বৃহত্তৰ মগৰাহাটবাসী ৰাইজৰ উদ্যোগত তথা নাজিৰা আৰু চামগুৰিৰ ৰাইজৰ সহযোগত দেওবাৰে বিশিষ্ট লেখক, সমাজ সংগঠক আৰু সু-চিকিৎসক ডাঃ মছউদুল হকক ৰাজহুৱাভাৱে অভিনন্দন জনোৱা হয়।
১০ মে’ তাৰিখে মগৰাহাট চাৰিআলি ৰাজহুৱা প্রেক্ষাগৃহত আয়োজিত এক গাম্ভীৰ্যপূৰ্ণ অনুষ্ঠানত জীৱনজোৰা কৃতি আৰু সমাজলৈ আগবঢ়োৱা অনবদ্য অৱদানৰ বাবে তেখেতক এই বিৰল সন্মান যঁচা হয়।
নামতিমুখ চাৰিআলিৰ পৰা ডাঃ মছউদুল হকক মগৰাহাট অঞ্চলৰ আটাইকেইখন বিদ্যালয়ৰ ছাত্ৰ-ছাত্ৰীসকলে গায়ন-বায়ন তথা বাৰেৰহণীয়া সাংস্কৃতিক শোভাযাত্ৰাৰে মূল মণ্ডপলৈ আদৰি আনে। হকৰ মানসপুত্ৰস্বৰূপ মগৰাহাট মাহীকুৰ সংঘই তেওঁক আদৰণি জনোৱাৰ লগতে সংঘৰ চৌহদত এটি গছপুলিও ৰোপণ কৰে।
প্ৰশান্ত বৰুৱাৰ সভাপতিত্বত অনুষ্ঠিত মুকলি সভাখন আনুষ্ঠানিকভাৱে উদ্বোধন কৰে কাকপথাৰ উচ্চতৰ মাধ্যমিক বিদ্যালয়ৰ অৱসৰপ্ৰাপ্ত অধ্যক্ষ বিমল চন্দ্ৰ বুঢ়াগোহাঁয়ে। এই বিশেষ অনুষ্ঠানতে ডাঃ হকৰ জীৱন আৰু কৰ্মৰাজিৰ ওপৰত আলোকপাত কৰি পল্লৱী গগৈ বৰগোহাঁইৰ সম্পাদনাত প্ৰকাশিত এখনি অভিনন্দন গ্ৰন্থ ‘ডাঃ মছউদুল হক: ব্যক্তি আৰু ব্যক্তিত্ব’ উন্মোচন কৰা হয়। গ্ৰন্থখন উন্মোচন কৰে জ্যেষ্ঠ সাংবাদিক তথা বিশিষ্ট লেখক-সমালোচক ৰিপুঞ্জয় গগৈয়ে।
অনুষ্ঠানটোত ড° জ্যোতি প্ৰকাশ চলিহা, পূৰ্ণ কাকতি, নিৰঞ্জন মহন্ত, ডাঃ ৰাণা সন্দিকৈ, নীলিমা বৰুৱা, বিজয়া বৰুৱা, ৰাজু বৰুৱা আৰু স্থানীয় বিশিষ্ট অতিথিসকলে অংশগ্ৰহণ কৰি ডাঃ হকৰ বৰ্ণাঢ্য জীৱনৰ বিষয়ে শ্ৰদ্ধাৰে সোঁৱৰে।
উক্ত অভিনন্দন অনুষ্ঠানত মুখ্য অতিথি হিচাপে উপস্থিত থাকি অসমীয়া জাতীয় অভিধানৰ মুখ্য সম্পাদক তথা যোৰহাট মহাবিদ্যালয়ৰ প্ৰাক্তন অধ্যক্ষ ড° দেৱব্ৰত শৰ্মাই এক সুন্দৰ আৰু তাৎপৰ্যপূৰ্ণ সাৰগৰ্ভ ভাষণ প্ৰদান কৰে। তেওঁ ডাঃ মছউদুল হকক কেৱল এজন চিকিৎসক হিচাপেই নহয়, বৰঞ্চ এজন শিক্ষক, ক্ৰীড়াবিদ, নাট্যকাৰ, অভিনেতা, সাংবাদিক, লেখক আৰু নিষ্ঠাৱান ৰাজনৈতিক কৰ্মী হিচাপেও অভিহিত কৰে।
ড° শৰ্মাই ডাঃ হকৰ বহুমুখী প্ৰতিভা আৰু সমাজসেৱাৰ প্ৰতি থকা গভীৰ দায়বদ্ধতাৰ ভূয়সী প্ৰশংসা কৰি তেওঁক এখন জীৱন্ত ইতিহাস বুলি আখ্যা দিয়ে। ভাষণ প্ৰসংগত ড° দেৱব্ৰত শৰ্মাই অসমৰ ইতিহাসত হিন্দু-মুছলমানৰ সম্প্ৰীতি আৰু ঐক্যৰ এক সুদীৰ্ঘ পৰম্পৰা থকাৰ কথা দোহাৰে। লাচিত বৰফুকন, বাঘ হাজৰিকা, আজান পীৰ, মণিৰাম দেৱান আৰু ফৰমুদ আলী আদিৰ ঐতিহাসিক অৱদানৰ কথা সোঁৱৰাই তেখেতে ডাঃ মছউদুল হকক ‘অবিভক্ত অসমীয়া জাতিৰ কণ্ঠ’ বুলি অভিহিত কৰে।
ড° শৰ্মাই লগতে উল্লেখ কৰে যে ডাঃ হকৰ দৰে ব্যক্তিৰ ধৰ্মনিৰপেক্ষ চিন্তা-চেতনা আৰু সাম্প্ৰদায়িকতা বিৰোধী স্থিতি সাম্প্ৰতিক সময়ত অত্যন্ত প্ৰাসংগিক। ইছলামিক আৰু হিন্দুত্ববাদী দুয়োবিধ মৌলবাদৰ তীব্ৰ বিৰোধিতাৰে মানৱতাৰ হকে মাত মাতি অহা ডাঃ হকৰ দৰে এগৰাকী মহান ব্যক্তিক জীৱিতাৱস্থাতে উচিত মৰ্যাদা প্ৰদান কৰি মগৰাহাটৰ ৰাইজে অসমীয়া সমাজক অকৃতজ্ঞ জাতি বুলি থকা বদনাম মচিবলৈ সক্ষম হৈছে বুলিও তেখেতে মন্তব্য কৰে।
পল্লৱী গগৈ বৰগোহাঁইৰ শলাগৰ শৰাই জ্ঞাপনৰ পাছতে জাতীয় সংগীত পৰিৱেশনেৰে সভাৰ সামৰণি পৰে।
