‘হিন্দুৱেই হওক বা মুছলমানেই হওক কোনো বিদেশীকে অসমক থাকিবলৈ দিয়া নহ’ব। বহু অসমীয়াৰ তেজৰ বিনিময়ত স্বাক্ষৰিত হোৱা অসম চুক্তি অনুসৰি ১৯৭১ৰ ২৪ মাৰ্চৰ পাছত অহা সকলো বিদেশীয়েই অসম এৰি যাব লাগিব’। এই মন্তব্য অগপৰ জ্যেষ্ঠ নেতা তথা ৰাজ্যসভাৰ প্ৰাক্তন সাংসদ কুমাৰ দীপক দাসৰ।
ৰাজ্যিক নিৰ্বাচনী আয়োগে পঞ্চায়ত নিৰ্বাচনৰ দিন ঘোষণা কৰাৰ লগে লগে ৰাজনৈতিক দলসমূহৰ মাজত তৎপৰতা বৃদ্ধি পোৱাৰ সময়তে অগপ দলে মঙলবাৰে সৰভোগ সমষ্টিৰ ফেহুৰাখোৱাত আয়োজন কৰা এখন কৰ্মীসভাত অংশ লৈ জ্যেষ্ঠ নেতাজনে এই মন্তব্য কৰে।
প্ৰাক্তন সাংসদগৰাকীয়ে বিজেপি নেতৃত্বাধীন চৰকাৰখনক ক্ষুৰধাৰ সমালোচনা কৰি কয় যে নাগৰিকত্ব সংশোধনী বিধেয়কখনৰ জৰিয়তে বিজেপিয়ে অসমত হিন্দু বাংলাদেশীক সংস্থাপন দিব বিচৰা কাৰ্য অতি নিকৃষ্ট। বিজেপিয়ে অসমৰ শান্তি-সম্প্ৰীতি, ঐক্য বিনষ্ট কৰি অসমখনক ধ্বংস কৰিবলৈ ওলোৱা বুলিও দাসে সকীয়নি দিয়ে।
আগন্তুক পঞ্চায়ত নিৰ্বাচন উপলক্ষে আয়োজিত কৰ্মী সভাত মুখ্য বক্তা হিচাপে উপস্থিত থকা দীপক দাসে আগন্তুক পঞ্চায়ত নিৰ্বাচনৰ বাবে মাৰ বান্ধি থিয় হোৱাৰ লগতে দলীয় প্ৰাৰ্থীসকলক জয়যুক্ত কৰিবলৈ কোনো ধৰণৰ যাতে ত্ৰুতি ৰৈ নাযায় তাৰ বাবে সকলো নেতা-কৰ্মীকে আহ্বান জনায়।
সভাত অগপৰ আন এগৰাকী বক্তা পুৰণ দাসেও বিজেপি নেতৃত্বাধীন কেন্দ্ৰীয় চৰকাৰখনে গ্ৰহণ কৰা জনবিৰোধী স্থিতিক তীব্ৰ ভাষাৰে সমালোচনা কৰি আগন্তুক নিৰ্বাচনত বিজেপিক উচিত প্ৰত্যুত্তৰ দিবলৈ আহ্বান জনায় অগপ কৰ্মীসকলক।