বাক্সা জিলাৰ ৫৮ নম্বৰ তামুলপুৰ বিধান সভা সমষ্টিটো বিজেপি দলে মিত্ৰ দল ইউপিপিএলক এৰি দিয়াৰ লগে লগে তামুলপুৰত মিশ্ৰিত প্ৰতিক্ৰিয়াৰ সৃষ্টি হৈছে ।
উল্লেখযোগ্য যে বিপিএফ দলৰ প্ৰতিষ্ঠাপক সাধাৰণ সম্পাদক ইমানুৱেল মোছাহাৰীয়ে বিপিএফ দল ত্যাগ কৰি বিজেপি দলত যোগদান কৰিছিল ।
বিজেপিত যোগদান কৰিয়েই দিনে নিশাই বিজেপিৰ সাংগঠনিক ভেঁটি সুদৃঢ় কৰাৰ বাবে সামষ্টিত অহৰহ কাম কৰি আহিছে ।
এইবাৰৰ বিধান সভা নিৰ্বাচনত ৫৮ নং তামুলপুৰ বিধানসভা সমষ্টিৰ পৰা বিজেপিৰ পৰা দলীয় টিকট বিচাৰি ৰাজ্যিক বিজেপিৰ ওচৰত আবেদন দাখিল কৰিছিল ইমানুৱেল মোছাহাৰীয়ে আৰু বিজেপিৰ প্ৰাৰ্থিত্ব পোৱাৰ ক্ষেত্ৰত ইমানুৱেল মোছাহাৰী প্ৰৱল আত্মবিশ্বাসী হৈ আছিল ।
কিন্তু তামুলপুৰ সমষ্টিত বিজেপিয়ে নিজাববীয়াকৈ প্ৰাৰ্থীত্ব প্ৰদান নকৰি সমষ্টিটো ইউপিপিএল দলক এৰি দিয়ে ।
এই খবৰ পোৱাৰ পিছত ৰাবিবাৰে তামুলপুৰত বিজেপি দলৰ নেতা-কৰ্মী সকলৰ মাজত তীব্ৰ প্ৰতিক্ৰিয়াৰ সৃষ্টি হয় । ৰবিবাৰে আবেলি তামুলপুৰস্থিত ইমানুৱেল মোছাহাৰীৰ বাসগৃহত উপস্থিত হৈ তেওঁৰ একাংশ সমৰ্থক উত্তেজিত হৈ পৰে ।
তেওঁৰ সমৰ্থকসকলে ইমানুৱেল মোছাহাৰী জিন্দাবাদ , বিজেপি মূর্দাবাদ , বিজেপি গ’ বেক, হিমন্ত বিশ্ব গ’ বেক আদি ধ্বনি দি তামুলপুৰৰ পৰিবেশ উত্তাল কৰি তোলে ।
সমৰ্থক সকলে ইমানুৱেল মোছাহাৰীৰ বাসগৃহত থকা বিজেপি দলৰ পতাকা সমূহো খুলি পেলায়। ইপিনে সংবাদ মধ্যমৰ আগত নিজৰ প্ৰতিক্ৰিয়া ব্যক্ত কৰি ইমানুৱেল মোছাহাৰীয়ে কয় – মই এতিয়াও আশাবাদী যে দলৰ ৰাজ্যিক নেতৃত্বই বন্ধুত্বমূলকভাৱে ইউপিপিএল দলৰ লগত প্ৰতিদ্বন্দ্বিতা কৰাৰ সিদ্ধান্ত লব আৰু মোকেই প্ৰাৰ্থী হিচাপে প্ৰক্ষেপ কৰিব।
দলৰ নেতা-কৰ্মীৰ লগতে মইও বহু আশা কৰিছিলোঁ প্ৰাৰ্থীত্ব পাম বুলি। বিগত ৩৬৫ টা দিনত দিনে নিশাই বিজেপিৰ সাংগঠনিক ভেঁটি মজবুত কৰাৰ বাবে মই কাম কৰি আহিছোঁ আৰু মোৰ সামান্য আয়ৰ যি সাঁচতীয়া ধন আছিল সেয়াও দলীয় কাম কাজত শেষ কৰিছোঁ।
