্ট্ৰীয় শিবিৰত খেলুৱৈসকলৰ কাৰিকৰী দক্ষতা, শাৰীৰিক সক্ষমতা আৰু ৰণকৌশলৰ ওপৰত বিশেষ গুৰুত্ব আৰোপ কৰা হৈছে। উল্লেখযোগ্য যে চীনলৈ যাবলগীয়া ভাৰতীয় দলটোত স্থান লাভ কৰা গীতিমণি একমাত্ৰ অসমীয়া মুষ্টিযোদ্ধা। অলিম্পিয়ান লাভলীনা বৰগোহাঁই, শিৱ থাপা আৰু আন্তঃৰাষ্ট্ৰীয় মুষ্টিযোদ্ধা অংকুশিতা বড়োৱে প্ৰতিষ্ঠা কৰা অসমৰ বক্সিঙৰ গৌৰৱোজ্জ্বল পৰম্পৰাক গীতিমণিয়ে আগুৱাই নিব বুলি ক্ৰীড়ামহলে আশা প্ৰকাশ কৰিছে।
যোৱা বছৰ হায়দৰাবাদত অনুষ্ঠিত এলিট মহিলা ৰাষ্ট্ৰীয় বক্সিং প্ৰতিযোগিতাত ৰূপৰ পদক আৰু চলিত বৰ্ষৰ সংস্কৰণত ব্ৰঞ্জৰ পদক অৰ্জন কৰি তেওঁ নিজৰ ধাৰাবাহিক প্ৰদৰ্শনৰ প্ৰমাণ দিছে। অসম এমেচাৰ বক্সিং সন্থাৰ সম্পাদক হেমন্ত কুমাৰ কলিতায়ো খেলুৱৈগৰাকীৰ দক্ষতাক লৈ গভীৰ আস্থা প্ৰকাশ কৰিছে।
বিশ্বৰ ক্ৰীড়ামঞ্চত শেহতীয়াভাৱে ধাৰাবাহিক উন্নত প্ৰদৰ্শন কৰি অহা ভাৰতীয় দলটোৱে এইবাৰো আত্মবিশ্বাসেৰে প্ৰতিযোগিতাত অৱতীৰ্ণ হৈ দেশৰ মান অক্ষুণ্ণ ৰাখিব বুলি আশা প্ৰকাশ কৰা হৈছে।
