ইলন মাস্কে আৰম্ভ কৰিছে এক নতুন মেছেজিং পৰিসেৱা। ইয়াৰ নাম দিয়া হৈছে ‘এক্স চ্যাট’। ই কোনো পৃথক এপ নহয়, কিন্তু ইয়াক পোনপটীয়াকৈ ছ’চিয়েল মিডিয়া প্লেটফৰ্ম এক্সৰ ভিতৰত ব্যৱহাৰ কৰিব পৰা যাব। এই সেৱাৰ মূল লক্ষ্য হৈছে হোৱাটছএপৰ দৰে জনপ্ৰিয় মেছেজিং এপৰ সৈতে প্ৰতিযোগিতা কৰা।
X Chat ত আছে কেইবাটাও নতুন ফিচাৰ। ইয়াত এণ্ড টু এণ্ড এনক্ৰিপচন, এডভান্স মেছেজ কন্ট্ৰল আৰু এটা সুকীয়া ইনবক্স আছে। ফলত এতিয়া ব্যৱহাৰকাৰীয়ে দুবিধ বাৰ্তা ডি এম আৰু এক্স চ্যাট পৃথকে পৃথকে চাব পাৰিব। মাস্কে কয় যে এই নতুন সেৱাত মেছেজ, অডিঅ’, ভিডিঅ’ আৰু ফাইল সম্পূৰ্ণ সুৰক্ষিতভাৱে প্ৰেৰণ কৰিব পৰা যাব।
মাস্কে কয় যে অতি সোনকালে এক্স মানি নামেৰে নতুন ধনৰ লেনদেন সেৱা আৰম্ভ কৰা হ’ব। ভাৰততো আৰম্ভ হ’ব নে নহয় সেয়া এতিয়াও স্পষ্ট হোৱা নাই। ইফালে এক্স চ্যাটৰ হেল্প চেণ্টাৰে জনাইছে যে গ্ৰুপ মেছেজ আৰু মিডিয়াও এনক্ৰিপচনৰ অধীনলৈ অনা হ’ব। ব্যৱহাৰকাৰীসকলে ইচ্ছা অনুসৰি পুৰণি বাৰ্তাসমূহ সম্পাদনা, মচি পেলোৱা বা হাইড কৰাৰ সুযোগো পাব।
হোৱাটছএপত মেছেজ ডিলিট কৰিলে ‘এই মেছেজটো ডিলিট হৈ গ’ল’ বুলি নোটিফিকেচন আহে। কিন্তু এক্স চ্যাটত এনে কোনো বাৰ্তা প্ৰদৰ্শিত নহ’ব। গোপনীয়তা বৃদ্ধি কৰিবলৈ নতুন ফিচাৰৰ সহায়ত স্ক্ৰীণশ্বটসমূহো ব্লক কৰি ৰাখিব পৰা যাব। ফলত গোপন বাৰ্তাৰ ফটো তোলা সম্ভৱ নহ’ব।
বৰ্তমান এক্স চেট কেৱল iOS আৰু ৱেব সংস্কৰণত উপলব্ধ। X ৰ DM ছেকচনত গৈ ইয়াত প্ৰৱেশ কৰিব পাৰিব। অতি সোনকালে এই সেৱা এণ্ড্ৰইড ব্যৱহাৰকাৰীৰ মাজলৈ অনাৰ পৰিকল্পনা কৰা হৈছে।
