নিৰ্বাচন আয়োগৰ ভোটাৰ তালিকাৰ ‘বিশেষ নিবিড় সংশোধন’ (Special Intensive Revision – SIR) প্ৰক্ৰিয়া চলোৱাৰ পূৰ্ণ ক্ষমতা আৰু দক্ষতা আছে বুলি মঙলবাৰে আয়োগে উচ্চতম ন্যায়ালয়ক জানিবলৈ দিয়ে। ইয়াৰ উপৰিও, কেৱল ভাৰতীয় নাগৰিকহে যে ভোটাৰ হিচাপে পঞ্জীয়ন হৈছে, সেয়া নিশ্চিত কৰাটো এক সাংবিধানিক কৰ্তব্য বুলিও আয়োগে যুক্তি দৰ্শায়।
নিৰ্বাচন আয়োগৰ হৈ হাজিৰ হৈ জ্যেষ্ঠ অধিবক্তা ৰাকেশ দ্বিবেদীয়ে মুখ্য ন্যায়াধীশ সূৰ্য কান্ত আৰু ন্যায়াধীশ জয়মাল্য বাগচীৰ বিচাৰপীঠক কয় যে, সংবিধানৰ অনুচ্ছেদ ৩২৪ আৰু ৩২৭-এ আয়োগক “ভোটাৰ তালিকা প্ৰস্তুত কৰাৰ নিয়ন্ত্ৰণ” স্বতন্ত্ৰভাৱে প্ৰদান কৰিছে।
দ্বিবেদীয়ে আদালতত যুক্তি দিয়ে যে, “নাগৰিকত্ব হ’ল নিৰ্বাচনী প্ৰক্ৰিয়াৰ মূল কেন্দ্ৰবিন্দু। গতিকে এই সন্দৰ্ভত পৰীক্ষা-নিৰীক্ষা কৰাৰ ক্ষমতা নিৰ্বাচন আয়োগৰ আছে।”
নিৰ্বাচন আয়োগৰ ‘বিশেষ নিবিড় সংশোধন’ (SIR) কৰাৰ ক্ষমতাৰ প্ৰত্যাহ্বান জনাই দাখিল কৰা কেইবাখনো আবেদনৰ শুনানিৰ সময়ত এই যুক্তিসমূহ উত্থাপন কৰা হয়। আবেদনকাৰীসকলে দাবী কৰিছিল যে এই প্ৰক্ৰিয়াটো চলোৱাৰ ক্ষমতা কেৱল কেন্দ্ৰীয় চৰকাৰৰহে আছে।
মঙলবাৰে এই শুনানি অপূৰ্ণ হৈ থাকে আৰু বুধবাৰেও এই সন্দৰ্ভত আদালতত শুনানি অব্যাহত থাকিব।
