দেশৰ বিভিন্ন প্ৰান্তৰ লগতে আজি ত্ৰিপুৰাৰ ৰাজধানী চহৰ আগৰতলাতো উলহ মালহেৰে ৰাতিপুৱা ঠিক ৮.৩০ বজাতে সমূহীয়া নামাজত অংশ লৈ ইচলাম ধৰ্মাৱলম্বী লোকসকলে পালন কৰে পবিত্ৰ ঈদ-উদ-জোহা।
উল্লেখ্য যে আজি বিশ্বৰ বিভিন্ন প্ৰান্তৰ ইচলাম ধৰ্মৰ লোকসকলে সমাজৰ শান্তি-সমৃদ্ধিৰ অৰ্থে ঈদ-উদ-জোহা উপলক্ষে আল্লাহৰ দোৱা বিচাৰি প্ৰাৰ্থনা জনায়।
আগৰতলাত আয়োজিত সমূহীয়া নামাজত জম্মু আৰু কাশ্মীৰৰ এজন লোকে অংশ লৈ নিজৰ মনৰ ভাৱ প্ৰকাশ কৰি কয় যে জন্মভূমিৰ পৰা বহু আঁতৰত ত্ৰিপুৰাত ঈদ-উদ-জোহা পালন কৰি বহু সুখী। তেওঁ লগতে ত্ৰিপুৰাখন শান্তিপূৰ্ণ ঠাই বুলিও অভিহিত কৰে।
উল্লেখ্য যে জম্মু আৰু কাশ্মীৰত চৰকাৰৰ বিৰুদ্ধে বিভিন্ন হিংসাত্মক কাৰ্যকলাপ সংঘটিত হৈ থাকে কাৰণে জম্মু আৰু কাশ্মীৰত অইন ৰাজ্য বিলাকৰ দৰে সমূহীয়া নামাজৰ বিপৰীতে প্ৰশাসনে কেৱল মহজিদতহে নামাজ পঢ়াৰ অনুমতি দিয়ে।
নৰ্থ-ইষ্ট নাওৰ সাংবাদিকৰ আগত একে অনুভৱ ব্যক্ত কৰিছে উত্তৰ প্ৰদেশৰ পৰা বন্ধু বৰ্গৰ সৈতে ত্ৰিপুৰাত ঈদ-উদ-জোহা পালন কৰা মহম্মদ চেৰফাট নামৰ এজন লোকে।
ব্যক্তিগৰাকীয়ে কয় যে পৰিয়ালৰ পৰা আঁতৰত থাকি এইদৰে ঈদ উদযাপন কৰিবলগীয়া হোৱাত মনত অলপ দুখ আছে যদিও ত্ৰিপুৰাৰ মৰমীয়াল লোকলকলৰ লগত শান্তিপূৰ্ণভাৱে পৱিত্ৰ ঈদ উদযাপন কৰি আনন্দও অনুভৱ হৈছে।
উল্লেখ্য আজি ইচলাম ধৰ্মৰ পৱিত্ৰ গ্ৰন্থ কোৰাণৰ অনুসৰি আজি ইচলাম ধৰ্মালম্বী লোকসকলে নিজৰ সাধ্য অনুযায়ী যিকোনো পশু কুৰ্বানী দি তাৰ মাংস দুখীয়া লোকসকলৰ মাজত বিতৰণ কৰাৰ পৰাম্পৰা আছে। তাৰোপৰি আজিৰ এই পৱিত্ৰ দিনটোতে বিভিন্নজনে অনাথ আশ্ৰম তথা বৃদ্ধাশ্ৰম সমূহত বিভিন্ন ধৰণে সহায়-সহযোগিতাৰ লগতে আৰ্থিক অনুদান আগবঢ়োৱাৰ নিদৰ্শন পোৱা যায়।