কংগ্ৰেছত যোগদান কৰিয়েই ৰিপুন বৰাৰ প্ৰশংসাত পঞ্চমুখ হৈ পৰে মীৰা বৰঠাকুৰ। আনকি সকলো নেতা-কৰ্মীকে নিজকে ৰিপুন বৰা বুলি ভাবি কাম কৰিব যাবলৈ আহ্বান জনায় মীৰাই।
তেওঁ কয় ‘সকলো বুথ পৰ্য্যায়ৰ কংগ্ৰেছ কৰ্মীয়ে নিজকে আজিৰ পৰা ৰিপুন বৰা বুলি ভাৱক। সকলোৱে নিজকে নেতা হিচাপে ভাবি সমষ্টিত কাম কৰক।
‘২১ ত স্বাভিমানৰে সৈতে এইখন স্বেচ্ছাস্বাৰী চৰকাৰক উফৰাব লাগিব।‘ বৰঠাকুৰে লগতে কয়।
ইপিনে, সাম্প্ৰতিক ভাৰতত লগা জুই ফায়াৰব্ৰিগেড হৈ কংগ্ৰেছে নুমুৱাব পাৰিব বুলি দাবী কৰি মীৰাই লগতে কয় ‘ফায়াৰব্ৰিগেডৰ পানীৰে ভাৰতৰ জুই নুমুৱাব ভাৰতীয় জাতীয় কংগ্ৰেছে।‘
আনহাতে, বৰঠাকুৰৰ কোনো নিৰ্বাচন খেলাৰ ইচ্ছা নাই বুলি উল্লেখ কৰি মীৰাই লগতে কয় ‘মই এজন সৈনিক হিচাপে ভাৰতীয় জনতা পাৰ্টীৰ বিৰুদ্ধে শদিয়াৰ পৰা ধুবুৰীলৈকে ৰাইজক জাগৃত কৰাৰ চেষ্টা কৰিম।‘
‘২১ ৰ নিৰ্বাচনী যুঁজত দেহত শেষ টোপাল তেজ থকালৈকে সকলো আঞ্চলিক ৰাজনৈতিক শক্তিক একত্ৰিত কৰাৰ প্ৰয়াসৰে বিজেপিক প্ৰতিহত কৰিবলৈ প্ৰতিজ্ঞাবদ্ধ। বিজেপি চৰকাৰ বাকী আৰু ফাঁকিত চলা চৰকাৰ।‘ বৰঠাকুৰে এইদৰে কয়।
তদুপৰি, প্ৰয়াত প্ৰাক্তন মুখ্যমন্ত্ৰী তৰুণ গগৈৰ দৰে জাতীয়তাবাদী নেতা কোনো হ’ব নোৱাৰে বুলি উল্লেখ কৰি বৰঠাকুৰে কয় ‘তেওঁক মই ফ’ল’ কৰিছিলো।‘
ইপিনে, কংগ্ৰেছত থাকোতে মন্ত্ৰী হিমন্ত বিশ্ব শৰ্মাই ইমান কষ্ট কৰিবলগীয়া হোৱা নাছিল বুলি বৰঠাকুৰে দাবী কৰে।
তেওঁ কয় ‘হিমন্ত বিশ্ব শৰ্মা কংগ্ৰেছত থাকোতে চাইকেল কোবাই থাকিবলগীয়া হোৱা নাছিল। কিন্তু বিজেপিত যোগদান কৰি তেওঁ চাইকেল চলাই চলাই নাচি নাচি ৰেষ্টলেচ জীৱন অতিবাহিত কৰিবলগীয়া হৈছে।‘
উল্লেখযোগ্য যে, আজি ছত্তিশগড়ৰ মুখ্যমন্ত্ৰী ভূপেশ বাঘেৰ, প্ৰদেশ কংগ্ৰেছৰ তত্বাবধায়ক জীতেন্দ্ৰ সিং, প্ৰদেশ কংগ্ৰেছৰ সভাপতি ৰিপুন বৰাকে ধৰি অন্য শীৰ্ষ নেতাৰ উপস্থিতিত মানৱেন্দ্ৰ শৰ্মা কমপ্লেক্সত কংগ্ৰেছত আনুষ্ঠানিকভাৱে যোগদান কৰে মীৰাই।