আজি কটন বিশ্ববিদ্যালয় ছাত্ৰ একতা সভাৰ নিৰ্বাচন অনুষ্ঠিত হৈছে। পুৱা ৯ বজাৰ পৰা নিৰ্বাচনৰ বাবে ভোটদান আৰম্ভ হৈছে। পুৱাৰে পৰা আৰম্ভ হোৱা ভোটদানত বিশ্ববিদ্যালয়খনৰ ছাত্ৰ-ছাত্ৰীসকলে যথেষ্ট উৎসাহ প্ৰদৰ্শন কৰে।
ছাত্ৰ একতা সভাখনৰ নিৰ্বাচনত ১৬ টা পদৰ বাবে মুঠ ৪৮ গৰাকী প্ৰাৰ্থীয়ে প্ৰতিদ্বন্দ্বিতা আগবঢ়াইছে। মুঠ ১৮ টা পদৰ ভিতৰত দুটা পদত ইতিমধ্যে দুগৰাকী প্ৰাৰ্থীয়ে বিনা প্ৰতিদ্বন্দ্বিতাৰে নিৰ্বাচিত হৈছে।
প্ৰতিদ্বন্দ্বিতাত সাধাৰণ সম্পাদক পদৰ বাবে ৪গৰাকী, সভাপতি পদৰ বাবে ৪গৰাকী, সহঃ সাধাৰণ সম্পাদকৰ পদৰ বাবে ৩গৰাকী আৰু আৰু উপ-সভাপতি পদৰ বাবে ৪গৰাকী প্ৰাৰ্থীয়ে প্ৰতিদ্বন্দ্বিতা আগবঢ়াইছে।
বিশ্ববিদ্যালয়ৰ সূত্ৰই জানিব দিয়া মতে দিনৰ ২ বজালৈকে ভোটগ্ৰহণ প্ৰক্ৰিয়া চলিব।
উল্লেখযোগ্য যে কটন বিশ্ববিদ্যালয় ছাত্ৰ একতা সভাৰ নিৰ্বাচনৰ প্ৰাকক্ষণত নিৰ্বাচনত প্ৰতিদ্বন্দ্বিতা কৰা এজন ছাত্ৰ আৰু আন এজন সমৰ্থক ছাত্ৰক শুকুৰবাৰে কোনো লোকে আক্ৰমণ কৰি গুৰুতৰভাৱে আহত কৰে।
আহত ছাত্ৰ দুজন হ’ল ক্ৰমে ত্ৰিনয়ন বৰুৱা আৰু নৱজিত দত্ত। নৱজিত দত্ত সাধাৰণ সম্পাদক পদৰ প্ৰাৰ্থী হোৱাৰ বিপৰীতে ত্ৰিনয়ন বৰুৱা সমৰ্থিত প্ৰাৰ্থীৰ হৈ প্ৰচাৰৰ দায়িত্বত আছিল। ত্ৰিনয়ন বৰুৱায়ো যোৱা বছৰৰ ছাত্ৰ একতা সভাত প্ৰতিদ্বন্দ্বিতা কৰিছিল যদিও বিজয়ী হোৱা নাছিল।
আনহাতে ছাত্ৰ দুজন বিশ্ববিদ্যালয়খনৰ সীতানাথ ব্ৰহ্ম চৌধুৰী ছাত্ৰাবাসৰ আৱাসী বুলি জানিব পৰা গৈছে।