ৰাছিয়া-ইউক্ৰেইন যুদ্ধৰ প্ৰতিক্ৰিয়া প্ৰকাশ কৰি ভাৰতৰ দ্বিতীয় বৃহত্তম তেল শোধনাগাৰ ভেডিনাৰ তেল শোধনাগাৰৰ ওপৰত নিষেধাজ্ঞা আৰোপ কৰিছে ইউৰোপীয় ইউনিয়নে।
শুকুৰবাৰে এক্স হেণ্ডলত এটা পোষ্টত ইউৰোপীয় ইউনিয়নৰ বৈদেশিক পৰিক্ৰমা বিষয়ক মুৰব্বী কাজা কালাছে এই তথ্য নিশ্চিত কৰে।
তেওঁ কয়, “আমি ক্ৰেমলিনৰ যুদ্ধ বাজেটৰ মূল অংশত আঘাত কৰিব বিচাৰো। সেই লক্ষ্যৰে এই সিদ্ধান্ত লোৱা হৈছে। ৰাছিয়া-ইউক্ৰেইন যুদ্ধৰ ক্ষেত্ৰত আমাৰ স্থিতি স্পষ্ট আৰু দৃঢ়।”
গুজৰাটৰ ভেডিনাৰ চহৰত অৱস্থিত এই শোধনাগাৰটো ১৯৯৬ চনত ভাৰতীয় কোম্পানী নায়াৰা এনাৰ্জি লিমিটেড আৰু ৰাছিয়াৰ চৰকাৰী কোম্পানী ৰছনেফ্টৰ যৌথ উদ্যোগ হিচাপে স্থাপন কৰা হৈছিল। বৰ্তমান শোধনাগাৰৰ ৪৯.১৩ শতাংশৰ মালিক ৰ’ছনেফ্ট।
কেৱল ভেডিনাৰেই নহয়, ইউৰোপীয় ইউনিয়নে ৰাছিয়া-ভাৰত তেল বাণিজ্যত ব্যৱহৃত ‘ফ্লেগ ৰেজিষ্ট্ৰেশ্যন’ ব্যৱস্থাৰ ওপৰতো নিষেধাজ্ঞা আৰোপ কৰিছে। এই নিষেধাজ্ঞাৰ ফলত এতিয়াৰে পৰা ভাৰতৰ পতাকা থকা কোনো জাহাজে ৰাছিয়াৰ তেল পৰিবহণ কৰিব নোৱাৰিব।
২০২২ চনৰ ফেব্ৰুৱাৰী মাহত ৰাছিয়াই ইউক্ৰেইনত আক্ৰমণ কৰাৰ পিছত আমেৰিকা আৰু ইউৰোপীয় ইউনিয়নে ৰাছিয়াৰ তেলৰ ওপৰত একাধিক নিষেধাজ্ঞা আৰোপ কৰে। এই অঞ্চল দুটা এসময়ত ৰাছিয়াৰ মূল তেল ক্ৰেতা আছিল। কিন্তু তাৰ পিছত চীন আৰু ভাৰত ৰাছিয়াৰ সৰ্বাধিক তেল ক্ৰেতা দেশত পৰিণত হৈছে।
বিশ্লেষকসকলে কয় যে নিষেধাজ্ঞাৰ আওতাত নথকা ভাৰতে যুদ্ধ আৰম্ভ হোৱাৰ পিছৰে পৰা ৰাছিয়াৰ তেল আমদানি যথেষ্ট বৃদ্ধি কৰিছে। উল্লেখ্য যে ৰাছিয়া-ইউক্ৰেইন যুদ্ধ বিষয়ক লৈ ইউৰোপীয় ইউনিয়নে এই প্ৰথম কোনো ভাৰতীয় কোম্পানীৰ ওপৰত নিষেধাজ্ঞা আৰোপ কৰিছে।
