কেৰালাৰ ত্ৰিশূৰত ৰখাই থোৱা এখন ট্ৰাকত আন এখন বাহনে খুন্দা মৰাৰ ফলত তামিলনাডুৰ কমেও ৮ গৰাকী অভিযান্ত্ৰিক শিক্ষাৰ্থীৰ মৃত্যু হয়। কেৰালা আৰক্ষীয়ে জনোৱা মতে, কাইপামংগলামৰ পানাম্বিকুন্নুত ৰাষ্ট্ৰীয় ঘাইপথৰ কাষত ৰখাই থোৱা এখন ট্ৰাকৰ সৈতে শিক্ষাৰ্থীসকলক কঢ়িয়াই অনা গাড়ীখনৰ সংঘৰ্ষ ঘটে।
আৰক্ষী সূত্ৰই জনোৱা মতে, নিহত লোককেইজন তামিলনাডুৰ ডিণ্ডিগুলৰ এখন অভিযান্ত্ৰিক মহাবিদ্যালয়ৰ ছাত্ৰ। গুৰুভায়ুৰৰ পৰা ৬৬ নং ৰাষ্ট্ৰীয় ঘাইপথেৰে তেওঁলোক কোডুংগালুৰলৈ গৈ আছিল।
নিহত ৮ জনৰ ভিতৰত ৬ জনক চিনাক্ত কৰা হৈছে। সংবাদ সংস্থাই প্ৰকাশ কৰা তথ্য অনুসৰি ইয়াৰে চাৰিজন – সূৰ্য্য, যুৱসঞ্জিত, বিশ্ব আৰু জোহুৱা – ডিণ্ডিগুলৰ বাসিন্দা। আনহাতে, সন্তোষ আৰু প্ৰসন্ন মাদুৰাইৰ বাসিন্দা। বাকী দুজনৰ পৰিচয় এতিয়াও নিশ্চিত হোৱা নাই বুলি আৰক্ষীয়ে জানিবলৈ দিয়ে।
আৰক্ষীয়ে জনোৱা মতে, শুকুৰবাৰে নিশা প্ৰায় ১১:১৫ বজাত সংঘটিত হয় এই দুৰ্ঘটনা। চৰকাৰী সূত্ৰৰ মতে, দুৰ্ঘটনা সংঘটিত হোৱা অঞ্চলটোত ৰাষ্ট্ৰীয় ঘাইপথ মেৰামতিৰ কাম চলি আছিল। সেয়ে পথটোৰ নষ্ট অংশত বেৰিকেড লগোৱা হয়। নিয়ম উলংঘা কৰি ট্ৰাকখন পথত ৰখাই থোৱা অৱস্থাত শিক্ষাৰ্থীৰ গাড়ীখন পোনে পোনে গৈ ট্ৰাকখনত খুন্দা মাৰে।
