কেন্দ্ৰৰ পত্ৰৰ পিছতে ব্যৱস্থা গ্ৰহণ কৰিছে ছ’চিয়েল মিডিয়া প্লেটফৰ্ম এক্সে। চৰকাৰী সূত্ৰই জনোৱা মতে, অশ্লীল বিষয়বস্তু বিয়পোৱাৰ অভিযোগত এতিয়ালৈকে ৩৫০০টা পোষ্ট ব্লক কৰা হৈছে আৰু ৬০০টা একাউণ্ট সম্পূৰ্ণৰূপে ডিলিট কৰা হৈছে।
আনহাতে, ইয়াৰ সমান্তৰালকৈ সংস্থাটোৱে ভৱিষ্যতে এনেধৰণৰ বিষয়বস্তু সহ্য কৰা নহ’ব বুলিও আশ্বাস দিছে। চৰকাৰৰ নিয়ম অনুসৰি দেশত এই প্লেটফৰ্ম চলিব বুলি জনোৱা হৈছে।
এসপ্তাহৰ আগতেই এই ঘটনা আৰম্ভ হৈছিল। ইলেক্ট্ৰনিকছ আৰু তথ্য প্ৰযুক্তি মন্ত্ৰালয়ে এক্স কৰ্তৃপক্ষলৈ পত্ৰ লিখি জনাইছিল যে প্লেটফৰ্মত অশ্লীল, নগ্ন আৰু আপত্তিজনক বিষয়বস্তু উদ্বেগজনক হাৰত বৃদ্ধি পাইছে।
বিশেষকৈ এক্সৰ কৃত্ৰিম বুদ্ধিমত্তাৰ সহায়ক গ্ৰ’ক আৰু xAIৰ অন্যান্য সেৱাৰ অপব্যৱহাৰ কৰি মহিলাৰ ছবি আৰু ভিডিঅ’ বিকৃত আৰু প্ৰচাৰ কৰা হৈছে। পত্ৰখনত ৭২ ঘণ্টাৰ ভিতৰত ‘একচন টেকন ৰিপ’ৰ্ট’ দাখিল কৰিবলৈ কোৱা হৈছিল।
মন্ত্ৰালয়ে পত্ৰখনত স্পষ্ট ভাষাত সকীয়াই দিছিল যে নিৰ্দেশনা পালন নকৰিলে ভাৰতীয় আইন অনুসৰি কঠোৰ আইনী ব্যৱস্থা গ্ৰহণ কৰা হ’ব। কেৱল প্লেটফৰ্মৰ বিৰুদ্ধেই নহয় সংশ্লিষ্ট বিষয়াসকলৰ বিৰুদ্ধেও ব্যৱস্থা গ্ৰহণ কৰিব পাৰে। চৰকাৰৰ মতে গ্ৰ’ক ব্যৱহাৰ কৰি ভুৱা একাউণ্ট তৈয়াৰ কৰি যিখিনি কাম কৰা হৈছে সেয়া সম্পূৰ্ণ অনৈতিক আৰু অবৈধ।
এই প্ৰসংগত মন্ত্ৰালয়ে তৎক্ষণাত এক্সক গ্ৰ’কৰ কাৰিকৰী আৰু প্ৰশাসনীয় কাঠামোৰ সম্পূৰ্ণ পৰ্যালোচনা কৰিবলৈ নিৰ্দেশ দিয়ে। ইয়াৰ উপৰিও, কঠোৰ ইউজাৰ নীতিসমূহ কাৰ্যকৰী কৰিব লাগিব – যদি নিয়মসমূহ উলংঘা কৰা হয় একাউণ্ট নিলম্বনৰ পৰা বন্ধ কৰালৈকে সকলো ব্যৱস্থা গ্ৰহণ কৰিব লাগিব ।
মন্ত্ৰালয়ে লগতে জনাইছে যে যদি এনে অনিয়ম অব্যাহত থাকে তেন্তে তথ্য প্ৰযুক্তি আইনৰ ৭৯ নং ধাৰাত এক্সৰ ‘নিৰাপদ সুৰক্ষা’ (safe harbour) সুবিধা বাতিল হ’ব পাৰে। ইয়াৰ লগতে ভাৰতীয় ন্যায় সংহিতা, মহিলাৰ অশালীন প্ৰতিনিধিত্ব আইন আৰু যৌন অপৰাধৰ পৰা শিশু সুৰক্ষা আইন (POCSO Act)ৰ অধীনত শাস্তিমূলক ব্যৱস্থা গ্ৰহণ কৰিব পাৰে।
গুৰুত্বপূৰ্ণ কথাটো হ’ল সমগ্ৰ ঘটনাটো কেৱল ভুৱা একাউণ্ট সৃষ্টিৰ মাজতে সীমাবদ্ধ নহয়। বহু ক্ষেত্ৰত ছবি বিকৃতি, কৃত্ৰিম আউটপুট বা প্ৰমপ্টৰ জৰিয়তে কৃত্ৰিম বুদ্ধিমত্তা ব্যৱহাৰ কৰি মহিলাক লক্ষ্য কৰি কন্টেন্ট সৃষ্টি কৰা হৈছে।
মন্ত্ৰালয়ৰ মতে, এয়া প্লেটফৰ্মৰ নিৰাপত্তা ব্যৱস্থাৰ গুৰুতৰ বিফলতা আৰু কৃত্ৰিম বুদ্ধিমত্তাৰ চৰম অপব্যৱহাৰ। মুঠতে কেন্দ্ৰৰ পৰা কঠোৰ নিৰীক্ষণৰ সন্মুখীন হৈ এক্সে নিয়ন্ত্ৰণ আনিবলৈ বাধ্য হৈছে। কিন্তু প্ৰশ্নটো হ’ল – এই আশ্বাস কাৰ্যক্ষেত্ৰত কিমান ফলপ্ৰসূ হ’ব, বা পুনৰ নিয়ম উলংঘাৰ অভিযোগ উঠিব নেকি, সেয়া এতিয়া লক্ষণীয় হ’ব।
