সদৌ অসম ছাত্ৰ সন্থাৰ প্ৰাক্তন সাধাৰণ সম্পাদক শংকৰ জ্যোতি বৰুৱাই আনুষ্ঠানিকভাৱে ভাৰতীয় জনতা পাৰ্টিত যোগদান কৰে। শনিবাৰে গুৱাহাটীৰ বশিষ্ঠস্থিত ৰাজ্যিক বিজেপিৰ মুখ্য কাৰ্যালয় অটল বিহাৰী বাজপেয়ী ভৱনত আয়োজিত এক অনুষ্ঠানত তেওঁ গেৰুৱা দলটোৰ সদস্যপদ গ্ৰহণ কৰে। আগন্তুক বিধানসভা নিৰ্বাচনৰ পূৰ্বে শংকৰ জ্যোতি বৰুৱাৰ এই পদক্ষেপে ৰাজ্যৰ ৰাজনীতিত বিশেষ চৰ্চা লাভ কৰিছে। দলৰ সভাপতি দিলীপ শইকীয়া আৰু কেন্দ্ৰীয় মন্ত্ৰী পবিত্ৰ মাৰ্ঘেৰিটাৰ উপস্থিতিত তেওঁৰ লগতে আছুৰ আন কেইবাজনো প্ৰাক্তন নেতা আৰু বিভিন্ন দল-সংগঠনৰ কৰ্মীয়ে বিজেপিত যোগদান কৰে।
যোগদানৰ পিছত সংবাদ মাধ্যমৰ আগত শংকৰ জ্যোতি বৰুৱাই কয় যে তেওঁ ৰাইজৰ বাবে কাম কৰিবলৈ সদায় সাজু। তেওঁ প্ৰধানমন্ত্ৰী নৰেন্দ্ৰ মোদী আৰু অসমৰ মুখ্যমন্ত্ৰী হিমন্ত বিশ্ব শৰ্মাৰ নেতৃত্বত চলি থকা উন্নয়নমূলক কাম-কাজৰ যথেষ্ট প্ৰশংসা কৰে। বিশেষকৈ গাঁও অঞ্চলৰ উন্নয়নৰ ক্ষেত্ৰত বিজেপি চৰকাৰে গ্ৰহণ কৰা পদক্ষেপসমূহৰ দ্বাৰা তেওঁ প্ৰভাৱিত হোৱা বুলি জানিবলৈ দিয়ে। তেওঁৰ সৈতে গোর্খা ছাত্ৰ ইউনিয়ন আৰু গোর্খা মহিলা মঞ্চৰো বহু নেতা-কৰ্মীয়ে দলটোত যোগদান কৰে। বৰুৱাই স্পষ্ট কৰে যে তেওঁৰ বাবে বৰ্তমানৰ লক্ষ্য হৈছে কেৱল দলৰ হৈ কাম কৰা।
শংকৰ জ্যোতি বৰুৱাৰ লগতে আছুৰ আন কেইবাগৰাকীও প্ৰাক্তন কেন্দ্ৰীয় কাৰ্যনিৰ্বাহক সদস্য যেনে কনক গগৈ, অৰ্জুন চেত্ৰী, ৰাজীৱ গগৈ আৰু ৰক্তিম বৰাই গেৰুৱা বসন পিন্ধে। ইয়াৰ উপৰি তিনিচুকীয়া জিলা আছুৰ প্ৰাক্তন সভাপতি সত্য বৰগোহাঁই আৰু মাজুলী জিলা আছুৰ প্ৰাক্তন সভাপতি প্ৰঞ্জিত হাজৰিকাইও বিজেপিত ভৰি দিয়ে। কেৱল ছাত্ৰ সন্তাই নহয়, আটছা, আম আদমী পাৰ্টি আৰু কংগ্ৰেছৰো কেইবাজনো নেতাই এই যোগদান কাৰ্যসূচীত অংশ লয়। ইয়াৰ ভিতৰত শিৱ কৰ্মকাৰ, বাবলু ভূমিজ আৰু সমীৰঞ্জন বৰশইকীয়াৰ দৰে নেতাৰ নাম উল্লেখযোগ্য।
অৱশ্যে নতুনকৈ দলত যোগদান কৰা এই নেতাসকলৰ নিৰ্বাচনী টিকটক লৈ মুখ্যমন্ত্ৰী হিমন্ত বিশ্ব শৰ্মাই এক গুৰুত্বপূৰ্ণ মন্তব্য কৰিছে। মুখ্যমন্ত্ৰীয়ে স্পষ্টকৈ জনাই দিছে যে নিৰ্বাচনলৈ অতি কম সময় বাকী থকা বাবে নতুনকৈ অহা নেতাসকলে এইবাৰ টিকটৰ আশা কৰিব নালাগে। তেওঁ কয় যে বিজেপিলৈ সকলোকে আদৰণি জনোৱা হৈছে যদিও তেওঁলোকে প্ৰথমে দলৰ হৈ কাম কৰি নিজৰ ভেটি শক্তিশালী কৰিব লাগিব। শংকৰ জ্যোতি বৰুৱাকে ধৰি আন সকলোকে উদ্দেশ্যি মুখ্যমন্ত্ৰীয়ে কয় যে আজি যোগদান কৰি কাইলৈ টিকট বিচাৰিলে সমস্যা হয়, সেয়েহে তেওঁলোকে বৰ্তমান কেৱল দলীয় কামত মনোনিবেশ কৰা উচিত। এই সন্দৰ্ভত শংকৰ জ্যোতি বৰুৱাই কয় যে তেওঁ মুখ্যমন্ত্ৰীৰ নিৰ্দেশ মৰ্মে দলৰ হৈ কাম কৰি যাবলৈ সম্পূৰ্ণ সাজু।
