আমেৰিকাৰ ৰাজনীতিত ড’নাল্ড ট্ৰাম্প আৰু ইলন মাস্কৰ মাজত সম্পৰ্কৰ ভাঙোনে চূড়ান্ত পৰ্যায়ত উপনীত হৈছে। প্ৰশাসনিক উপদেষ্টা পদৰ পৰা পদত্যাগ কৰাৰ পিছত এতিয়া মাস্কে পোনপটীয়াকৈ দাবী কৰিছে যে তেওঁৰ অবিহনে ট্ৰাম্পে নিৰ্বাচনত জিকিবই নোৱাৰিলেহেঁতেন।
এক্স হেণ্ডেলত মাস্কে লিখিছে, “মোৰ অবিহনে ট্ৰাম্প পৰাস্ত হ’লহেঁতেন। ডেম’ক্ৰেটসকলে হাউছৰ নিয়ন্ত্ৰণ ল’লেহেঁতেন আৰু ৰিপাব্লিকানসকলে চেনেটত ৫১-৪৯ ব্যৱধানত পিছ পৰি থাকিলেহেঁতেন।” এই মন্তব্যক কেন্দ্ৰ কৰি উত্তপ্ত চৰ্চা আৰু নতুন চাঞ্চল্যৰ সৃষ্টি হৈছে।
আনহাতে, বৃহস্পতিবাৰে অ’ভেল অফিচত ৰাষ্ট্ৰপতি ট্ৰাম্পে কয় যে, “ইলনৰ আচৰণ অতি হতাশাজনক। আমাৰ মাজত ভাল সম্পৰ্ক আছিল, কিন্তু এতিয়া ই চলি থাকিব নে নাই সেয়া কোৱা কঠিন।” তেওঁ লগতে কয় যে ইলনক শীৰ্ষ উপদেষ্টাৰ ভূমিকা দিয়াৰ পিছত তেওঁৰ পৰা বেলেগ সহযোগিতা আশা কৰা হৈছিল।
উল্লেখ্য যে ট্ৰাম্প পুনৰ ৰাষ্ট্ৰপতি হোৱাৰ পিছত তেওঁ মাস্কক “অফিচ অৱ গভৰ্ণমেণ্ট ইফিচিয়েন্সি” বিভাগৰ মুখ্য উপদেষ্টা হিচাপে নিযুক্তি দিয়ে, যাৰ লক্ষ্য আছিল প্ৰশাসনিক খৰচ হ্ৰাস কৰা।
কিন্তু ট্ৰাম্পৰ নতুন “ৱান বিগ বিউটিফুল বিল এক্ট”ৰ সৈতে মতানৈক্যৰ বাবে মাস্কে পদত্যাগ কৰে। বিধেয়কখনৰ সমালোচনা কৰি মাস্কে কয় যে, “এখন বিল ডাঙৰ হ’ব পাৰে, আৰু ই সুন্দৰ হ’ব পাৰে। কিন্তু দুয়োটা মিলি বিপদজনক হ’ব পাৰে। এই বিধেয়কখনে ২.৫ ট্ৰিলিয়ন ডলাৰৰ বাজেট ঘাটিৰ সৃষ্টি কৰিব। কংগ্ৰেছে দেশখনক দেউলীয়া কৰিব।”
এতিয়া শেহতীয়াকৈ ট্ৰাম্প-মাস্কৰ মাজৰ সম্পৰ্কৰ এই অৱনতিয়ে আমেৰিকাৰ আৰ্থ-সামাজিক তথা ৰাজনৈতিক দিশত এক নেতিবাচক প্ৰভাৱ পেলাব পাৰে বুলি বিশ্লষকসকলে ধাৰণা কৰিছে। দুয়োজনৰ বন্ধুত্বৰ মাজত ফাট মেলাৰ ঘটনাই আমেৰিকাৰ ৰিপাব্লিকান সমৰ্থকসকলৰ মাজত প্ৰতিক্ৰিয়াৰ সৃষ্টি কৰিছে।
