দীৰ্ঘদিন ধৰি চাকৰি কৰি অহাৰ পিছতো প্ৰাপ্য দৰমহাৰ পৰা বঞ্চিত ৰাজ্যৰ জনস্বাস্থ্য কাৰিকৰী বিভাগৰ আঁচনিত কৰ্মৰত কৰ্মচাৰীসকলে আজি দিচপুৰ লাষ্টগেটত প্ৰতিবাদ সাব্যস্ত কৰে।
উল্লেখযোগ্য যে জনস্বাস্থ্য কাৰিকৰী বিভাগৰ মুখ্য কাৰ্য্যকৰী অভিযন্তা আৰু জুনিয়ৰ ইঞ্জিনিয়াৰে মিলি গঠন কৰা এখন পৰিচালনা কমিটিয়ে বহু লোকক চাকৰি দিয়া হ’ব বুলি বিভাগৰ আঁচনিৰ কামত নিয়োগ কৰিছিল বুলি কৰ্মচাৰীসকলৰ সমন্বয় সমিতিৰ আহ্বায়ক বিকাশ দেই আজিৰ প্ৰতিবাদস্থলীত নৰ্থ ইষ্ট নাও’ৰ আগত সদৰী কৰে।
তেওঁ কয়, ‘জনস্বাস্থ্য কাৰিকৰী বিভাগৰ জলযোগান কেন্দ্ৰসমূহ স্থাপন কৰাৰ বাবে ভূমিৰ প্ৰয়োজন হোৱাত ১৯৯৪ চনতে আমাৰ কিছুসংখ্যক কৰ্মচাৰীয়ে ভূমি প্ৰদান কৰিছিল আৰু ইয়াৰ বিনিময়ত আমাক পানী যোগান আঁচনিৰ অধীনত চৰকাৰী চাকৰি দিয়াৰ প্ৰলোভন দিছিল।‘
কিন্তু বহু কষ্টৰে আনকি বিভিন্ন সময়ত কৰ্মচাৰীসকলে নিশা বহু দেৰিলৈকে নতুবা ওৰে নিশা উজাগৰে থাকি কাম কৰাৰ পিছতো উক্ত কৰ্মচাৰীসকলে চাকৰি পোৱাটো দুৰৰে কথা প্ৰাপ্য মজুৰিও লাভ কৰা নায়।
‘২০১৩ চনতে চৰকাৰে মাহিলী হিচাপত মাহে ৫ হাজাৰ টকাৰ টকা দিবৰ বাবে নিৰ্দেশ দিছিল যদিও মাত্ৰ ৩ হাজাৰ টকাহে দিয়ে কমিটিখনে।‘
আনহাতে, চৰকাৰে উক্ত কমিটিখনক মাহে ৫ হাজাৰ টকাকৈ দিবলৈ নিৰ্দেশ দিছিল যদিও পৰিচালনা কমিটিয়ে সেই ধন যন্ত্ৰ-পাতি মেৰামতি কৰা বা চোৱা-চিতাৰ কামতহে ব্যৱহাৰ কৰে বুলি তেওঁ লগতে কয়।
আজিৰ এই প্ৰতিবাদৰ জৰিয়তে কৰ্মচাৰীসকলে জনস্বাস্থ্য কাৰিকৰী বিভাগৰ মন্ত্ৰী ৰিহন দৈমাৰীক তেওঁলোকৰ মাহিলী দৰমহা ১০,৫০০ টকালৈ বৃদ্ধি কৰিবলৈ দাবী উত্থাপন কৰে। ইয়াৰ উপৰি তেওঁলোকে উক্ত পৰিচালনা কমিটিৰ একাউন্টত মজুৰি দিয়া বন্ধ কৰিবৰ বাবে বিভাগক আহ্বান জনায়।
আনহাতে জনস্বাস্থ্য কাৰিকৰী বিভাগৰ মুখ্য অভিযন্তা বীৰেন ভট্টাচাৰ্য্যক এই সম্পৰ্কে প্ৰশ্ন কৰাত তেওঁ নৰ্থ-ইষ্ট নাওক কয়, ‘কৰ্মচাৰীসকলক পৰিচালনা কমিটিয়ে ৰখা মানুহ। চৰকাৰৰ সৈতে এইক্ষেত্ৰত কোনো সম্পৰ্ক নাই।’
২০১৪ চনত কৰ্মচাৰীসকলক এককালীন সাহায্য দিয়া হৈছিল বুলি উল্লেখ কৰে তেওঁ কয়, ‘এইবাৰো বিভাগত ৫ কোটি টকা এটা আছে। সেই ধন পৰিচালনা কমিটিখনক দিয়া হ’ব। সেই ধনৰ পৰা যদি কোনো কৰ্মচাৰীক মজুৰি দিয়ে, তেওঁলোকেহে দিব।’
তাৎপৰ্য্যপূৰ্ণভাৱে কৰ্মচাৰীসকলৰ নিযুক্তি সম্পৰ্কে সোধাত তেওঁ কয়, ‘তেওঁলোকক চৰকাৰীভাৱে নিযুক্তি দিয়া হ’ব নে নহয়, সেই কথা মন্ত্ৰীৰ সৈতে কথা পাতিলে আপুনি গম পাব।’