তেওঁ পুনৰ কয়- কেৱল টিকটেই নহয়, সমগ্ৰ বিটিচিত পৰিৱৰ্তন আনিম বুলি বিগত এটা বছৰে কাম কৰিলোঁ।
বিটিচিত পৰিৱৰ্তনো আহিল। যদিও মই নতুন বিজেপিৰ কাৰ্যকর্তা, তথাপি মোৰ লগত সাত আঠ বছৰে, দহ বছৰে কাম কৰি থকা পুৰণি বিজেপিও আছে। মই টিকট নোপোৱাত তেওঁলোকো দুঃখিত হৈছে। মোৰ ধাৰণা বিটিচিত বিজেপি বৰ বেছি চিৰিয়াছ নহয় । বিজেপি হৈয়ো ইউপিপিএল বা কোনোবা দলৰ চেকেণ্ড হেণ্ড পাৰ্টি কৰা যেনহে মোৰ অনুভৱ হৈছে । এতিয়াও সময় আছে। বিটিচিত বিজেপিক বচাই ৰাখিবলৈ আমি বন্ধুত্বমূলক ভাবে নিৰ্বাচনত প্ৰতিদ্বন্দ্বিতা কৰিব লাগিব।
ইমানুৱেল মোছাহাৰীয়ে ৰাজ্যিক বিজেপিলৈ প্ৰশ্ন কৰি পুনৰ কয়- যদি দলে নিৰ্বাচনত প্ৰাৰ্থীয়েই নিদিয়ে তেন্তে ইমানদিনে পাৰ্টি কিয় কৰিবলৈ দিছিল? যদি ইউপইপিএল দলক ৱাক অভাৰ দিয়ে তেন্তে বিজেপি আৰু ইউপইপিএলৰ কৰ্মীৰ মাজত সংঘাত সৃষ্টি হব পাৰে বুলিওতেওঁ আশংকা কৰে। যিহেতু ওদালগুৰি জিলাত ইউপিপিএল দলৰ সৈতে বন্ধুত্বমূলক প্ৰতিদ্বন্দ্বিতা হব পাৰে বাক্সা জিলাতো বন্ধুত্বমূলক প্ৰতিদ্বন্দ্বিতা আগবঢ়াব পাৰি আৰু এই ক্ষেত্ৰত ৰাজ্যিক বিজেপিয়ে বিবেচনা কৰিব বুলি তেওঁ আশাবাদী বুলিও মন্তব্য কৰে ইমানুৱেল মোছাহাৰীয়ে।
যদি বিজেপি দলে প্ৰাৰ্থিত্ব প্ৰদান নকৰে তেন্তে বিপিএফ দলে আগন্তুক নিৰ্বাচনত ভাল ফল দেখুৱাব পাৰে বুলি বুলিও মন্তব্য কৰে ইমানুৱেল মোছাহাৰীয়ে।
কিয়নো বিগত বিটিচি নিৰ্বাচনত বিপিএফ দলে চৰকাৰ গঠন কৰিব পৰা নাই যদিও ১৭ খনকৈ আসন লাভ কৰিছে। যদি বিজেপি দলে তেখেতক দলীয় টিকট নিদিয়ে তেন্তে নিৰ্দলীয় হিচাপে প্ৰতিদ্বন্দ্বিতা কৰিব নেকি বুলি সাংবাদিকে সোধা এক প্ৰশ্নৰ উত্তৰত ইমানুৱেল মোছাহাৰীয়ে কলে এতিয়াও তিনি চাৰিদিন সময় আছে সেইবোৰ ভাবিবলৈ।
ৰাজনীতিত পৰিৱৰ্তন হবলৈ তিনি বা চাৰি ঘণ্টা সময়েই অধিক।
মই এতিয়াও বিজেপিৰ দলীয় নেতৃত্বৰ ওপৰত আস্থা আৰু বিশ্বাস এৰা নাই। দলীয় নেতৃত্বই কিবা এটা ভাল চিন্তা কৰিব বুলি মই এতিয়াও যথেষ্ঠ আশাবাদী বুলি মন্তব্য কৰে ইমানুৱেল মোছাহাৰীয়ে।